ປະກາດ ໂຮງຮຽນ ພົມສຸວັນ ແລະ ໂຮງຮຽນ ລາວ-ເກົາຫລີ ເປັນໂຮງຮຽນປອດສິ່ງເສບຕິດ

26/12/2023 14:55
Email Print 4408
ຂປລ ຂປລ. ພິທີປະກາດ ໂຮງຮຽນອານຸບານ, ປະຖົມ ແລະ ມັດທະຍົມຕົ້ນ ພົມສຸວັນ ແລະ ໂຮງ ຮຽນ ມັດຖະຍົມສົມບູນລາວ-ເກົາຫລີ ເປັນໂຮງຮຽນປອດສິ່ງເສບຕິດ, ພ້ອມທັງເປີດປ້າຍປອດສິ່ງເສບຕິດ ຈັດຂຶ້ນໃນວັນທີ 26 ຕຸລາ 2023 ຢູ່ໂຮງຮຽນອານຸບານ ແລະ ປະຖົມສົມບູນ ພົມສຸວັນ ບ້ານໂນນແກ້ວ ເມືອງສີໂຄດຕະບອງ ນະຄອນຫລວງວຽງຈັນ



ຂປລ. ພິທີປະກາດ ໂຮງຮຽນອານຸບານ
, ປະຖົມ ແລະ ມັດທະຍົມຕົ້ນ ພົມສຸວັນ ແລະ ໂຮງ ຮຽນ ມັດຖະຍົມສົມບູນລາວ-ເກົາຫລີ ເປັນໂຮງຮຽນປອດສິ່ງເສບຕິດ, ພ້ອມທັງເປີດປ້າຍປອດສິ່ງເສບຕິດ ຈັດຂຶ້ນໃນວັນທີ 26 ຕຸລາ 2023 ຢູ່ໂຮງຮຽນອານຸບານ ແລະ ປະຖົມສົມບູນ ພົມສຸວັນ ບ້ານໂນນແກ້ວ ເມືອງສີໂຄດຕະບອງ ນະຄອນຫລວງວຽງຈັນ ໂດຍມີ ທ່ານ  ສີທົນ ດາວພະສິດ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫລວງວຽງຈັນ, ມີຄູ-ອາຈານ, ນ້ອງນັກຮຽນ ແລະ ພາກສ່ວນກ່ຽວຂ້ອງເຂົ້າຮ່ວມ.

 
ທ່ານ ນາງ ນາລີທອງ ຈັນທະບູລີ ຜູ້ອໍານວຍການໂຮງຮຽນພົມສຸວັນ ໄດ້ໃຫ້ຮູ້ວ່າ: ໂຮງຮຽນ ພົມສຸວັນ ສ້າງຂື້ນເມື່ອປີ
2016 ຕັ້ງຢູ່ບ້ານໂນນແກ້ວ ເມືອງສີໂຄດຕະບອງ ນະຄອນຫລວງວຽງຈັນ, ເປັນໂຮງຮຽນເອກະຊົນ, ມີອາຄານຮຽນ 2 ຫລັງ, ມີຫ້ອງຮຽນທັງໝົດ 25 ຫ້ອງ. ໃນນັ້ນ, ມີຫ້ອງຮຽນອະນຸບານ 5 ຫ້ອງ, ປະຖົມ 6 ຫ້ອງ ແລະ ມັດທະຍົມ 2 ຫ້ອງ, ມີພະນັກງານຄູ-ອາຈານ ທັງໝົດ 21 ທ່ານ, ຍິງ 18 ທ່ານ, ມີນັກຮຽນທັງໝົດ 270 ນ້ອງ, ຍິງ 133 ນ້ອງ, ນັກຮຽນຊັ້ນອະນຸບານ 145 ນ້ອງ, ຍິງ 79 ນ້ອງ, ຊັ້ນປະຖົມມີທັງໝົດ 109 ນ້ອງ, ຍິງ 50ນ້ອງ ແລະ ຊັ້ນມັດທະຍົມ 16 ນ້ອງ, ຍິງ 4 ນ້ອງ. ສໍາລັບ ການເຄື່ອນໄຫວກິດຈະກໍາຕ່າງໆ ໃນໂຮງຮຽນ ແລະ ນອກໂຮງຮຽນ ​ແມ່ນໄດ້ແຕ່ງຕັ້ງຄະນະຮັບຜິດຊອບ ແລະ ເຄື່ອນໄຫວກິດຈະກຳ ສະກັດກັ້ນ ແລະ ຕ້ານຢາເສບຕິດ, ແຕ່ງຕັ້ງ ຄູ-ອາຈານ ​ແລະ ນັກຮຽນ​ຈໍານວນ​ໜຶ່ງ ຮັບຜິດຊອບ ເພື່ອເຄື່ອນໄຫວຕິດຕາມລາຍງານຢ່າງເປັນປະຈຳ ໂດຍການຊີ້ນຳ-ນຳພາ ຂອງຜູ້ອຳນວຍການໂຮງຮຽນໂດຍກົງ. ຖ້າມີສະພາບການເກີດຂຶ້ນ ຫລື ສົງໄສ ຕ້ອງໄດ້ກວດ ປັດສະວະ, ຖ້ານັກຮຽນມີການພົວພັນກັບ​ສິ່ງ​ເສບ​ຕິດ ພວກເຮົາໄດ້ກວດດ້ວຍເຄື່ອງວິທະຍາສາດ.



ທ່ານ ນາງ ນາລີທອງ ຈັນທະບູລີ ຍັງ​ໃຫ້​ຮູ້ວ່າ: ການເຄື່ອນໄຫວນອກໂຮງຮຽນ ພວກເຮົາໄດ້ລາຍງານໃຫ້ອໍານາດການປົກຄອງບ້ານທີ່ຂຶ້ນກັບ ຫລື ປກສ ​ເຂດ ​ເຊິ່ງຜ່ານມາແມ່ນບໍ່ມີບັນຫາດັ່ງກ່າວ
, ​ໂຮງຮຽນມີຄວາມສະຫງົບດີ, ພະນັກງານ-ຄູອາຈານ ແລະ ນ້ອງນັກຮຽນທຸກຄົນ ພາຍໃນໂຮງຮຽນ ບໍ່ຫຍຸ້ງກ່ຽວກັບຢາເສບຕິດທຸກປະເພດ ໂດຍປະຕິບັດ 10 ບໍ່ ຄື: ບໍ່ເສບ, ບໍ່ຊື້, ບໍ່ຂາຍ, ບໍ່ສົ່ງຕໍ່, ບໍ່ຈໍາໜ່າຍ, ບໍ່ທົດລອງ, ບໍ່ຊຸກເຊື່ອງ, ບໍ່ຜະລິດ, ບໍ່ໃຫ້ການຮ່ວມມື ແລະ ບໍ່ເປັນບ່ອນແວ່ພັກເຊົາຂອງຢາເສບຕິດ. ພ້ອມນີ້, ຍັງໄດ້ເຜີຍແຜ່ຜົນຮ້າຍ ຂອງຢາເສບຕິດຢູ່ຕໍ່ໜ້າຫລັກທຸງ ພາຍໃນໂຮງຮຽນ ໂດຍຖືເອົາເນື້ອໃນຂອງປື້ມຕຳລາຮຽນ ຄູ່ມືການນໍາໃຊ້ ການເຜີຍແຜ່ຕ້ານຢາສູບ-ຢາເສບຕິດ ຂອງກະຊວງສຶກສາທິການ ແລະ ກິລາວາງອອກ ແລະ  ຄຳສັ່ງ, ຂໍ້ຕົກລົງຕ່າງໆຂອງຂັ້ນເທິງ ໃຫ້ຄູ-ອາຈານ ແລະ ນ້ອງນັກຮຽນ ຮັບຮູ້ ແລະ ພ້ອມກັນປະຕິບັດໃຫ້ໄດ້ຮັບຜົນດີເປັນກ້າວໆ.

 

ທົ່ວເມືອງ ສີໂຄດຕະບອງ ມີໂຮງຮຽນພາກລັດ ແລະ ໂຮງຮຽນເອກະຊົນທັງໝົດ
105 ແຫ່ງ , ປັດຈຸບັນ ໄດ້ປະກາດເປັນໂຮງຮຽນປອດສິ່ງເສບຕິດແລ້ວ 95 ແຫ່ງ.

ຂ່າວ: ວີລະວັນ

ພາບ: ເກດສະໜາ

KPL

ຂ່າວອື່ນໆ

ads
ads

Top