ຂປລ
ທີມງານສື່ສານ ປະຈຳສະພາ ຝ່າຍບໍລິຫານ ແຫ່ງລັດ ຂອງ ມຽນມາ ລາຍງານວ່າ: ເຈົ້າໜ້າທີ່ກ່ຽວຂ້ອງ ໄດ້ເຜົາທຳລາຍ ຢາເສບຕິດ ແລະ ສານເຄມີຕັ້ງຕົ້ນ ທີ່ ຢຶດມາໄດ້ ໃນເມືອງ ຢາງກຸ້ງ, ມັນທະເລີຍ, ຕອງຈີ ແລະ ຫລາຍກວ່າ 20 ເມືອງ ໂດຍມີ ຈຳນວນ 77 ປະເພດ
ຂປລ. ສຳນັກຂ່າວ ຊິນຮວາ ຂອງ ສປຈີນ, ເມື່ອບໍ່ດົນມານີ້, ທີມງານສື່ສານ ປະຈຳສະພາ ຝ່າຍບໍລິຫານ ແຫ່ງລັດ ຂອງ ມຽນມາ ລາຍງານວ່າ: ເຈົ້າໜ້າທີ່ກ່ຽວຂ້ອງ ໄດ້ເຜົາທຳລາຍ ຢາເສບຕິດ ແລະ ສານເຄມີຕັ້ງຕົ້ນ ທີ່ ຢຶດມາໄດ້ ໃນເມືອງ ຢາງກຸ້ງ, ມັນທະເລີຍ, ຕອງຈີ ແລະ ຫລາຍກວ່າ 20 ເມືອງ ໂດຍມີ ຈຳນວນ 77 ປະເພດ , ເນື່ອງໃນ ໂອກາດ ວັນຕໍ່ຕ້ານ ຢາເສບຕິດໂລກ ຊຶ່ງກົງກັບ ວັນທີ 26 ມິຖຸນາ ຂອງທຸກປີ. ຢາເສບຕິດ ດັ່ງກ່າວ ລວມມີ ຢາຝິ່ນ ຈຳນວນ 1.366 ກິໂລກຣາມ, ເຮໂຣອິນ 2.178 ກິໂລກຣາມ, ຢາກະຕຸ້ນ ປະສາດ 239 ລ້ານເມັດ, ຢາໄອ 23.393 ກິໂລກຣາມ, ກະທ່ອມຜົງ 1.775 ກິໂລກຣາມ, ກັນຊາ 1.257 ກິໂລກຣາມ, ຢາເຄ 4.165 ກິໂລກຣາມ ແລະ ຝິ່ນຜົງ ສີນໍ້າຕານ 12 ກິໂລກຣາມ.
ໃນຂະນະທີ່ ມຽນມາ ຜະເຊີນກັບ ຄວາມທ້າທາຍ ໃນການປູກຝິ່ນ, ການຜະລິດ ຢາເສບຕິດ ສັງເຄາະ ແລະການໃຊ້ຢາເສບຕິດ. ສະນັ້ນ ມຽນມາ ໄດ້ຈັດຕັ້ງ ຄະນະກຳມະການກາງ ເພື່ອຄວບຄຸມການໃຊ້ ຢາເສບຕິດ ຂຶ້ນມາ ເພື່ອແກ້ໄຂ ບັນຫາ ແລະ ຮ່ວມຕໍ່ສູ້ກັບ ກິດຈະກຳ ຕໍ່ຕ້ານຢາເສບຕິດ ກັບປະເທດ ເພື່ອນບ້ານ ຢ່າງເຂັ້ງແຂງ. /.
KPL
