ຂປລ. ໃນວັນທີ 20 ທັນວາ 2024 ຜ່ານ​ມາ, 3 ອົງການຈັດຕັ້ງມະຫາຊົນ ກະຊວງການຕ່າງປະເທດ (ກໍາມະບານ, ຊາວໜຸ່ມ ແລະ ແມ່ຍິງ) ໄດ້ນຳເອົາເຄື່ອງຊ່ວຍເຫລືອ ໄປມອບໃຫ້ໂຮງຮຽນສາມັນ ກິນນອນຊົນເຜົ່າ ແຂວງອຸດົມໄຊ ນໍາພາໂດຍ ທ່ານ ສົມບູນ ສີຫານາດ ​ກໍາມະການຄະນະບໍລິຫານງານພັກ ກະຊວງ ການຕ່າງປະເທດ, ເລຂາໜ່ວຍພັກກົມເສດຖະກິດ, ຫົວໜ້າກົມເສດຖະກິດ, ກະຊວງການຕ່າງປະເທດ ພ້ອມດ້ວຍບັນດາຄະນະກົມ, ຜູ້ຕາງໜ້າຈາກຄະນະບໍລິຫານງານກໍາມະບານ, ຊາວໜຸ່ມ ແລະ ສະຫະພັນແມ່ຍິງ ກະຊວງການຕ່າງປະເທດ ແລະ ພະນັກງານກົມເສດຖະກິດ ເຂົ້າຮ່ວມ.

ເຄື່ອງທີ່ນໍາມາຊ່ວຍເຫລືອໃນຄັ້ງນີ້, ປະກອບມີ: ເຄື່ອງອຸປະໂພກ-ບໍລິໂພກ ແລະ ເຄື່ອງນຸ່ງຫົ່ມ ຈໍານວນໜຶ່ງ ທີ່ 3 ອົງການຈັດຕັ້ງມະຫາຊົນ ກະຊວງການຕ່າງປະເທດ ຮ່ວມກັບບັນດາສໍານັກງານສະຖານທູດ ແຫ່ງ ສປປ ລາວ ປະຈໍາຢູ່ຕ່າງປະເທດ ສາມາດຂົນຂວາຍຂໍການຊ່ວຍເຫລືອຈາກ ອົງການຈັດ ຕັ້ງສາກົນ ແລະ ປະເທດເພື່ອນມິດຕ່າງໆ ​ເພື່ອ​ມາຊ່ວຍເຫລືອ ປະຊາຊົນລາວບັນດາເຜົ່າ. ທັງນີ້, ເພື່ອເປັນກໍາລັງໃຈ ແລະ ປະກອບສ່ວນຊ່ວຍ ເຫລືອບັນດາຄູ-ອາຈານ ແລະ ລູກຫລານນັກຮຽນ ທີ່ໂຮງຮຽນມັດທະຍົມສາມັນ ກິນນອນຊົນເຜົ່າແຂວງອຸດົມໄຊ ໃຫ້ສາມາດສືບຕໍ່ຈັດຕັ້ງການຮຽນ-ການສອນ ຢ່າງມີຄຸນນະພາບດີຂຶ້ນ. ພ້ອມກັນນັ້ນ, ກໍເປັນການສ້າງຂະບວນການ ເພື່ອສະເຫລີມສະຫລອງ ວັນສໍາຄັນຕ່າງໆຂອງພັກ-ລັດ ໂດຍສະເພາະ ວັນການທູດ ຂອງ ສປປ ລາວ ຄົບຮອບ 79 ປີ (12 ຕຸລາ 1945), ວັນສະຖາປະນາ ສປປ ລາວ ຄົບຮອບ 49 ປີ (2/12/1975) ແລະ ເປັນການສ້າງຂະບວນການຂໍ່ານັບຮັບຕ້ອນ ກອງປະຊຸມໃຫ່ຍ 3 ຂັ້ນ ຂອງອົງຄະນະພັກ ກະຊວງການຕ່າງປະເທດ ທີ່ກໍາລັງດໍາເນີນໄປ ຢ່າງເປັນຂະບວນຟົດຟື້ນ.

ໂຮງຮຽນມັດທະຍົມສາມັນກິນນອນຊົນເຜົ່າ ແຂວງອຸດົມໄຊ ແມ່ນສະຖາບັນການສຶກສາຮໍ່າຮຽນໜຶ່ງ ທີ່ປະກອບສ່ວນເຂົ້າໃນ ການພັດທະນາ ຊັບພະຍາກອນມະນຸດ ກໍຄື ລູກຫລານທີ່ເປັນອະນາ ຄົດຂອງຊາດ ທີ່ມາຈາກຊົນເຜົ່າຕ່າງໆ ພາຍໃນແຂວງອຸດົມໄຊ ແລະ ແຂວງໃກ້ຄຽງທາງພາກເໜືອຂອງ ສປປ ລາວ. ໃນສົກປີ 2024-2025 ມີນັກຮຽນ ທີ່ກໍາລັງສຶກສາຮໍ່າຮຽນທີ່ໂຮງຮຽນດັ່ງກ່າວ ຈໍານວນ 559 ຄົນ, ຍິງ 249 ຄົນ, ເປັນນັກຮຽນ ໃນແຜນ 482 ຄົນ, ຍິງ 200 ຄົນ ແລະ ເປັນນັກຮຽນນອກແຜນ 77 ຄົນ, ຍິງ 49 ຄົນ ທີ່ມາຈາກ 11 ຊົນເຜົ່າ ແລະ 4 ໝວດພາສາ.

ຂ່າວ-ພາບ: ກຕທ

KPL