ຂປລ. ໃນວັນທີ 26 ກໍລະກົດ 2024 ນີ້, ສປປ ລາວ ແລະ ສ ເກົາຫລີ ໄດ້ເປັນເຈົ້າພາບຮ່ວມຈັດກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນໍ້າຂອງ-ສ ເກົາຫລີ ຄັ້ງທີ 12 ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ ເຊິ່ງຈັດຂຶ້ນໃນລະຫວ່າງ ກອງປະຊຸມ ລັດຖະມົນຕີຕ່າງປະເທດ ອາຊຽນ ຄັ້ງທີ 57 ໂດຍການເປັນປະທານຮ່ວມລະຫວ່າງ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ,​ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ໂຊ ແທຢຸນ (CHO Tae-yul) ລັດຖະມົນຕີ ກະຊວງການຕ່າງປະເທດ ແຫ່ງ ສ ເກົາຫລີ, ມີບັນດາລັດຖະມົນຕີ ແລະ ບັນດາຫົວໜ້າເຈົ້າໜ້າທີ່ອາວຸໂສ ປະເທດສະມາຊິກແມ່ນໍ້າຂອງ ຄື: ກຳປູເຈຍ, ມຽນມາ, ໄທ ແລະ ຫວຽດນາມ ເຂົ້າຮ່ວມ.

ກອງປະຊຸມຄັ້ງນີ້, ເພື່ອທົບທວນຄືນຄວາມຄືບໜ້າ ໃນການຈັດຕັ້ງປະຕິບັດບັນດາແຜນງານ ພາຍໃຕ້ຂອບການຮ່ວມມືແມ່ນ້ຳຂອງ-ສ ເກົາຫລີ ແລະ ລາຍງານຄວາມຄືບໜ້າ ກ່ຽວກັບໝາກຜົນຂອງການຮ່ວມມືໃນໄລຍະຜ່ານມາ ກໍຄື ບັນດາແຜນງານ-ໂຄງການ ທີ່ນອນຢູ່ໃນແຜນປະຕິບັດງານ ພາຍໃຕ້ຂອບການຮ່ວມມືແມ່ນໍ້າຂອງ-ສ ເກົາ ຫລີ 2021-2025 (Plan of Action 2021-2025) ເປັນຕົ້ນແມ່ນ 7 ຂົງເຂດການຮ່ວມມືບູລິມະສິດ ຄື: ວັດທະນະທໍາ ແລະ ການທ່ອງທ່ຽວ, ການພັດທະນາຊັບພະຍາກອນມະນຸດ, ກະສິກໍາ ແລະ ການພັດທະນາຊົນນະບົດ, ພື້ນຖານໂຄງລ່າງ, ເຕັກໂນໂລຊີ ແລະ ການສື່ສານ, ດ້ານສິ່ງແວດລ້ອມ ແລະ ສິ່ງທ້າທາຍດ້ານຄວາມປອດໄພ ທີ່ບໍ່ແມ່ນການທະຫານ. ໃນນັ້ນ, ເຫັນວ່າໄດ້ມີຫລາຍໂຄງການຮ່ວມມື ໄດ້ຖືກຈັດຕັ້ງປະຕິບັດຢ່າງເປັນຮູບປະທຳ ແລະ ຊ່ວຍປະກອບສ່ວນເຂົ້າໃນ ການສ້າງສາພັດທະນາ ເສດຖະກິດ-ສັງຄົມ ໃນພາກພື້ນ ແມ່ນໍ້າຂອງ, ລວມທັງ ສປປ ລາວ ກໍໄດ້ຮັບໂຄງການພາຍໃຕ້ກອງທຶນ ຂອບການຮ່ວມມືແມ່ນ້ຳຂອງ-ສ ເກົາຫລີ (MKCF) ຈຳນວນ 7 ໂຄງການ ລວມມູນຄ່າທັງໝົດ 2,7 ລ້ານກວ່າໂດລາສະຫະລັດ. ໃນປີນີ້, ສ ເກົາຫລີ ໄດ້ມອບທຶນຊ່ວຍເຫລືອພາຍໃຕ້ ກອງທຶນຂອບ ການຮ່ວມມືດັ່ງກ່າວ ມູນຄ່າ 400.000 ກວ່າໂດລາສະຫະລັດ ເຂົ້າໃນການຈັດຕັ້ງປະຕິບັດ ໂຄງການສົ່ງເສີມການຜະລິດຖົ່ວເຫລືອງ ແລະ ສ້າງເຕັກໂນໂລຊີ ທີ່ເປັນນະວັດຕະກຳການປຸງແຕ່ງ ແລະ ການນຳໃຊ້ຖົ່ວເຫລືອງໃນ ສປປ ລາວ ແລະ ສສ ຫວຽດນາມ ເຊິ່ງໄດ້ເລີ່ມຈັດຕັ້ງ ປະຕິບັດໂຄງການ ໃນເດືອນມີນາ 2024 ເປັນຕົ້ນມາ.

ພ້ອມກັນນັ້ນ, ກອງປະຊຸມຍັງໄດ້ປຶກສາຫາລືຮ່ວມກັນວາງທິດທາງ ແຜນການຮ່ວມມືໃນຕໍ່ໜ້າ ໂດຍເນັ້ນໃສ່ການຮ່ວມມືເພື່ອຟື້ນຟູສະພາບເສດຖະກິດ ໃນພາກພື້ນແມ່ນໍ້າຂອງ ໂດຍສະເພາະ ການກະກຽມເປັນເຈົ້າພາບຮ່ວມຈັດກອງປະຊຸມເວທີປຶກສາຫາລືພາກທຸລະກິດ ແມ່ນໍ້າຂອງ-ສ ເກົາຫລີ ຄັ້ງທີ 12 ທີ່ ຈະຈັດຂຶ້ນໃນວັນທີ 20-21 ສິງຫາ 2024 ທີ່ນະຄອນຫລວງວຽງຈັນ ແລະ ປຶກສາຫາຫລື ກ່ຽວກັບແຜນການຈັດກອງປະຊຸມ ລັດຖະມົນຕີ ຂອບການຮ່ວມມືແມ່ນ້ຳຂອງ-ສ ເກົາຫລີ ຄັ້ງຕໍ່ໄປ.

ໃນກອງປະຊຸມຄັ້ງນີ້, ທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ສະແດງຄວາມຊົມເຊີຍ ແລະ ຂອບໃຈຕໍ່ລັດຖະບານ ສ ເກົາຫລີ ທີ່ໄດ້ສືບຕໍ່ປະກອບສ່ວນໃນ ການພັດທະນາ ເສດຖະກິດ-ສັງຄົມ ຢູ່ ໃນພາກພື້ນແມ່ນ້ຳຂອງ, ລວມທັງ ສປປ ລາວ. ພ້ອມທັງສະເໜີ ໃຫ້ ສ ເກົາຫລີ ສືບຕໍ່ສົ່ງເສີມ ແລະ ຮັດແໜ້ນການຮ່ວມມື ລະຫວ່າງ ສ ເກົາຫລີ ແລະ ປະເທດສະມາຊິກແມ່ນ້ຳຂອງໃນຕໍ່ໜ້າ.

KPL