ຂປລ
ໃນລະຫວ່າງ ວັນທີ 4-8 ກັນຍາ 2018 ໜ່ວຍງານປະສານງານ, ຄະນະກໍາມະການສະເພາະກິດ ແກ້ໄຂໄພພິບັດລະດັບຊາດ, ນຳໂດຍ ທ່ານ ອາດສະພັງທອງ ສີພັນດອນ ຮອງລັດຖະມົນຕີ ກະ ຊວງການເງິນ, ຄະນະຊີ້ນຳສະເພາະກິດ
ໃນລະຫວ່າງ ວັນທີ 4-8 ກັນຍາ 2018 ໜ່ວຍງານປະສານງານ, ຄະນະກໍາມະການສະເພາະກິດ ແກ້ໄຂໄພພິບັດລະດັບຊາດ, ນຳໂດຍ ທ່ານ ອາດສະພັງທອງ ສີພັນດອນ ຮອງລັດຖະມົນຕີ ກະ ຊວງການເງິນ, ຄະນະຊີ້ນຳສະເພາະກິດ,ມີ ທ່ານ ສົມສະນິດ ສຸວັນນະລາດ ຮອງລັດຖະມົນຕີ, ຮອງຫົວໜ້າຫ້ອງວ່າການ ສຳນັກງານນາຍົກລັດຖະມົນຕີ, ຫົວໜ້າໜ່ວຍງານປະສານງານ ຄະນະກຳມະ ການສະເພາະກິດ ແກ້ໄຂໄພພິບັດລະດັບຊາດ, ພ້ອມດ້ວຍພະນັກງານທີ່ກ່ຽວຂ້ອງ ໄດ້ເຄື່ອນໄຫວຊຸກຍູ້ການຟື້ນຟູຊີວິດການເປັນຢູ່ ຂອງປະຊາຊົນ ທີ່ຖືກຜົນກະທົບນໍ້າຖ້ວມ ຢູ່ເມືອງ ສະໜາມໄຊແຂວງອັດຕະປື.
ຈຸດປະສົງຂອງການເຄື່ອນໄຫວ ເຮັດວຽກໃນຄັ້ງນີ້, ແມ່ນເພື່ອຕິດຕາມ, ຊຸກຍູ້, ເກັບກຳຂໍ້ມູນ ແລະ ກວດກາເບິ່ງພື້ນທີ່ຕົວຈິງ ກ່ຽວກັບການບໍລິຫານ, ຄຸ້ມຄອງ, ແກ້ໄຂບັນຫາໄພພິບັດ ຂອງແຕ່ລະໜ່ວຍງານ, ແຕ່ລະຈຸ ພ້ອມທັງໄປຢ້ຽມຢາມຖາມຂ່າວ ແລະ ສຳພາດເອົາຂໍ້ມູນຕົວຈິງ ຈາກປະຊາຊົນທີ່ຖືກຜົນກະທົບ ກຳລັງອາໃສຢູ່ສູນອົບພະຍົກ ແລະ ທີ່ພັກຊົ່ວຄາວ ເພື່ອນຳເອົາ ຂໍ້ມູນໄປຄົ້ນຄວ້າ, ຈັດຕັ້ງຜັນຂະຫຍາຍ ແລະ ມີມາດຕະການ ໃນການດຳເນີນງານລະອຽດ, ຈະແຈ້ງ, ຊັດເຈນ, ມີຄວາມເປັນເອກະພາບ ແລະ ຮັບປະກັນປະສິດທິຜົນ ແກ່ການ ຈັດຕັ້ງປະຕິບັດ ວຽກງານຮອບດ້ານ ໃນການຟື້ນຟູຊີວິດ ການເປັນຢູ່ຂອງປະຊາຊົນ ເມືອງສະໜາມໄຊ, ແຂວງອັດຕະປື ທີ່ຖືກຜົນກະທົບນໍ້າຖ້ວມ ໃນທ້າຍ ເດືອນກໍລະກົດ 2018 ທີ່ຜ່ານມາ. ອີກດ້ານໜຶ່ງ, ກໍ່ຍັງເປັນການສົມທຽບ ແລະ ປັບປຸງຂໍ້ມູນ ເພື່ອສະໜອງແກ່ຂັ້ນເທິງ ໃຫ້ມີຄວາມຖືກຕ້ອງ, ໜ້າເຊື່ອຖື ແລະ ກາຍເປັນພື້ນຖານ ໃຫ້ແກ່ການວາງແຜນ ພັດທະນາ ວຽກງານຕ່າງໆ ກໍຄື ການຕົກລົງບັນຫາຂອງການນຳຂັ້ນສູງ ມີຄວາມຖືກຕ້ອງ, ຄົບຖ້ວນ, ແທດເໝາະ ແລະ ສອດຄ່ອງກັບສະພາບຄວາມເປັນຈິງ, ທັງມີລັກສະນະຍືນຍົງຍິ່ງໆຂຶ້ນ, ເຮັດໃຫ້ການຟື້ນຟູຊີວິດ ການເປັນຢູ່ຂອງປະຊາຊົນ ນັບມື້ດີຂຶ້ນເປັນກ້າວໆ, ແກ້ໄຂສະພາບການ ໃຫ້ກັບຄືນສູ່ສະພາບປົກກະຕິໂດຍໄວ, ສາມາດປົກປ້ອງໄດ້ ສິດ ແລະ ຜົນປະໂຫຍດ ອັນຊອບທຳ ຂອງປະຊາຊົນ ກໍຄືປະເທດຊາດຢ່າງແທ້ຈິງ.
ການເຄື່ອນໄຫວເຮັດວຽກໃນຄັ້ງນີ້, ແມ່ນໄດ້ເຮັດວຽກຮ່ວມກັບ ຄະນະນຳຂອງແຂວງອັດຕະປື, ເມືອງສະໜາມໄຊ ກໍຄື ຄະນະຮັບຜິດຊອບແກ້ໄຂໄພພິບັດຂັ້ນແຂວງ, ພ້ອມທັງ ໄປຕິດຕາມ ກວດກາເບິ່ງພື້ນທີ່ຖືກຜົນກະທົບ, ບັນດາສາງເກັບມ້ຽນເຄື່ອງຊ່ວຍເຫລືອ, ຈຸດປຸກສ້າງທີ່ພັກຊົ່ວຄາວ ແລະ ຖາວອນ; ໄປຢ້ຽມຢາມ, ເກັບກໍາຂໍ້ມູນ ແລະ ມອບເຄື່ອງຊ່ວຍ ເຫລືອບັນເທົາທຸກ ໃຫ້ແກ່ປະຊາຊົນຢູ່ບັນ ດາສູນອົບພະຍົບ ແລະ ທີ່ພັກຊົ່ວຄາວ ເປັນຕົ້ນ ຈຸດບ້ານຕະມໍຢອດ, ດົງບາກ, ດອນບົກ, ໂຮງຮຽນບ້ານຫາດຍາວ, ມັດທະຍົມສົມບູນສະໜາມໄຊ, ໂຮງຮຽນ ປະຖົມມິດສຳພັນ.
KPL
