ຂປລ.ໃນວັນທີ 28 ກັນຍາ ຜ່ານມາ, ຄະນະຜູ້ແທນຈາກ ກະຊວງສາທາລະນະສຸກ, ກະຊວງສຶກສາທິການ ແລະ ກິລາ, ສະຖານທູດອົດສະຕຣາລີ ປະຈຳ ສປປ ລາວ, ລວມທັງອົງການອຸຍນີເຊັບ ປະ ຈຳ ສປປ ລາວ ໄດ້ລົງເຄື່ອນໄຫວຢ້ຽມຢາມ ໂຮງຮຽນປະຖົມສຶກສາ ຢູ່ນະຄອນຫລວງວຽງຈັນ ທີ່ໄດ້ກຳນົດນຳໃຊ້ເປັນຈຸດສັກວັກຊີນ ກັນພະຍາດໂຄວິດ-19 ສຳລັບເດັກນ້ອຍອາຍຸ 5-11 ປີໂດຍນຳໃຊ້ວັກຊີນໄຟເຊີ ທີ່ໄດ້ຮັບການສະໜັບສະໜູນ ຊ່ວຍເຫລືອຈາກລັດຖະບານ ອົດສະຕຣາລີ ເກືອບ 500.000 ໂດສ. ວັກຊີນຈຳນວນດັ່ງກ່າວ ແມ່ນໄດ້ສະໜອງໃຫ້ ສປປ ລາວ ເພີ່ມຕື່ມພາຍຫລັງ ການຊ່ວຍເຫລືອວັກຊີນ ໄຟເຊີ  ແລະ ແອັສຕຣາ-ເຊນິກາ ຫລາຍກວ່າໜຶ່ງລ້ານໂດສ ໂດຍລັດຖະບານອົດສະຕຣາລີ ໃນຕົ້ນປີທີ່ຜ່ານມາ.

      ທ່ານ ສະໜອງ ທອງຊະນະ ຮອງລັດຖະມົນຕີ ກະຊວງສາທາລະນະສຸກ ໄດ້ກ່າວວ່າ: ລັດຖະ ບານ ສປປ ລາວ ສະແດງຄວາມຂອບໃຈມາຍັງ ລັດຖະບານອົສຕຣາລີ ສຳລັບການປະກອບສ່ວນອັນລໍ້າຄ່ານີ້ ຕໍ່ຂະບວນການສັກວັກຊີນກັນພະຍາດ ໂຄວິດ-19 ໃນ ສປປ ລາວ.  ກ່ຽວກັບຄວາມປອດໄພ ແລະ ປະສິດທິຜົນ ຂອງບັນດາວັກຊີນກັນພະຍາດ ໂຄວິດ-19 ທັງໝົດທີ່ນຳໃຊ້ຢູ່ໃນ ສປປ ລາວ ໃນປັດຈຸບັນ ແມ່ນໄດ້ຮັບການຮັບຮອງ ຈາກກະຊວງສາທາລະນະສຸກ ຂອງ ສປປ ລາວ.

ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ກ່າວວ່າ: ລັດຖະບານແຫ່ງ ສປປ ລາວ ກໍໄດ້ມີການເພີ່ມທະວີຄວາມເອົາໃຈໃສ່ ປຸກລະດົມຂະບວນການ ສັກວັກຊີນກັນພະຍາດໂຄວິດ-19 ໃຫ້ແກ່ເດັກນ້ອຍ ໂດຍສະເພາະເດັກນັກຮຽນ ເພື່ອສ້າງພູມຄຸ້ມກັນເພີ່ມຕື່ມຈາກພະຍາດດັ່ງກ່າວເເກ່ ນັກຮຽນ, ພົນລະເມືອງລາວ ແລະ ຜູ້ດຳລົງຊີວິດຢູ່ ສປປ ລາວ ທຸກຄົນ.

   ຂະນະທີ່ທ່ານ ໂພລ ແຄລີ ເອກອັກຄະລັດຖະທູດອົສຕຣາລີ ປະຈຳ ສປປ ລາວ ກໍໄດ້ກ່າວວ່າ: ສາຍພົວພັນຮ່ວມມື ລະຫວ່າງ ອົດສະຕຣາລີ ເເລະ ສປປ ລາວ ໃນໄລຍະການລະບາດ ຂອງພະຍາດໂຄວິດ-19. ອົສຕຣາລີ ມຸ່ງໝັ້ນທີ່ຈະສືບຕໍ່ໃຫ້ການຊ່ວຍເຫລືອເເກ່ ສປປ ລາວ ເພື່ອຮັບມືກັບສິ່ງທ້າທາຍ ທີ່ເກີດຂຶ້ນຈາກການລະບາດ ຂອງພະຍາດ ໂຄວິດ-19. ໃນປີນີ້, ອົສຕຣາລີ ແລະ ສປປ ລາວ ກໍໄດ້ສະເຫລີມສະ ຫລອງ ຄົບຮອບ 70 ປີ ຂອງການພົວພັນດ້ານການທູດ ລາວ-ອົສຕຣາລີ ແລະ ໄດ້ໃຫ້ຄໍາໝັ້ນສັນຍາຈະສືບຕໍ່ໃຫ້ການຊ່ວຍເຫລືອ ແກ່ການພັດທະນາຂອງ ສປປ ລາວ.

ໃນລະຫວ່າງປີ 2020 ຫາ 2023, ອົດສະຕຣາລີ ໄດ້ລະດົມທຶນຊ່ວຍເຫລືອກວ່າ 22 ລ້ານໂດລາອົດສະຕຣາລີ  ເພື່ອສະໜັບສະໜູນ ລັດຖະບານເເຫ່ງ ສປປ ລາວ ໃນການຮັບມືກັບການລະບາດ ຂອງພະຍາດໂຄວິດ-19 ເເລະ ການສະໜອງການເຂົ້າເຖິງ ວັກຊີນທີ່ປອດໄພ ແລະ ມີປະສິດທິຜົນ ໃຫ້ກັບປະ ຊາຊົນລາວ. ນອກຈາກນັ້ນ, ອົດສະຕຣາລີ ຍັງໃຫ້ການຊ່ວຍເຫລືອດ້ານເຕັກນິກ ເພື່ອສະໜັບສະໜູນ ການຈັດສົ່ງວັກຊີນ ໂດຍຜ່ານອົງການອຸຍນີເຊັບ, ອົງການອະນາໄມໂລກ ແລະ ບັນດາອົງການຈັດຕັ້ງ ທີ່ບໍ່ສັງ ກັດລັດຖະບານ(NGO), ພ້ອມຍັງໄດ້ໃຫ້ຄຳແນະນຳ ດ້ານສຸຂະພາບຈາກ ຜູ້ຊ່ຽວຊານຈາກສະຖາບັນຕ່າງໆຂອງປະເທດ ອົດສະຕຣາລີ ເພື່ອເສີມສ້າງຄວາມເຂັ້ມແຂງ ຂອງຂະບວນການສັກວັກຊິນ ຂອງ ສປປ ລາວ.

(ຂ່າວ-ພາບ: ອຸຍນີເຊັບ)

KPL