ຍີ່ປຸ່ນ ເປີດປະມູນເຂົ້າ ໃນສາງສຳຮອງແກ້ໄຂບັນຫາຄ່າຄອງຊີບ
ຂປລ. ສຳນັກຂ່າວ ຕ່າງປະເທດ ລາຍງານ ຈາກ ນະຄອນຫລວງ ໂຕກຽວປະເທດ ຍີ່ປຸ່ນ ເມື່ອບໍ່ດົນມານີ້, ລັດຖະບານ ຍີ່ປຸ່ນ ຈັດການປະມູນເຂົ້າສ່ວນໜຶ່ງ ໃນສາງສຳຮອງຂອງປະເທດ ເພື່ອແກ້ໄຂບັນຫາວິກິດເສດຖະກິດໄດ້ໃນລະດັບໜຶ່ງ.
ກະຊວງ ກະສິກຳ ຍີ່ປຸ່ນ ເປີດຮັບການສະເໜີ ລາຄາ ຈາກ ຜູ້ທີ່ສົນໃຈ ໃນການ ຊື້ເຂົ້າ 150.000 ໂຕນ ຈາກສາງສຳຮອງ, ໂດຍ ຕັ້ງເປົ້າ ການປະມູນ ໃຫ້ສຳເລັດ ໃນວັນທີ 12 ມີນານີ້ ແລະ ມີແຜນລະບາຍເຂົ້າ ສຳຮອງອອກຈາກສາງອີກ ປະມານ 60.000 ໂຕນ ຖ້າຫາກ ມີຄວາມຈຳເປັນ. ທັງນີ້ ຄະນະ ລັດຖະມົນຕີ ຍີ່ປຸ່ນ ໄດ້ມີມະຕິເຫັນດີ ເມື່ອເດືອນກຸມພາ ທີ່ຜ່ານມາ ໃຫ້ກຽມເອົາເຂົ້າ ອອກຈາກສາງສຳຮອງ ຈຳນວນ 210.000 ໂຕນ ຈາກທັງໝົດ ທີ່ມີຢູ່ ປະມານ 1 ລ້ານໂຕນ ເພື່ອບັນເທົາຄວາມເດືອດຮ້ອນ ຂອງ ປະຊາຊົນ ຈາກ ວິກິດການຄ່າຄອງຊີບ ແລະ ສະພາບອາກາດ ມີຄວາມຮ້ອນຮຸນແຮງ ເມື່ອຊຸມປີຜ່ານມາ ສົ່ງຜົນກະທົບຢ່າງໜັກ ຕໍ່ການປູກເຂົ້າ ແລະ ເຮັດໃຫ້ຜົນຜະລິດຫລຸດລົງ. ການເຄື່ອນໄຫວດັ່ງກ່າວ ບໍ່ເຄີບເກີດຂຶ້ນມາກ່ອນ ໃນຍີ່ປຸ່ນ, ຢ່າງໃດກໍ່ຕາມ ລັດຖະບານ ໄດ້ຕັດສິນໃຈປັບປ່ຽນນະໂຍບາຍ ການດຳເນີນການ ກ່ຽວກັບ ເຂົ້າໃນສາງສຳຮອງ ຈາກເດີມທີ່ສາມາດ ລະບາຍເຂົ້າອອກມາໄດ້ ສະເພາະ ໃນຍາມເກີດໄພພິບັດ ທາງທຳມະຊາດ ຫລື ວິກິດການທາງ ກະສິກໍາ, ເກີດວິກິດການທາງເສດຖະກິດເທົ່ານັ້ນ./