ຂປລ
ທ່ານ ສີ ຈິ້ນຜິງ ປະທານປະເທດຈີນ ແລະ ທ່ານ ຊາເດີ ນູໂກໂຈເຢວິກ ຈາປາໂຣຟ ປະທານາທິບໍດີ ກຽກກິດສະຖານ ຮ່ວມກັນລົງນາມໃນ “ຖະແຫລງການຮ່ວມຂອງ ສາທາລະນະລັດປະຊາຊົນຈີນ ແລະ ສາທາລະນະລັດ ກຽກກິດສະຖານ ກ່ຽວກັບ ການພັດທະນາ ສາຍພົວພັນຄູ່ຮ່ວມຍຸດທະສາດຮອບດ້ານໃນຍຸກໃໝ່ ຢ່າງມີຄຸນນະພາບສູງ” “ສົນທິສັນຍາການຮ່ວມມື ມິດຕະພາບຖານບ້ານໃກ້ເຮືອນຄຽງແບບຖາວອນລະຫວ່າງ ສາທາລະນະລັດ ປະຊາຊົນຈີນ ແລະ ສາທາລະນະລັດ ກຽກກິດສະຖານ”.
ຂປລ.ວິທະຍຸ ໂທລະພາບສູນກາງຈີນ, ໃນໄລຍະຢ້ຽມຢາມ ກຽກກິດສະຖານ, ທ່ານ ສີ ຈິ້ນຜິງ ປະທານປະເທດຈີນ ແລະ ທ່ານ ຊາເດີ ນູໂກໂຈເຢວິກ ຈາປາໂຣຟ ປະທານາທິບໍດີ ກຽກກິດສະຖານ ຮ່ວມກັນລົງນາມໃນ “ຖະແຫລງການຮ່ວມຂອງ ສາທາລະນະລັດປະຊາຊົນຈີນ ແລະ ສາທາລະນະລັດ ກຽກກິດສະຖານ ກ່ຽວກັບ ການພັດທະນາ ສາຍພົວພັນຄູ່ຮ່ວມຍຸດທະສາດຮອບດ້ານໃນຍຸກໃໝ່ ຢ່າງມີຄຸນນະພາບສູງ” “ສົນທິສັນຍາການຮ່ວມມື ມິດຕະພາບຖານບ້ານໃກ້ເຮືອນຄຽງແບບຖາວອນລະຫວ່າງ ສາທາລະນະລັດ ປະຊາຊົນຈີນ ແລະ ສາທາລະນະລັດ ກຽກກິດສະຖານ”. ເອກະສານສອງສະບັບນີ້ ແມ່ນໝາກຜົນສຳຄັນທີ່ສອງຝ່າຍ ຕົກລົງກັນໃນໄລຍະທີ່ ທ່ານ ປະທານ ສີ ຈິ້ນຜິງ ຢ້ຽມຢາມກຽກກິດສະຖານໃນຄັ້ງນີ້. ປີນີ້ແມ່ນປີທຳອິດທີ່ ສປ ຈີນ ດຳເນີນແຜນພັດທະນາ ເສດຖະກິດສັງຄົມແຫ່ງຊາດ 5 ປີຄັ້ງທີ 15, ກຽກກິດສະຖານ ກໍພວມສຸມຄວາມພະຍາຍາມສຸດຂີດ ໃນການດຳເນີນ “ແຜນການພັດທະນາ ແຫ່ງຊາດກ່ອນປີ 2030”. ສປ ຈີນ ແລະ ກຽກກິດສະຖານ ມີທ່າແຮງດ້ານເສດຖະກິດ ທີ່ຊ່ວຍຊູຍູ້ໜູນກັນ, ມີກຳລັງບົ່ມຊ້ອນອັນໃຫຍ່ຫລວງ ໃນການຮ່ວມມື, ແມ່ນຜູ້ຮ່ວມທາງທີ່ເດັດດ່ຽວ ຢູ່ບົນເສັ້ນທາງ ຫັນເປັນທັນສະໄໝ. ນັບແຕ່ ສປ ຈີນ ແລະ ກຽກກິດສະຖານ ລົງນາມໃນຖະແຫລງການຮ່ວມ ກ່ຽວກັບການລົງເລິກສາຍພົວພັນ ຄູ່ຮ່ວມຍຸດທະສາດ ຮອບດ້ານ ໃນຍຸກໃໝ່ໃນປີ 2025, ຮອດການລົງນາມ ໃນຖະແຫລງການຮ່ວມ ໃນປັດຈຸບັນ ໂດຍເນັ້ນໜັກເຖິງ “ການພັດທະນາ ຢ່າງມີຄຸນນະພາບສູງ”,ສປ ຈີນ ແລະ ກຽກກິດສະຖານ ພວມຜ່ານການຮ່ວມມືຕິວຈິງ ທີ່ຍົກລະດັບສູງຂຶ້ນເລື້ອຍໆ ເພື່ອຊຸກຍູ້ໃຫ້ການພັດທະນາຮ່ວມກັນຂອງສອງປະເທດ ວ່າງບາດກ້າວໃໝ່ ຢ່າງໜັກແໜ້ນ. ການປະຕິບັດຕາມແນວຄິດ ປະຊາຄົມຮ່ວມຊາຕາກຳຂອງມວນມະນຸດ, ຂໍ້ລິເລີ່ມທົ່ວໂລກ 4 ຂໍ້ ແລະ ດ້ານອື່ນໆ ລ້ວນແຕ່ໄດ້ບັນທຶກເຂົ້າ ໃນຖະແຫລງການຮ່ວມ ແລະ ສົນທິສັນຍາ. ໃນໂອກາດພົບປະກັບ ທ່ານ ປະທານ ສີ ຈິ້ນຜິງ, ທ່ານປະທານາທິບໍດີ ຊາເດີ ນູໂກໂຈເຢວິກ ຈາປາໂຣຟກ່າວວ່າ, ກຽກກິດສະຖານ ຍິນດີປະສານງານຢ່າງໃກ້ຊິດກັບ ສປ ຈີນ ໃນເວທີຫລາຍຝ່າຍຕ່າງໆ ເຊັ່ນ: ອົງການ ສະຫະປະຊາຊາດ, ອົງການຮ່ວມມືຊຽງໄຮ້, ກົນໄກຈີນ-ອາຊີກາງ, ອົງການຮ່ວມມືປັນຍາປະດິດໂລກ ແລະອື່ນໆ, ຮ່ວມກັນປົກປັກຮັກສາສັນຕິພາບ ແລະ ສະຖຽນລະພາບຂອງໂລກ. ການຢ້ຽມຢາມຂອງ ທ່ານ ສີ ຈິ້ນຜິງ ໃນຄັ້ງນີ້ ໄດ້ຮັບໝາກຜົນສຳຄັນຕ່າງໆ ເຊິ່ງເປັນການສືບທອດ ມິດຕະພາບທາງປະຫວັດສາດ, ທັງເປັນ ການວາດແຜນການຮ່ວມມື ໃນອະນາຄົດ, ຍ່ອມຈະຊຸກຍູ້ໃຫ້ສາຍພົວພັນ ຄູ່ຮ່ວມຍຸດທະສາດ ຮອບດ້ານໃນຍຸກໃໝ່ ລະຫວ່າງ ສອງປະເທດ ກ້າວຂຶ້ນສູ່ລະດັບສູງກວ່າເກົ່າ, ເປີດສະພາບການໃໝ່ ແຫ່ງການພັດທະນາ ສາຍພົວພັນ ສອງປະເທດ ຢ່າງມີຄຸນນະພາບສູງ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
