ຂປລ. ສປປ ລາວ ມີຄວາມກ້າວໜ້າ ໃນວຽກສຸຂາພິບານ ທີ່ມຸ່ງການບັນລຸສະຖານະພາບ ຢຸດຕິການຖ່າຍຊະຊາຍພາຍໃນປີ 2025. ສປປ ລາວ ມີຜົນສຳເລັດອັນພົ້ນເດັ່ນ ທີ່ບັນລຸໄດ້ໃນໄລຍະ 2 ທົດສະວັດຜ່ານມາ ເຊິ່ງເຫັນວ່າ ໃນທົ່ວປະເທດໄດ້ເພີ່ມ ການເຂົ້າເຖິງວິດຖາຍໂດຍພື້ນຖານຈາກ 26% ເປັນ 80% ແລະ ໄດ້ເຮັດໃຫ້ອັດ​ຕາ​ການ​ຖ່າຍຊະຊາຍ ຫລຸດລົງຈາກ 62% ເປັນ 16% ໃນ​ໄລ​ຍະຊ່ວງປີ 2000-2020. ສປປ ລາວ ​ໄດ້​ປະກາດ​ໃຫ້​ 3 ​ແຂວງເປັນແຂວງ ຢຸດຕິການຖ່າຍຊະຊາຍ​ຄື: ບໍລິ​ຄຳ​ໄຊ, ນະຄອນຫລວງ​ວຽງ​ຈັນ ​ແລະ ​ແຂວງ​ວຽງ​ຈັນ ​ໂດຍ​ມີ​ການ​ເຄື່ອນ​ໄຫວ​ທີ່​ດີ​ສາມາດ ບັນລຸ​ເປົ້າ​ໝາຍ​ສຸຂາ​ພິບານ​ໄດ້. ເພື່ອເລັ່ງການປ່ຽນແປງພຶດຕິກຳດ້ານສຸຂາພິບານ, ກະຊວງສາ ທາລະນະສຸກ ໂດຍການສະໜັບສະໜູນ ຈາກອົງການອຸຍນີເຊບ ໄດ້ສ້າງແຜນປະຕິບັດ ເພື່ອບັນລຸສະຖານະຢຸດຕິ ການຖ່າຍຊະຊາຍແຫ່ງຊາດ ໃນປີ 2025 ໂດຍເນັ້ນໃສ່ຄອບຄົວ ທີ່ຍັງເຫລືອສຸດທ້າຍ.

          ໃນ​ໂອກາດ​ເຜີຍແຜ່ ແຜນປະຕິບັດເພື່ອຢຸດຕິ ການຖ່າຍຊະຊາຍ ທີ່ຈັດຂຶ້ນຢູ່​​ນະຄອນຫລວງ​ວຽງ​ຈັນ ​ໃນ​ວັນ​ທີ 1ພະຈິກ 2023ຜ່ານມາ, ທ່ານ ບຸນແຝງ ພູມມາໄລສິດລັດຖະມົນຕີ ກະຊວງສາທາລະນະສຸກ ໄດ້ມີຄໍາເຫັນວ່າ: “ພວກເຮົາສາມາດຈັດຕັ້ງປະຕິບັດ ວິທີການຊຸມຊົນເປັນເຈົ້າ ການດ້ານສຸຂານາໄມ ໃນ ສປປ ລາວ ເຮັດໃຫ້ເກີດມີຜົນປະໂຫຍດ ດ້ານສຸຂາພິບານຢ່າງຫລວງຫລາຍໃນທົ່ວປະເທດ.ຂ້າພະເຈົ້າມີຄວາມພາກພູມໃຈ ທີ່ໄດ້ເຫັນບັນດາຜົນ ງານທີ່ບັນລຸໄດ້ໃນ 3 ແຂວງ, 75 ເມືອງ ແລະ 7.248 ບ້ານ ແຕ່ພວກເຮົາຍັງຕ້ອງໄດ້ສືບຕໍ່ ລະດົມຊຸມຊົນ ແລະ ຮັບ ປະກັນໃຫ້ທຸກຄອບຄົວ ໂດຍສະເພາະຜູ້ທຸກຍາກ ແລະ ຜູ້ດ້ອຍໂອກາດສາມາດເຂົ້າເຖິງວິດຖ່າຍໄດ້.

ການຂາດສຸຂາພິບານທີ່ດີ ເຮັດໃຫ້ເດັກນ້ອຍມີຄວາມສ່ຽງ ຕໍ່ການເປັນພະຍາດໃນໄວເດັກ ແລະ ການຂາດສານອາຫານ ທີ່ສາມາດສົ່ງຜົນກະທົບຕໍ່ການພັດທະນາ ໂດຍລວມຂອງເຂົາເຈົ້າ, ດ້ານການຮຽນຮູ້ ແລະ ໂອກາດທາງເສດຖະກິດໃນອະນາຄົດ. ດັ່ງນັ້ນ, ຈຶ່ງມີຄວາມຈໍາເປັນຕ້ອງ​ຢຸດຕິ​ການ​​ຖ່າຍ​ຊະຊາຍ ​ເຊິ່ງ​ເປັນ​ບາດກ້າວ​ທຳ​ອິດ ​ເພື່ອ​ບັນລຸ​ດ້ານສຸຂານາໄມ, ຄວບ​ຄຸມ​ການ​ແພ່​ລະບາດ​ຂອງ​ພະຍາດ ​ແລະ ​ເພີ່ມ​ທະວີການຮັກສາ​ກຽດສັກສີ​, ຄວາມ​ເປັນ​ສ່ວນ​ຕົວ ​ແລະ ຄວາມ​ປອດ​ໄພ​ຂອງ​ແມ່ຍິງ ​ແລະ ​ເດັກ​ຍິງ.ໃນແຕ່ລະປີ ເດັກນ້ອຍລາວ ອາຍຸຕ່ຳກວ່າ 5 ປີ ປະມານ 700 ຄົນ ເສຍຊີວິດຍ້ອນພະຍາດຖອກທ້ອງ ແລະ ເດັກນ້ອຍ 1 ໃນ 3 ໃນປະເທດ ຂາດສານອາຫານຊໍ້າເຮື້ອເຮັດໃຫ້ເດັກເຕ້ຍ.ວຽກສຸຂາພິບານ, ການອະນາໄມ ແລະ ນໍ້າດື່ມທີ່ປອດໄພ ຈະຊ່ວຍຫລຸດຜ່ອນການ ຂາດສານອາຫານ ແລະ ເດັກເຕ້ຍ ໂດຍການປ້ອງກັນຈາກພະຍາດ ທີ່ພົວພັນກັບນໍ້າ ແລະ ຜົນກະທົບຕໍ່ພັດທະນາການຂອງລໍາໄສ້ ເພື່ອໃຫ້ເດັກສາມາດຢູ່ລອດ ແລະ ຈະເລີນເຕີບໂຕ.

ທ່ານ ເພຍ ຣີເບໂລ ບຣິດໂຕໄດ້ກ່າວວ່າ: ການລົງທຶນຢ່າງຕໍ່ເນື່ອງ ໃນການບໍລິການສຸຂາພິບານ ໂດຍຄົວເຮືອນ, ຊຸມຊົນ ແລະ ລັດຖະບານ ແມ່ນມີຄວາມຈໍາເປັນເພື່ອປ່ຽນແປງພຶດຕິກໍາ ຂອງຊຸມຊົນໃຫ້ "ທຸກຄົນນໍາໃຊ້ວິດ ຖ່າຍ" ກາຍເປັນມາດຕະຖານໃໝ່ຂອງສັງຄົມ. ເນື່ອງໃນໂອກາດ ສະເຫລີມສະຫລອງ ການຮ່ວມມືກັບລັດຖະ ບານລາວ ອົງການອຸຍນີເຊບ ມີຄວາມມຸ່ງໝັ້ນສະໜັບສະໜູນລັດຖະບານ ໃຫ້ບັນລຸສະຖານະພາບຢຸດຕິ ການຖ່າຍຊະ ຊາຍ ໃນປີ 2025 ເພື່ອໃຫ້ເດັກນ້ອຍທຸກໆຄົນ ໄດ້ຮັບຜົນປະໂຫຍດ. ພວກເຮົາຈຶ່ງຮຽກຮ້ອງ ໃຫ້ຄູ່ຮ່ວມງານ ທັງໝົດເລັ່ງຄວາມພະຍາຍາມ ເພື່ອບັນລຸເປົ້າໝາຍສຸຂາພິບານໃຫ້ໄດ້.

KPL