ຂປລ. ລັດວິສາຫະກິດໄຟຟ້າ ສາຂານະຄອນຫລວງ 2 ໄດ້ໃຫ້ຮູ້ວ່າ: ສາເຫດເກີດມີບັນຫາການຊົມໃຊ້ໄຟ ຟ້າບໍ່ພຽງພໍ, ໄຟຕົກ ແລະ ໄຟມອດ ເນື່ອງຈາກປັດຈຸບັນ, ສັງຄົມມີການຂະຫຍາຍຕົວສູງ ເຮັດໃຫ້ຈໍານວນຄົວເຮືອນ ຂະຫຍາຍເພີ່ມຂຶ້ນຢ່າງໄວວາ ເຮັດໃຫ້ການຊົມໃຊ້ ໄຟຟ້າສູງຂຶ້ນແບບກ້າວກະໂດດ ຈຶ່ງພາໃຫ້ເກີດບັນຫາດັ່ງກ່າວ.

ວັນທີ 13 ພຶດສະພານີ້ 2024 ຜ່ານມາ, ທ່ານ ເພັດສະໝອນ ວັນທາ ຫົວໜ້າລັດວິສາຫະກິດໄຟຟ້າລາວ ສາຂານະຄອນຫລວງ 2 ໄດ້ຊີ້ແຈງຜ່ານສື່ມວນຊົນ ວ່າ: ຕໍ່ບັນຫາດັ່ງກ່າວ, ລັດວິສາຫະກິດໄຟຟ້າ ສາຂານະຄອນ ຫລວງ 2 ມີແຜນການເຄື່ອນໄຫວສ້ອມແປງ, ປ່ຽນຖ່າຍ ແລະ ເສີມບັນດາອຸປະກອນຕ່າງໆ ຂອງລະບົບຈຳໜ່າຍ ໂດຍປະຕິບັດຕາມລຳດັບ ຂອງການສະເໜີ ທີ່ສະເໜີເຂົ້າມາຂອງອົງການປົກຄອງບ້ານຕ່າງໆ ແຕ່ກະຍັງບໍ່ທັນທົ່ວເຖິງເນື່ອງ ຈາກງົບປະມານຂອງໄຟຟ້າລາວມີຈຳກັດ.

ມາຮອດປັດຈຸບັນ ໄຟຟ້າລາວ ສາມາດສະໜອງໄຟຟ້າຮັບໃຊ້ພຽງພໍ, ແຕ່ຍ້ອນການຊົມໃຊ້ພະລັງງານ ໄຟຟ້າບາງຈຸດທີ່ຍັງຜິດປົກກະຕິ ຈຶ່ງເກີດມີສະພາບໄຟຟ້າບໍ່ພຽງພໍບາງເຂດນັ້ນ, ເກີດຈາກການການນຳໃຊ້ພະລັງງານໄຟຟ້າບັນທຸກໂຫລດໝໍ້ແປງເກີນ ບໍ່ສາມາດຈ່າຍ ໄຟໄດ້ພຽງພໍ ເນື່ອງຈາກອາກາດຮ້ອນອົບເອົ້າ, ການຊົມໃຊ້ໄຟຟ້າເພີ່ມຂຶ້ນຢ່າງກ້າວກະໂດດ, ທາງໄຟຟ້າລາວບໍ່ສາມາດແກ້ໄຂ ປັບປຸງໄດ້ຢ່າງທັນການ ເຊິ່ງເປັນເຫດພາວະວິໄສ ທີ່ບໍ່ສາມາດຫລີກລ່ຽງໄດ້ ເມື່ອມີການຊົມໃຊ້ໄຟ ຫລາຍກໍເຮັດໃຫ້ອຸປະກອນ ພາກສາຍສົ່ງ ແລະ ພາກຈຳໜ່າຍເກີດຄວາມເສຍຫາຍ ແລະ ເກີດອຸບັດເຫດໄຟຟ້າ ເຊັ່ນ: ໝໍ້ແປງໄໝ້ ຫລື ເປເພ່ ສາຍໄຟເປື່ອຍເກີດຊ໋ອດລັດວົງຈອນ ແລະ ອື່ນໆ ເນື່ອງຈາກບັນທຸກໂຫລດການຊົມໃຊ້ ເກີນຂອບເຂດຄວາມສາມາດຮັບໄດ້ ຂອງອຸປະກອນພາກຈຳໜ່າຍ. ອີງຕາມການສະເໜີ ຂອງລູກຄ້າພາຍໃນ ນະຄອນຫລວງວຽງຈັນ ເຫັນວ່າການສະໜອງໄຟ ບໍ່ພຽງພໍມີທັງໜົດ 110 ຈຸດ ສະ ເພາະເຂດຮັບຜິດຊອບຂອງໄຟຟ້າລາວ ສາຂານະຄອນຫລວງ 2 ມີ 68 ຈຸດ.

ທ່ານ ເພັດສະໝອນ ວັນທາ ຍັງກ່າວອີກວ່າ: ຢ່າງໃດກໍຕາມ, ຂໍຝາກເຕືອນມາຍັງພໍ່ແມ່ປະຊາຊົນ ກໍຄື ຜູ້ຊົມໃຊ້ໄຟຟ້າ ຈົ່ງມີສະຕິໃນການຊົມໃຊ້ໄຟຟ້າ, ໃຫ້ໝັ່ນກວດກາ ແລະ ປ່ຽນຖ່າຍເຄື່ອງໃຊ້ໄຟຟ້າ, ສາຍໄຟທີ່ເກົ່າແກ່ ຫລື ໃຊ້ມາດົນແລ້ວອອກ ພ້ອມຊົມໃຊ້ ພະລັງງານໄຟຟ້າແຕ່ສະເພາະສິ່ງທີ່ຈຳເປັນ ເພື່ອເປັນການຊ່ວຍກັນຫລຸດຜ່ອນການໂຫລດພະລັງງານໄຟຟ້າ. ພ້ອມນີ້, ຖ້າຫາກຜູ້ຊົມໃຊ້ໄຟຟ້າ ຫາກພົບເຫັນອຸບັດເຫດດ້ານໄຟຟ້າ ສາມາດແຈ້ງສາຍດ່ວນໄຟຟ້າລາວ ໝາຍເລກ 1199 ຕະຫລອດ 24 ຊົ່ວໂມງ ຫລື ສູນບໍລິການໄຟຟ້າໃກ້ບ້ານ ເພື່ອຄວາມປອດໄພທາງດ້ານຊີວິດ ແລະ ຊັບສິນຂອງທ່ານ.

ສໍາລັບລັດວິສາຫະກິດໄຟຟ້າລາວ ສາຂານະຄອນຫລວງ 2  ຮັບຜິດຊອບ 5 ເມືອງນອກຂອງນະຄອນ ຫລວງວຽງຈັນ ຄື: ເມືອງໄຊທານີ, ຫາດຊາຍຟອງ, ນາຊາຍທອງ, ສັງທອງ ແລະ ເມືອງປາກງື່ມ, ມີຈຳນວນບ້ານທີ່ຄຸ້ມຄອງ ທັງໝົດ 322 ບ້ານ, ມີລະບົບຈຳໜ່າຍ ທັງໝົດ 10 ສະຖານີ ຄື: ສະຖານີທ່າສະຫວ່າງ, ສະຖານີວຽງແກ້ວ, ສະຖານີໂຄກສະອາດ, ສະຖານີດົງໂພສີ, ສະຖານີທ່ານາແລ້ງ, ສະຖານີນາໄຫ, ສະຖານີວີຕ້າປາກ, ສະຖານີນາຊາຍທອງ, ສະຖານີເພຍລາດ ແລະ ສະຖານີນາບົງ.

ຂໍ້ມູນ: ວິທະຍຸກະຈາຍສຽງແຫ່ງຊາດ

ຂ່າວ: ສົມຫວັງ

KPL