*ແຂວງອຸດົມໄຊ ມີທ່າແຮງທາງດ້ານກະສິກຳ ໂດຍສະເພາະແມ່ນມີພື້ນທີ່ກວ້າງຂວາງ, ອຸດົມສົມບູນ, ດິນກໍເໝາະສົມກັບການປູກພຶດຫລາຍຊະນິດລວມທັງພືດລົ້ມລຸກ, ໄມ້ຢືນຕົ້ນ, ໄມ້ໃຫ້ໝາກຕ່າງໆ ແລະ ເໝາະສົມກັບການລ້ຽງສັດ; ຫລາຍເມືອງກໍມີທ່າແຮງແຕກຕ່າງກັນ ໂດຍສະເພາະເມືອງທີ່ມີທ່ົງພຽງຫລາຍກໍເໝາະສົມກັບການປູກພືດເປັນສິນຄ້າປະເພດພືດລົ້ມລຸກຫລາຍ, ບາງເມືອງທີ່ເປັນພູດອຍທີ່ກວມອັດຕາສ່ວນສູງແມ່ນປູກພືດທີ່ເປັນເຂດເນີນສູງຕາມທ່າແຮງ ແລະ ບວກກັບທ່າແຮງອີກອັນໜຶ່ງ ແຂວງອຸດົມໄຊ ມີຫລາຍຊົນເຜົ່າ ແຕ່ລະຊົນເຜົ່າກໍມີມູນເຊື້ອດຸໝັ່ນ ແລະ ປະສົບການບົດຮຽນໃນການປູກການລ້ຽງທີ່ແນ່ນອນພໍສົມຄວນ.

     ດັ່ງທີ່, ທ່ານ ພີມມະເສນ ຄຸນສີລິວົງ ຫົວໜ້າພະແນກກະສິກຳ ແລະ ປ່າໄມ້ແຂວງອຸດົມໄຊໄດ້ໃຫ້ຮູ້ວ່າ: ໃນລະດູແລ້ງ ປີ 2023-2024 ໄດ້ ສຸມໃສ່ການຜະລິດຫລາຍຢ່າງໂດຍສະເພາະກໍແມ່ນການປູກເຊິ່ງມີເນື້ອທີ່ 11.560 ເຮັກຕາ ທຽບໃສ່ ແຜນການປະຕິບັດໄດ້ 92% ຜົນຜະລິດສາມາດເກັບກູ້ໄດ້ 113.300 ໂຕນ ສະເລ່ຍໄດ້ປະມານ 9,5 ໂຕນ ຕໍ່ເຮັກຕາໃນນີ້ຫລັກໆກໍສຸມໃສ່ໃນ ການຜະລິດເຂົ້ານາແຊງ 280 ເຮັກຕາ ໃນ 6 ເມືອງ ຜົນຜະລິດໄດ້ 1.270 ໂຕນ ສະມັດຕະພາບສະເລ່ຍ 4,9 ໂຕນຕໍ່ເຮັກຕາ ພ້ອມກັນນັ້ນກໍ ໄດ້ມີການປູກພືດເປັນສິນຄ້າໃນລະ ດູແລ້ງ ມີເນື້ອທີ່ 7.190 ເຮັກຕາ ທຽບໃສ່ແຜນການປະຕິບັດໄດ້ 82% ໃນ 7 ເມືອງ ຜົນຜະລິດໄດ້ 91.780 ໂຕນສະມັດຕະພາບສະ ເລ່ຍ 12.76ໂຕນຕໍ່ເຮັກຕາ ໃນນີ້ການຜະລິດເປັນສິນຄ້າມີສາລີແຂງມີເນື້ອທີ່ 3.300 ກວ່າເຮັກຕາ ພືດຕະກູນທົ່ວເຊິ່ງມີຫລາຍຊະນິດເປັນຂະບວນທີ່ກວ້າງຂວາງ ມີເນື້ອທ່ີ 1.900 ກວ່າເຮັກຕາ ປູກພືດຜັກຊະນິດຕ່າງໆ 1.370 ເຮັກຕາ ຢາສູບປະມານ 500 ກວ່າເຮັກຕາ ແລະ ມີທຸລະກິດບໍລິສັດຜູ້ປະກອບການມາຊຸກຍູ້ສົ່ງເສີມປະຊາຊົນປູກພືດຊະນິດຕ່າງໆຈຳນວນ 21 ຫົວໜ່ວຍ.

    ໃນປັດຈຸບັນກຳລັງສຸມໃສ່ການຜະລິດລະດູຝົນ ມີເນ້ືອທ່ີປະມານ 84.150,75 ເຮັກຕາ ທຽບໃສ່ແຜນປີ 2023 ແມ່ນເພີ່ມຂຶ້ນ 4%, ຄາດຄະເນຜົນຜະລິດໄດ້ທັງໝົດ 911.192,64 ໂຕນ,  ສະມັດຕະພາບ 10.84 ໂຕນ/ຮຕ ໃນນີ້ການຜະ ລິດສະບຽງອາຫານເລັ່ງໃສ່ການ ປູກເຂົ້າທັງໝົດ 26.264,91 ເຮັກຕາ, ຄາດຄະເນສະມັດຕະພາບ 3,59 ໂຕນ/ຮຕ, ຄາດຄະເນຜົນຜະລິດໄດ້ທັງໝົດ 94.281,18 ໂຕນ ໃນນັ້ນມີເຂົ້ານາປີ ເນື້ອທີ່ 16.625 ເຮັກຕາ, ຄາດຄະເນສະມັດຕະພາບ 4,51 ໂຕ່ນ/ເຮັກຕາ, ຄາດຄະເນຜົນຜະລິດ75.001 ໂຕນ; ຮອດປັດຈຸບັນກະກຽມດິນສຳເລັດ 33%, ຕົກ ກ້າສຳເລັດ 35% ແລະ ປັກດຳສຳເລັດຈຳນວນໜຶ່ງ. ເຂົ້າໄຮ່ ເນື້ອທ່ີ 9.639 ເຮັກຕາ, ຄາດຄະເນສະມັດຕະພາບ 2 ໂຕ່ນ/ເຮັກຕາ, ຄາດຄະເນຜົນຜະລິດ 1.279 ກວ່າໂຕນ. ການປູກພືດສະບຽງລວມມີເນື້ອທີ່ທັງໝົດ 5.888 ກວ່າເຮັກຕາ, ຄາດຄະເນສະມັດຕະພາບ 10.33 ໂຕນ/ເຮັກຕາ, ຜົນຜະລິດໄດ້ 60.335 ກວ່າໂຕນ.

     ທ່ານ ພີມມະເສນ ຄຸນສີລິວົງ ໄດ້ໃຫ້ຮູ້ຕື່ມວ່າ: ໂດຍປະຕິບັດຕາມທິດນຳຂອງລັດຖະບານ ກໍຄືນິຕິກຳຂອງຂັ້ນເທິງ ໂດຍສະເພາະບັນຫາວິກິດການທາງດ້ານເສດຖະກິດ ແລະ ຄວາມຫຍຸ້ງຍາກຕ່າງໆ ໂດຍສະເພາະແມ່ນບັນຫາເງິນກີບອ່ອນ ຄ່າ, ການຜະລິດພາຍໃນບໍ່ພຽງພໍຈຳນວນໜຶ່ງ ສຳລັບແຂວງອຸດົມໄຊ ກໍໄດ້ແຕ່ງຕັ້ງຄະນະຮັບຜິດຊອບແກ້ໄຂບັນຫາເສດຖະກິດເຄັ່ງຮ້ອນ ໂດຍແມ່ນການນຳຂັ້ນແຂວງ ເປັນປະທານ ໂດຍເລ່ັງໃສ່ໃນການຜະລິດ ສຳລັບການຜະລິດສະບຽງອາ ຫານ ຫລື ພືດຜັກຕ່າງໆ ແລະ ໝາກໄມ້ ແຂວງອຸດົມໄຊ ແມ່ນພຽງພໍໂດຍພື້ນຖານ ເຊິ່ງພວກເຮົາສາມາດຜະລິດໄດ້ປະເພດພືດຜັກເປັນໃບ ແລະ ໄມ້ໃຫ້ຫມາກຈຳນວນໜຶ່ງ, ແຕ່ຍັງບໍ່ສາມາດມາດຜະລິດພືດຊະນິດ ເປັນຫົວໂດຍສະເພາະມັນຝຣັ່ງ, ຫົວກະລົດ, ຜັກກາດຫົວແຕ່ກຳລັງສຶກສາຄົ້ນຄວ້າ ແລະ ຍາດແຍ່ງນັກທຸລະກິດມາທົດລອງປູກ ຖ້າໄດ້ຮັບຜົນພວກເຮົາຈະໄດ້ຢຸດຕິການນຳເຂົ້າ.  ສຳລັບພືດຜັກຕ່າງໆແມ່ນພຽງພໍ ແລະ ສາມາດສົ່ງອອກຈຳນວນໜຶ່ງໄປແຂວງໄກ້ຄຽງ.

ໂດຍ: ຄຳພູສະຫວັນ ເພັນສະຫວັດ

KPL