ຂປລ
ຂປລ. ໃນວັນທີ 7 ກຸມພາ 2022 ນີ້, ສະຖາບັນຄົ້ນຄວ້າວິທະຍາສາດ ການສຶກສາ (ສວສ), ກະຊວງສຶກສາທິການ ແລະ ກິລາ ຮ່ວມກັບສະຖານທູດອົດສະຕາລີ ປະຈຳ ສປປ ລາວ ຈັດກອງປະຊຸມ ຄະນະກໍາມະການກວດຜ່ານ ແລະ ຮັບຮອງຫລັກສູດ ຊັ້ນປະຖົມສຶກສາ ຂັ້ນ ປ4 ປັບປຸງໃໝ່
ຂປລ. ໃນວັນທີ 7 ກຸມພາ 2022 ນີ້, ສະຖາບັນຄົ້ນຄວ້າວິທະຍາສາດ ການສຶກສາ (ສວສ), ກະຊວງສຶກສາທິການ ແລະ ກິລາ ຮ່ວມກັບສະຖານທູດອົດສະຕາລີ ປະຈຳ ສປປ ລາວ ຈັດກອງປະຊຸມ ຄະນະກໍາມະການກວດຜ່ານ ແລະ ຮັບຮອງຫລັກສູດ ຊັ້ນປະຖົມສຶກສາ ຂັ້ນ ປ4 ປັບປຸງໃໝ່ ໃນຮູບແບບ ທາງໄກ ແລະ ແບບເຊິ່ງໜ້າ ໂດຍການເປັນ ປະທານຂອງທ່ານ ອ່ອນແກ້ວ ນວນນະວົງ ຜູ້ອຳນວຍການ ສວສ ແລະ ທ່ານ ນາງ ອານ່າ ໄດສັນ ເລຂາເອກ ສະຖານທູດ ອົດສະຕາລີ ປະຈຳ ສປປ ລາວ.
ທ່ານນາງ ອານ່າ ໄດສັນ ໄດ້ກ່າວວ່າ: ລັດຖະບານອົດສະຕາລີ ມີຄວາມຍິນດີເປັນຢ່າງຍິ່ງ ທີ່ໄດ້ຮ່ວມມື ກັບສະຖາບັນ ຄົ້ນຄວ້າ ວິທະຍາສາດການສຶກສາ, ກະຊວງສຶກສາທິການ ແລະ ກິລາ ໃນການພັດທະນາຫລັກສູດ ສະບັບປັບປຸງໃໝ່ ແລະ ເຊື່ອວ່າພວກເຮົາທຸກຄົນຮູ້ສຶກດີໃຈ ທີ່ຈະໄດ້ເຫັນເດັກນ້ອຍລາວ ຂັ້ນ ປ4 ທຸກຄົນ ໄດ້ຮັບສື່ການຮຽນ-ການສອນໃໝ່, ເຊິ່ງຫລັກສູດຊັ້ນປະຖົມສຶກສາໃໝ່ນີ້ ແມ່ນຕອບສະໜອງການປ່ຽນແປງ ຂອງສະຕະວັດທີ 21. ພ້ອມທັງ, ປັບປຸງຜົນການຮຽນ ຂອງນັກຮຽນລາວ ໃຫ້ສາມາດແຂ່ງຂັນກັບ ພາກພື້ນອາຊຽນໄດ້.
ການຈັດຕັ້ງປະຕິບັດ ຫລັກສູດຊັ້ນປະຖົມສຶກສາ ສະບັບປັບປຸງໃໝ່ ໄດ້ເລີ່ມແຕ່ເດືອນ ກັນຍາ 2019 ສຳລັບຂັ້ນ ປ1 ແລະ ໄດ້ສືບຕໍ່ພັດທະນາ ໄປແຕ່ລະຂັ້ນໃນທຸກໆປີ. ສຳລັບສື່ການຮຽນ ການສອນໃໝ່ນີ້ ໄດ້ຖືກອອກແບບ ເພື່ອສົ່ງເສີມ ການຮຽນ-ການສອນ ທີ່ເນັ້ນໃຫ້ນັກຮຽນ ໄດ້ປະຕິບັດຕົວຈິງ, ເຊິ່ງສື່ການຮຽນ-ການສອນໃໝ່ຂັ້ນ ປ4 ແມ່ນໄດ້ພັດທະນາ ໃຫ້ສອດຄ່ອງ ກັບສື່ການຮຽນ-ການສອນ ຂອງທຸກຂັ້ນທີ່ຜ່ານມາ ໂດຍໄດ້ອອກແບບ ແລະ ຂະຫຍາຍເນື້ອໃນ ບົດຮຽນຂັ້ນ ປ3 ເພື່ອເສີມສ້າງຄວາມຮູ້ ແລະ ທັກສະທີ່ມີຢູ່ແລ້ວ ເພື່ອສົ່ງເສີມຄວາມຄືບໜ້າ ຂອງການຮຽນຂອງນັກຮຽນ ໃຫ້ບັນລຸການຮຽນ ໃນແຕ່ລະວິຊາຈາກຂັ້ນໜຶ່ງ ຈົນເຖິງຂັ້ນຕໍ່ໆໄປ.
ຫລັກສູດຊັ້ນປະຖົມສຶກສາ ຂັ້ນ ປ4 ສະບັບປັບປຸງໃໝ່ ແມ່ນແຈກຢາຍໃຫ້ໂຮງຮຽນຊັ້ນປະຖົມສຶກສາທົ່ວປະເທດ ໃນສົກຮຽນປີ 2022-2023 ຈໍານວນ 546.000 ຫົວ, ປຶ້ມຄູ່ມືຄູ ຈໍານວນ 42.600 ຫົວ ເຊິ່ງປະກອບມີ ວິຊາພາສາລາວ, ພາສາອັງກິດ ແລະ ວິຊາວິທະຍາສາດ ແລະ ສິ່ງແວດລ້ອມ ລວມທັງຊຸດອຸປະກອນຊ່ວຍເຫລືອຄູ ຈຳນວນ 14.000 ຫົວ ແລະ ຟາຍຂໍ້ມູນເອກະສານທີ່ບັນຈຸໃນ USBs, ແຜ່ນພັບ ແລະ ໂປສະເຕີ ໂດຍໄດ້ຮັບ ການສະໜັບສະໜູນຈາກ ລັດຖະບານອົດສະຕາລີ.
KPL
