ຂປລ
ຂປລ. ເມື່ອບໍ່ດົນມານີ້, ທ່ານ ແສງອາລຸນ ສຸລິຍະວົງ ຫົວໜ້າພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ(ນວ) ໄດ້ໃຫ້ສຳພາດເນື່ອງໃນໂອກາດ ວັນປ່ອຍປາ ແລະ ສັດນ້ຳແຫ່ງຊາດ 13 ກໍລະກົດ ນີ້ວ່າ: ພາຍຫລັງທີ່ ພັກ-ລັດຖະບານ ໄດ້ມີນະໂຍບາຍການອະນຸລັກ ສັດນໍ້າປະເພດຕ່າງໆ
ຂປລ. ເມື່ອບໍ່ດົນມານີ້, ທ່ານ ແສງອາລຸນ ສຸລິຍະວົງ ຫົວໜ້າພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ(ນວ) ໄດ້ໃຫ້ສຳພາດເນື່ອງໃນໂອກາດ ວັນປ່ອຍປາ ແລະ ສັດນ້ຳແຫ່ງຊາດ 13 ກໍລະກົດ ນີ້ວ່າ: ພາຍຫລັງທີ່ ພັກ-ລັດຖະບານ ໄດ້ມີນະໂຍບາຍການອະນຸລັກ ສັດນໍ້າປະເພດຕ່າງໆ ທີ່ໄດ້ລະບຸໃນກົດໝາຍ ວ່າດ້ວຍສັດນໍ້າ ແລະ ການປະມົງ, ໄດ້ມີດໍາລັດປະກາດໃຊ້ຢ່າງເປັນທາງການ, ນວ ກໍໄດ້ເອົາໃຈໃສ່ໃນວັນປ່ອຍປາ ແລະ ສັດນໍ້າແຫ່ງຊາດ ເຊິ່ງນັບແຕ່ປີ 1994 ຮອດປີ 2023 ຕົວເລກການ ປ່ອຍປາ ແລະ ສັດນໍ້າອື່ນໆ ບັນລຸເຖິງ 31 ລ້ານກວ່າໂຕ. ໃນນັ້ນ, ສັດນໍ້າຊະນິດອື່ນໆ 600 ກວ່າໂຕ.
ສະເພາະປີ 2024 ທົ່ວ ນວ ຄາດວ່າຈະປ່ອຍປາ ແລະ ສັດນໍ້າອື່ນໆໃຫ້ໄດ້ປະມານ 9 ລ້ານກວ່າໂຕ ຢູ່ໃນ 9 ຕົວເມືອງໃຫ້ໄດ້ປະມານ 5 ແສນກວ່າໂຕ ແລະ ປ່ອຍຕາມຊຸມຊົນຕ່າງໆ 8 ລ້ານກວ່າໂຕ. ສະເພາະ ວັນປ່ອຍປາ ແລະ ສັດນໍ້າແຫ່ງຊາດ 13 ກໍລະກົດ 2024 ນີ້, ນວ ຈະຈັດຂຶ້ນຢູ່ບ້ານຮ່ອງສຸ ພາບ ເມືອງໄຊເສດຖາ ຈະປ່ອຍປາ 400.000 ໂຕ ໂດຍເນັ້ນໃສ່ແນວພັນປາພື້ນ ເມືອງເຊັ່ນ: ປາປາກ, ປາເໝັ້ນ, ປາເຄິງ, ປາສະຫລິດ, ປາເຂັງ, ປາກົດ ແລະ ປາເພັຍ ຖ້າທຽບໃສ່ປີ 2023 ເພີ່ມຂຶ້ນ 80.000 ໂຕ.
ໂອກາດນີ້, ທ່ານ ແສງອາລຸນ ສຸລິຍະວົງ ກໍໄດ້ຮຽກຮ້ອງມາຍັງ ພະນັກງານ-ລັດຖະກອນ ທະຫານ, ຕໍາຫລວດ, ນັກທຸລະກິດ, ຊາວຄ້າຂາຍ, ພໍ່-ແມ່ປະຊາຊົນ ກໍຄື ຊາວ ນວ ຈົ່ງພ້ອມກັນປະຕິບັດ ກົດໝາຍວ່າດ້ວຍສັດນໍ້າ ແລະ ການປະມົງ ໃຫ້ປະກົດຜົນເປັນຈິງ, ຈົ່ງພ້ອມກັນປະກອບສ່ວນ ເຂົ້າໃນການປ່ອຍປາໃນວັນປ່ອຍປາ ແລະ ສັດນໍ້າແຫ່ງຊາດ 13 ກໍລະກົດ ເກີດດອກອອກຜົນຕາມແຜນການທີ່ວາງໄວ້ ພ້ອມກັນນັ້ນ, ຈົ່ງພ້ອມກັນເຊີດຊູສະຕິ ໃນການຄຸ້ມຄອງ, ກວດກາ, ອະນຸລັກ, ປົກປັກຮັກສາ ພັດທະນາ, ນໍາໃຊ້ປາ ແລະ ສັດນໍ້າແບບຍືນຍົງ ແນໃສ່ຮັບປະກັນຄວາມອຸດົມສົມບູນຂອງລະບົບນິເວດທຳມະຊາດ, ເປັນທ່າແຮງໃນການພັດທະນາ ເສດຖະກິດ-ສັງຄົມແຫ່ງຊາດ ໂດຍບໍ່ໃຫ້ມີຜົນກະທົບຕໍ່ທຳ ມະຊາດ, ຖິ່ນທີ່ຢູ່ອາໄສ, ຈໍາກັດການຫລຸດລົງ, ການສູນພັນຂອງປາ ແລະ ສັດນໍ້າ.
ຂໍ້ມູນ: ວຽງຈັນທຸລະກິດສັງຄົມ
KPL
