*ຄອບຄົວ ທ່ານ ນາງ ສົມສະໄໝ ບົວສະຫວັນ ປະຊາຊົນບ້ານແສນຊຸມ ເມືອງໂພນໂຮງ ແຂວງວຽງຈັນ ແມ່ນຄອບຄົວໜຶ່ງທີ່ປະກອບອາຊີບເຮັດນາ ແລະ ລ້ຽງສັດ, ມາຮອດປີ 2019 ໄດ້ເລີ່ມເຮັດນາບົວ (ປູກໝາກບົວ) ດ້ວຍເນື້ອ 3 ເຮັກຕາ ເຊິ່ງການປູກນາບົວ, ເຮັດນາ, ລ້ຽງສັດຜົນຜະລິດບາງປີກໍຫລາຍ, ບາງປີພົບບັນຫາບ້ົງທໍາລາຍຝັກບົວ, ເຂົ້ານາເປັນພະຍາດເພ້ຍແດງ ເຮັດໃຫ້ຜົນຜະລິດກໍໜ້ອຍລົງ ເຊິ່ງວິທີການແກ້ໄຂແມ່ນເຮັດຕາມການແນະນຳຂອງຊາວບ້ານ ໂດຍໃຊ້ຢາເຄມກໍາຈັດບົ້ງ ແລະ ເພ້ຍແດງ, ການຜະລິດກະສິກຳ ໄລຍະຜ່ານມາແມ່ນເຮັດຕາມມີຕາມເກີດບໍ່ມີການແປງຮູບ (ຂາຍສົດ) ສະເລ່ຍລາຍຮັບປະມານ 90-100 ລ້ານກີບຕໍ່ປີ.

    ທ່ານ ນາງ ສົມສະໄໝ ບົວສະຫວັນ ໄດ້ໃຫ້ສຳພາດຕໍ່ນັກຂ່າວສໍານັກຂ່າວສານປະເທດລາວ ເມື່ອບໍ່ດົນນ້ີວ່າ: ພາຍຫລັງທ່ີໄດ້ເຂ້ົາຮ່ວມໂຄງການປາກາ ໃນປີ 2021 ທີມງານວິຊາການຂອງໂຄງການກໍໄດ້ລົງມາໃຫ້ຄຳປຶກສາ, ແນະນຳກ່ຽວກັບວິທີປູກນາບົວ, ລ້ຽງປາ, ລ້ຽງກຸງ ແລະ ເຮັດນາ ເຊ່ິງເຮັດໃຫ້ຄອບຄົວມີການປ່ຽນແປງ, ປັບປ່ຽນວິທີການຜະລິດ ໂດຍຫັນເປັນການຜະລິດກະສິກຳສະອາດ ໂດຍໂຄງການໄດ້ສ້າງຄວາມຮູ້, ຄວາມເຂົ້າໃຈກ່ຽວກັບທັກສະການຜະລິດ, ການປ້ອງກັນພືດແບບປະສົມປະສານ, ການເຮັດຝຸ່ນບົ່ມ ເຮັດໃຫ້ຜົນຜະລິດມີຄຸນນະພາບ ແລະ ຈຳນວນຜົນຜະລິດກໍເພີ່ມຂຶ້ນ.

   ມາຮອດປັດຈຸບັນ, ຕົນເອງ ແລະ ຄອບຄົວໄດ້ຂະຫຍາຍ ເນ້ືອທີ່ປູກນາບົວເພີ່ມຂຶ້ນເປັນ 5 ເຮັກຕາ. ນອກຈາກນີ້, ໂຄງການດັ່ງກ່າວ, ຍັງໄດ້ສະໜັບສະໜູນທຶນ ແລະ ອຸປະກອນຈຳນວນໜຶ່ງເພື່ອສົ່ງເສີມໃຫ້ຜະລິດຊາບົວ ໂດຍນຳເອົາເກສອນດອກບົວ, ຟັກບົວ, ບີບົວ, ດອກບົວ, ໃບບົວ ແລະ ກ້ານບົວມາຜະລິດເປັນຊາ ເຊິ່ງຊາບົວພຸດທະຜະລິດຕະພັນກຸ່ມນາບົວ ບ້ານແຊນສຸມ ເມືອງໂພນໂຮງ ແຂວງວຽງຈັນ ມີວາງຈຳໜ່າຍແລ້ວ ຢູ່ພາຍໃນເມືອງ. ປັດຈຸບັນ, ຕົນເອງ ແລະ ຄອບຄົວມີລາຍຮັບຈາກການຂາຍໝາກບົວ, ຂາຍປາ, ຂາຍກຸ້ງ ແລະ ຂາຍຊາບົວສະ ເລ່ຍລາຍໄດ້ປະມານ 250 ລ້ານກີບ/ ປີ. ຄາດວ່າໃນອະນາຄົດຈະຂະຫຍາຍເນື້ອທີ່ປູກບົວ ໃຫ້ໄດ້ 6 ເຮັກຕາ ແລະ ຈະຂະຫຍາຍການຜະລິດຊາບົວ ໃຫ້ໄດ້ 10.000-20.000 ຖົງຕໍ່ລະດູການ.

   ໃນໂອກາດນີ້, ທ່ານ ນາງ ສົມສະໄໝ ບົວສະຫວັນ ໄດ້ສະແດງຄວາມຂອບໃຈທີ່ມີໂຄງການປາກາ ແລະ ວິຊາການກະສິກໍາຂັ້ນເມືອງ, ຂັ້ນແຂວງລົງມາຊຸກຍູ້ສົ່ງເສີມ ແລະ ໃຫ້ຄຳແນະນຳຕ່າງໆ ເຊິ່ງເຮັດໃຫ້ກຸ່ມຜະລິດນາບົວ ໄດ້ຮັບຜົນປະໂຫຍດຫລາຍຢ່າງ, ເຮັດໃຫ້ຜົນຜະລິດມີຄຸນນະພາບທາງດ້ານປະລິມານ ແລະ ຄຸນນະພາບສາມາດສ້າງລາຍຮັບ ປະກອບສ່ວນເຂ້ົາໃນການແກ້ໄຂຊີວິດການເປັນຂອງປະຊາຊົນໃຫ້ດີຂຶ້ນ.

ບົດໂດຍ: ກິດຕາ

KPL