ຫາລືການນຳໃຊ້ປັນຍາປະດິດ ເຂົ້າໃນວຽກງານລັດທະສະພາ
ຂປລ. ກອງປະຊຸມກໍາມາທິການວຽກງານສະມາຊິກລັດຖະສະພາ ຂອງສະມັດຊາລັດຖະສະພາ ຝຣັ່ງໂກໂຟນີ (APF) ຈັດຂຶ້ຍລະຫວ່າງວັນທີ 12-14 ມີນາ 2025 ຢູ່ນະຄອນຫລວງວຽງຈັນ ພາຍໃຕ້ການເປັນປະທານຮ່ວມ ລະຫວ່າງ ສະພາແຫ່ງຊາດ ແຫ່ງ ສປປ ລາວ ແລະ ສະມັດຊາລັດຖະສະພາ ຝຣັ່ງໂກໂຟນີ (APF) ເຊິ່ງມີຄະນະຜູ້ແທນລັດຖະສະພາ 11 ປະເທດ ແລະ ເຂດແຄວ້ນ, ກອງເລຂາ APF ແລະ ສູນລັດຖະສະພາອາຊີ (PCAsia) ເຂົ້າຮ່ວມ.
ໃນກອງປະຊຸມ, ທ່ານ ນາງ ສູນທອນ ໄຊຍະຈັກ ຮອງປະທານປະສະພາແຫ່ງຊາດລາວ ໄດ້ມີຄຳເຫັນ ໂດຍທ່ານໄດ້ຍົກໃຫ້ເຫັນເຖິງສະພາບການພົ້ນເດັ່ນ ແລະ ສິ່ງທ້າທາຍຕ່າງໆ ທີ່ພວມເກີດຂຶ້ນໃນຫລາຍພາກພື້ນທົ່ວໂລກ ທີ່ສົ່ງຜົນກະທົບຕໍ່ການພັດທະນາ ເສດຖະກິດ-ສັງຄົມ, ການເມືອງ ແລະ ຄວາມໝັ້ນຄົງຂອງ ບັນດາປະເທດ. ພ້ອມກັນນັ້ນ, ທ່ານຍັງໄດ້ຕີລາຄາສູງ ຕໍ່ບົດບາດຄວາມສຳຄັນຂອງສະ ມາຊິກລັດຖະສະພາ APF ໃນຖານະທີ່ເປັນຕົວແທນແຫ່ງສິດ ຜົນປະໂຫຍດ ແລະ ຄວາມມຸ່ງມາດປາຖະໜາຂອງປະຊາຊົນ ໃນການສົ່ງເສີມປະຊາທິປະໄຕ ການປົກຄອງລັດດ້ວຍກົດໝາຍ ແລະ ຊຸກຍູ້ການຮ່ວມມືໃນພາກພື້ນ ແລະ ສາກົນ ເພື່ອການພັດທະນາ ລວມເຖິງການສົ່ງເສີມການແລກປ່ຽນ ທາງດ້ານວັດທະນະທຳຂອງປະຊາຊົນ.
ກອງປະຊຸມຄັ້ງນີ້, ຍັງໄດ້ປຶກສາຫາລືແລກປ່ຽນຄຳຄິດຄຳເຫັນ ແລະ ຖອດຖອນບົດຮຽນຮ່ວມກັນກ່ຽວກັບ ການນຳໃຊ້ປັນຍາປະດິດ ເຂົ້າໃນວຽກງານລັດຖະສະພາ ໂດຍຈະດຳເນີນໄປພາຍໃຕ້ 3 ຫົວ ຂໍ້ສໍາຄັນ ຄື: ການມີສ່ວນຮ່ວມຂອງເຄື່ອງມືດີຈິຕອນ ໃນການປະຕິບັດໜ້າທີ່ວຽກງານ ຂອງລັດຖະສະພາ, ວິທີການໃໝ່ ໃນການປະເມີນນະໂຍບາຍ ສາທາລະນະຂອງລັດຖະສະພາ ແລະ ການຕອບໂຕ້ກັບຂ່າວທີ່ບໍ່ເປັນຄວາມຈິງ.
ກອງປະຊຸມດັ່ງກ່າວ, ແມ່ນກົນໄກປະຈຳໜຶ່ງຂອງ APF ທີ່ຈະຈັດຂຶ້ນທຸກໆປີ ໃນປະເທດສະມາ ຊິກຂອງ APF ເພື່ອໃຫ້ລັດຖະສະພາສະມາຊິກ ໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນເຊິ່ງກັນ ແລະ ກັນໃນການປະຕິບັດວຽກງານຂອງຕົນ ເພື່ອໃຫ້ມີຄວາມສອດຄ່ອງກັນໃນພາກພື້ນ ແລະ ທົ່ວໂລກ.