ຂປລ. ໃນວັນທີ 14 ກຸມພາ 2024 ນີ້, ໂຮງຮຽນວັດທະນະທຳຊົນເຜົ່າກອງທັບ ຈັດພິທີປິດຂະບວນການ ແຂ່ງຂັນກິລາ ເພື່ອຂໍ່ານັບຮັບຕ້ອນວັນສ້າງຕັ້ງ ກອງທັບປະຊາຊົນລາວ ຄົບຮອບ 75 ປີ ໂດຍການເປັນປະທານຂອງ ສະຫາຍ ພັນເອກ ເພັດສະໝອນ ວິລະວອນ ຫົວໜ້າການທະຫານ ໂຮງຮຽນວັດທະນະທຳຊົນເຜົ່າກອງທັບ, ມີຄະນະຫ້ອງ 4 ຫ້ອງ, 2 ກອງພັນນັກຮຽນ ພ້ອມດ້ວຍນັກກິລາເຂົ້າຮ່ວມ.

ສະຫາຍ ພັນຕີ ຄຳຫລາ ສີວົງສາ ຫົວໜ້າພະແນກຄູພາລະສຶກສາ ໄດ້ຜ່ານບົດສະຫລຸບຜົນການແຂ່ງຂັນ ເຊິ່ງໄດ້ດຳເນີນມາແຕ່ວັນທີ 17-25 ມັງກອນ 2024 ເປັນເວລາ 5 ວັນ ເຊິ່ງເຫັນໄດ້ວ່າ: ການຈັດການແຂ່ງຂັນ ແມ່ນ ໄດ້ສ້າງບັນຍາກາດອັນຟົດພື້ນມ່ວນຊື່ນ ກວ້າງຂວາງ, ສ້າງໄດ້ຄວາມສາມັກຄີມິດຕະພາບ ແລະ ປອດໄພ, ສະແດງ ເຖິງຄວາມສາມັກຄີລະຫວ່າງ ຄະນະອຳນວຍການໂຮງຮຽນ, ບັນດາຫ້ອງກອງພັນ ແລະ ອົງການຈັດຕັ້ງຊາວໜຸ່ມ-ແມ່ຍິງ, ສະແດງເຖິງຄວາມເປັນເຈົ້າການ, ຄວາມຮັບຜິດຊອບອັນສູງສົ່ງຂອງກອງເລຂາ, ຄະນະກຳມະການເຕັກນິກ-ຈັດການແຂ່ງຂັນ, ກຳມະການຕັດສິນ ແລະ ພາກສະໜາມ ທີ່ໄດ້ມີຄວາມຕັ້ງໃຈ, ເອົາໃຈໃສ່, ເສຍສະຫລະ ແລະ ທຸ່ມເທສະຕິປັນຍາ, ແຮງກາຍ-ແຮງໃຈ ໃນການປະກອບສ່ວນ ແລະ ເຂົ້າຮ່ວມຂະບວນການໃນຄັ້ງນີ້ຢ່າງຕັ້ງໜ້າ. ກິລາທີ່ນຳມາແຂ່ງຂັນໃນຄັ້ງນີ້ມີ 2 ປະເພດກິລາຄື: ບານສົ່ງຊາຍ-ຍິງ ແລະ ເປຕັງຊາຍ-ຍິງ. ໃນນັ້ນ, ບານສົ່ງຊາຍ 6 ທີມ, ບານສົ່ງຍິງ 6 ທີມ, ເປຕັງຊາຍ 6 ທີມ ແລະ ເປຕັງຍິງ 6 ທີມ.

ຜ່ານການແຂ່ງຂັນ ປະເພດກິລາບານສົ່ງຊາຍ ທີ 1 ແມ່ນທີມ ຫ້ອງສຶກສາ ໄດ້ຮັບເງິນລາງວັນ 1.000.000 ກີບ ພ້ອມຂັນ 1 ໜ່ວຍ, ທີ 2 ແມ່ນທີມ ຫ້ອງພະລາທິການ-ເຕັກນິກ ໄດ້ຮັບເງິນລາງວັນ 800.000 ກີບ, ທີ3 ເງິນລາງວັນ 500.000 ກີບ ແມ່ນທີມ ຫ້ອງການເມືອງ; ປະເພດກິລາບານສົ່ງຍິງ ທີ 1 ແມ່ນທີມ ຫ້ອງສຶກສາ ໄດ້ຮັບເງິນລາງວັນ 1.000.000 ກີບ ພ້ອມຂັນ 1 ໜ່ວຍ, ທີ 2 ແມ່ນທີມ ຫ້ອງການເມືອງ ໄດ້ຮັບເງິນລາງວັນ 800.000 ກີບ ແລະ ທີ 3 ແມ່ນທີມ ຫ້ອງພະລາທິການ-ເຕັກນິກ ໄດ້ຮັບເງິນລາງວັນ 500.000 ກີບ. ສ່ວນປະເພດກິລາເປຕັງຊາຍ ທີ 1 ແມ່ນທີມ ຫ້ອງການເມືອງ ໄດ້ຮັບເງິນລາງວັນ 700.000 ກີບ ພ້ອມຂັນ 1 ໜ່ວຍ, ທີ 2 ແມ່ນທີມ ກອງພັນທີ 1 ໄດ້ຮັບເງິນລາງວັນ 500.000 ກີບ ແລະ ທີ 3 ແມ່ນທີມ ຫ້ອງພະລາທິການ-ເຕັກນິກ ໄດ້ຮັບເງິນລາງວັນ 300.000 ກີບ ແລະ ປະເພດກິລາເປຕັງຍິງ ທີ 1 ແມ່ນທີມ ຫ້ອງພະລາທິການ-ເຕັກນິກ ໄດ້ຮັບເງິນລາງວັນ 700.000 ກີບ ພ້ອມຂັນ 1 ໜ່ວຍ, ທີ 2 ແມ່ນທີມ ຫ້ອງສຶກສາ ໄດ້ຮັບເງິນລາງວັນ 500.000 ກີບ ແລະ ທີ 3 ແມ່ນທີມ ຫ້ອງການເມືອງ ໄດ້ຮັບເງິນລາງວັນ 300.000 ກີບ.

ໃນໂອກາດດັ່ງກ່າວ, ສະຫາຍ ພັນເອກ ເພັດສະໝອນ ວິລະວອນ ໄດ້ສະແດງຄວາມຍ້ອງຍໍຊົມເຊີຍຜົນງານ ແລະ ໄຊຊະນະ ທີ່ບັນດາສະຫາຍຍາດມາໄດ້ນັ້ນ. ຂະບວນການແຂ່ງຂັນກິລາໃນຄັ້ງນີ້ ສະແດງເຖິງຄວາມຮັບຜິດ ຊອບຂອງນັກກິລາ ເຊິ່ງສະແດງອອກເຖິງຄວາມອົດທົນ, ສຸມເຫື່ອແຮງສະຕິປັນຍາ ແລະ ພິກໄຫວຂອງແຕ່ລະສະ ຫາຍ, ໃນການແຂ່ງຂັນກິລາ ມີຊະນະ, ມີເສຍ ແລະ ຈົ່ງພ້ອມກັນຮັກສາຄວາມສາມັກຄີ ມິດຕະພາບໄວ້ໃຫ້ໝັ້ນຄົງ.

ຂ່າວ-ພາບ: ໂອລິນ ມິ່ງມີໄຊ

KPL