ຂປລ
ຂປລ. ອົງການໄອຍະການປະຊາຊົນສູງສຸດ ຈັດກອງປະຊຸມຄະນະກໍາມະການ ອະໄພຍະໂທດ ລະດັບຊາດ ເພື່ອຮັບຟັງການລາຍງານ ການກະກຽມເນື້ອໃນ ແລະ ຄວາມພ້ອມດ້ານຕ່າງໆ ໃນການປັບ ປຸງລັດຖະບັນຍັດ ວ່າດ້ວຍການໃຫ້ອະໄພຍະໂທດ ສະບັບປີ 2018 ໃນວັນທີ 13 ມິຖຸນາ 2024
ຂປລ. ອົງການໄອຍະການປະຊາຊົນສູງສຸດ ຈັດກອງປະຊຸມຄະນະກໍາມະການ ອະໄພຍະໂທດ ລະດັບຊາດ ເພື່ອຮັບຟັງການລາຍງານ ການກະກຽມເນື້ອໃນ ແລະ ຄວາມພ້ອມດ້ານຕ່າງໆ ໃນການປັບ ປຸງລັດຖະບັນຍັດ ວ່າດ້ວຍການໃຫ້ອະໄພຍະໂທດ ສະບັບປີ 2018 ໃນວັນທີ 13 ມິຖຸນາ 2024 ໂດຍການເປັນປະທານຂອງ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ, ຮອງປະທານຄະນະກຳມະການ ອະໄພຍະໂທດລະດັບຊາດ, ມີ ທ່ານ ນາງ ເຂັມມະນີ ພົນເສນາ ລັດຖະ ມົນຕີ, ຫົວໜ້າຫ້ອງວ່າການປະທານປະເທດ, ຮອງປະທານຄະນະກຳມະການອະໄພຍະໂທດລະດັບຊາດ, ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
ກອງປະຊຸມຄັ້ງນີ້, ຄະນະກໍາມະການອະໄພຍະໂທດ ລະດັບຊາດ ໄດ້ປຶກສາຫລາລື ແລະ ປ່ຽນຄຳຄິດຄຳເຫັນ ເພື່ອກຽມເນື້ອໃນ ແລະ ຄວາມພ້ອມດ້ານຕ່າງໆ ໃນການປັບປຸງລັດຖະບັນຍັດ ວ່າດ້ວຍການໃຫ້ ອະໄພຍະໂທດ ສະບັບປີ 2018 ແລະ ໄດ້ມອບຄວາມຮັບຜິດຊອບໃຫ້ ບັນດາທ່ານໃນຄະນະກໍາມະການ ອະໄພຍະໂທດ ລະດັບຊາດ ໃນການນໍາພາ-ຊີ້ນໍາ ການລົງເຜີຍແຜ່ ລັດຖະບັນຍັດ ວ່າດ້ວຍການໃຫ້ ອະໄພຍະໂທດ ແລະ ໄດ້ຮັບຟັງການປະກອບຄໍາເຫັນ ຂອງຄະນະກໍາມະການອະໄພຍະໂທດ ຂັ້ນທ້ອງຖິ່ນ ໃນການປັບປຸງລັດຖະບັນຍັດ ວ່າດ້ວຍການໃຫ້ອະໄພຍະໂທດ ເພື່ອໃຫ້ສອດຄ່ອງໃນການ ຈັດຕັ້ງປະຕິບັດ ຕົວຈິງ.
ໂອກາດນີ້, ທ່ານ ໄຊຊະນະ ໂຄດພູທອນ ໄດ້ຮຽກຮ້ອງໃຫ້ສືບຕໍ່ຍົກສູງຄວາມຮັບຜິດຊອບ ໃຫ້ກອງເລຂາກະກຽມເນື້ອໃນ, ງົບປະມານ ແລະ ຄວາມພ້ອມດ້ານຕ່າງໆ ເພື່ອສ້າງເງື່ອນໄຂໃຫ້ ບັນດາທ່ານທີ່ໄດ້ຮັບ ມອບໝາຍ ໄດ້ລົງເຄື່ອນໄຫວສໍາເລັດ ຕາມແຜນການທີ່ວາງໄວ້ ແລະ ໃຫ້ກອງເລຂາ ຊ່ວຍວຽກເອົາໃຈໃສ່ໃນຕິດຕາມ, ສັງຮວມ ເອົາການປະກອບຄໍາຄິດຄໍາເຫັນ ຂອງບັນດາທ່ານທີ່ເຂົ້າຮ່ວມກອງ ປະຊຸມໃນຄັ້ງນີ້, ເພື່ອມາສະຫລຸບ ແລະ ລາຍງານ ຕໍ່ຄະນະຊີ້ນໍາລວມ.
ພາບ: ຂັນໄຊ
KPL