ປະ​ເທດ​​ມຽນ​ມາ (Myanmar) ຫລືຊື່ ​ທາງ​ການ​ວ່າ ສາ​ທາ​ລະ​ນະ​ລັດ ​ແຫ່ງ​ສະ​ຫະ​ພາບ ມຽນ​ມາ(Republ Ic of the Union of Myanmar) ມີນະ​ຄອນ​ຫລວງ ຊື່​ວ່າ: ​ເນ​ປີ​ດໍ(NyaPyiDaw) ມີເນື້ອ​ທີ່ທັງໝົດ 676.578 ກິ​ໂລ​ຕາ​ແມັດ, ໃຫຍ່​ເປັນ ອັນ​ດັບ 2 ຂອງອາ​ຊີ​ ຕາ​ເວັນ​ອອກສ່ຽງ​ໃຕ້ ກວມ​ເອົາ ປະ​ຊາ​ກອນ 53,8 ລ້ານກວ່າຄົ​ນ(​ໃນ​ປີ 2021), ​ໃຊ້ພາສາ ມຽນມາ ເປັນພາ​ສາ​ ທາງ​ການ, ປະ​ຊາ​ຊົນ ​ສ່ວນ​ໃຫຍ່​ ຖືສາ​ສະ​ໜາ​ພຸດກວມ​ເອົາ 92,3%, ນຳ​ໃຊ້​ ສະ​ກຸນ​ເງິນ​ຈ໊າດ (Kyat). ມຽນ​ມາ ເປັນ​ລັດ​ເອ​ກະ​ລາດ​ ໃນ​ອາ​ຊີ​ຕາ​ເວັນ​ອອກ​ສ່ຽງ​ໃຕ້ ມີ​ຊາຍ​ແດນ ຕິດກັບ ອິນ​ເດຍ; ບັງ​ກ​ລາ​ເທດ; ຈີນ;  ລາວ ​ແລະ ​ໄທ. ມຽນມາ ​ເປັນ​ປະ​ເທດ​ທີ່​ໃຫຍ່ ອັນ​ດັບ 2 ​ໃນ​ອາຊີ ຕາ​ເວັນ​ອອກສຽງ​ໃຕ້. ສ່ວນວັນ​ຊາດ ​ແມ່ນ​ວັນ​ທີ 4 ມັງ​ກອນ ປີ 1948.

ມຽນ​ມາ ໄດ້ເລ່ັງໃສ່ ການປະຕິຮູບ ເສດຖະກິດ ຢ່າງຕໍ່ເນື່ອງ ຄຽງຄູ່ກັບ ການປະຕິຮູບ ການເມືອງ , ໂດຍມີເປົ້າໝາຍສຳຄັນຄື: ການຫລຸດພົ້ນຈາກ ການເປັນປະເທດ ດ້ອຍພັດທະນາ  ເພື່ອແນໃສ່ ໃຫ້ປະເທດ ທີ່ມີ ລາຍໄດ້ປານກາງ ໃນປີ 2031 ໂດຍເນັ້ນໃສ່ ການເປີດເສລີ ການຄ້າ ແລະ ການລົງທຶນ  ໄດ້ຊ່ວຍກະຕຸ້ນ ການລົງທຶນ ຈາກຕ່າງປະເທດ ໃນໂຄງການ ສາທານູປະໂພກ ຂັ້ນພື້ນຖານອື່ນໆ. ນອກນີ້ ຍັງມີຄວາມ ອຸ​ດົມ​ສົມ​ບູນ​ໄປ​ດ້ວຍ​ ຊັບ​ພະ​ຍາ​ກອນ ທຳ​ມະ​ຊາດ​ ເປັນຕົ້ນ: ຢົກ, ນ້ຳ​ມັນ-ອາຍ​ແກັ​ສ​ ແລະ ​ແຮ່ທາດ​; ແລະຍັງ​ມີ​ອຸດສາຫະກຳ​ ​ໄດ້​ແກ່ ສິນຄ້າ ກະສິກຳ ຕໍ່າ​ແຜ່ນ, ຜະລິດ​ຕະພັນ ​ຈາກ​ໄມ້, ວັດຖຸ​ກໍ່ສ້າງ ອື່ນໆ. ​ໂດຍ ​ລວມຍອດ ​ຜະລິດ​ຕະພັນ ​ພາຍ​ໃນ ​ປະ​ເທດ(GDP) 65,09 ຕື້​ໂດ​ລາ​ສະຫະລັດ (​ໃນ​ປີ 2021); ອັດຕາສະເລ່ຍ ຕໍ່ຫົວຄົນແມ່ນ 1.209 ກວ່າໂດລາສະຫະລັດຕໍ່ປີ ແລະ ອັດຕາການຈະເລີນ ເຕີບໂຕ ທາງເສດຖະກິດ ແມ່ນ -17,9 % ຕໍ່ປີ(ໃນປີ 2021). ສິນຄ້າທີ່ສົ່ງອອກສຳຄັນ ເຊັ່ນ: ແກັສທຳມະຊາດ, ສິນຄ້າກະສິກຳ, ປ່າໄມ້, ຕໍ່າແຜ່ນ. ສິນຄ້າທີ່ນໍາເຂົ້າແມ່ນ: ເຄື່ອງກົນຈັກ, ລົດໃຫຍ່ ແລະ ຊິ້ນສ່ວນ,  ນໍ້າມັນ ສຳເລັດຮູບ. ສ່ວນຄູ່ການຄ້າ ທີ່ສຳຄັນ ໄດ້ແກ່: ໄທ, ຈີນ, ອິນເດຍ ແລະ ສິງກະໂປ ຕາມລຳດັບ.

ນອກນັ້ນ ຍັງ​ມີ​ ແຫລ່ງ​ທ່ອງ​ທ່ຽວ​ ທີ່​ມີ​ ຊື່​ສຽງ​​ທີ່​ສຸດ ​ເປັນ​ຄວາມ​ໄຝ່​ຝັນ ​ຂອງ ຊາວ​ພຸດ ​ທີ່​ຈະ​ໄດ້​ໄປ​ກາບ​ໄຫວ້ເຊັ່ນ: ມະ​ຫາ​ເຈ​ດີສະເວ​ດາ​ກອງ (ນະ​ຄອນ​ຢາງ​ກຸ້ງ), ເຈ​ດີສະ​ເວ​ຊີ​ກອງ(ເມືອງ​ພຸ​ກາມ), ເຈດ​ີ​ສະເວ​ມໍ​ດໍຣ(ເມືອງ​ຫົງ​ສາ​ວະ​ດີ)​ ​ແລະ ສະຖານ​ທີ່​ທ່ອງ​ທ່ຽວ​ ທາງ​ທຳ​ມະ​ຊາດ​ອື່ນໆອີກດ້ວຍ ທີ່ສ້າງລາຍໄດ້ ໃຫ້ແກ່ ປະເທດ ມຽນມາຢ່າງຫລວງຫລາຍ.

ມຽນມາ ແລະ ປະເທດ ສປປລາວ ໄດ້ສ້າງຕັ້ງ ສາຍພົວພັນ ທາງການທູດ ຮ່ວມກັນ ໃນວັນທີ 12.7. 1955 ຫລັງຈາກນັ້ນ ທັງສອງປະເທດ ກໍ່ໄດ້ຮ່ວມມືກັນ ພັດທະນາ ເສີມສ້າງ ສາຍພົວພັນໃຫ້ນັບມື້ ຂະຫຍາຍຕົວ ຢ່າງບໍ່ຢຸດຢັ້ງ. ສປປລາວ ແລະ ມຽນມາ ເປັນປະເທດ ທີ່ມີ ຊາຍແດນຕິດກັນ ກັ້ນໄວ້ພຽງ ແມ່ນໍ້າຂອງ ບໍລິເວນທ່າຂີ້ເຫລັກ ຂອງ ລັດສານ ຂອງມຽນມາ ແລະ ແຂວງຫລວງນໍ້າທາ ຂອງ ສປປລາວ. ໂດຍສອງລັດ ໃນເຂດລຸ່ມແມ່ນໍ້າ ອີຮົວ ແລະ ລຸ່ມແມ່ນໍ້າຂອງ ເຄີຍມີ ຄວາມສຳພັນ ຫລາຍແບບ ມາຕັ້ງແຕ່ ບູຮານ ມີຄວາມຈະເລີນ ສຳພັນໄມຕີ ກັນ. ຜ່ານມາ ຄວາມສໍາພັນລາວ-ມຽນມາ ເຖິງແມ່ນວ່າ ຈະເປັນເພື່ອນບ້ານກັນ ແຕ່ບໍ່ມີຄວາມໃກ້ຊິດກັນປານໃດ ເນື່ອງຈາກ ການໄປມາຫາສູ່ກັນຂ້ອນຂ້າງຍາກ. ສະນັ້ນ ສອງປະເທດ ໄດ້ສ້າງຂົວມິດຕະພາບ ລາວ-ມຽນມາ ບໍລິເວນສາມຫລ່ຽມຄຳ ແລະ ເລີ່ມເປີດໃຫ້ບໍລິການ ເມື່ອປີ 2015, ຊຶ່ງຊ່ວຍໃຫ້ ການຂົນສົ່ງ ແລະ ແລກ ປ່ຽນສິນຄ້າ ລວມເຖິງ ການໄປມາຫາສູ່ກັນ ລະຫວ່າງ ຄົນລາວ ແລະ ມຽນມາ ໃນບໍລິເວນຊາຍແດນ ໄດ້ຢ່າງສະດວກຍິ່ງຂື້ນ ແລະ ທັງສອງປະເທດ ໄດ້ເລີ່ມມີການພົວພັນ ຢ່າງແໜ້ນແຟ້ນ ແລະ ມີການພັດທະນາ ໃນທາງທີ່ດີ ຕາມລຳດັບ ເຮັດໃຫ້ ການຄ້າ ລະຫວ່າງ ລາວ ແລະ ມຽນມາ ຈະເລີນເຕີບໂຕຂື້ນ./

                                                                                   ໂດຍ:ດາ​ວັນ

KPL