ລາວ ແລະ ສະວິດ ຫາລືດ້ານການເມືອງ ຄັ້ງທີ 4
ຂປລ. ກອງປະຊຸມປຶກສາຫາລື ທາງດ້ານການເມືອງ ຄັ້ງທີ 4 ລະຫວ່າງ ກະຊວງການຕ່າງປະເທດ ແຫ່ງ ສປປ ລາວ ແລະ ກະຊວງການຕ່າງປະເທດ ແຫ່ງ ສະມາພັນທະລັດ ສະວິດ ຈັດຂຶ້ນໃນວັນທີ 14 ກຸມພາ 2025 ທີ່ນະຄອນຫລວງວຽງຈັນ ໂດຍການເປັນປະທານຮ່ວມ ຂອງທ່ານ ໄມທອງ ທໍາມະວົງສາ ຮອງລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ, ທ່ານ ເຮັນຣີສ ສະເລັນເບີກ (Heinrich Schellenberg) ຜູ້ຊ່ວຍຮອງລັດຖະມົນຕີ ຮັບຜິດຊອບຂົງເຂດອາຊີ ແລະ ປາຊີຟິກ ກະຊວງການຕ່າງປະເທດ ແຫ່ງ ສະມາພັນທະລັດ ສະວິດ ພ້ອມດ້ວຍພາກສ່ວນກ່ຽວຂ້ອງຂອງທັງສອງຝ່າຍເຂົ້າຮ່ວມ.
ໃນໂອກາດນີ້, ທ່ານ ໄມທອງ ທໍາມະວົງສາ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ມາຍັງ ທ່ານ ເຮັນຣີສ ສະເລັນເບີກ ພ້ອມດ້ວຍຄະນະ ໃນໂອກາດເດີນທາງມາເຮັດວຽກ ແລະ ເປັນປະທານຮ່ວມ ໃນກອງປະຊຸມປຶກສາຫາລື ດ້ານການເມືອງ ຄັ້ງທີ 4 ທີ່ນະຄອນຫລວງວຽງຈັນ ໃນຄັ້ງນີ້, ກອງປະຊຸມດັ່ງກ່າວ ແມ່ນກົນໄກປົກກະຕິ ທີ່ຈັດຂຶ້ນໃນທຸກໆສອງປີ ເພື່ອປຶກສາຫາຫລື ທາງດ້ານການເມືອງຂອງສອງກະຊວງການຕ່າງປະເທດ ໂດຍຜັດປ່ຽນກັນເປັນເຈົ້າພາບ. ຈຸດປະສົງ ເພື່ອສຸມໃສ່ການທົບທວນຄືນການຮ່ວມມືສອງຝ່າຍ ໃນໄລຍະຜ່ານມາ ແລະ ປືກສາຫາລື ກ່ຽວກັບທິດທາງການພົວພັນຮ່ວມມືໃນຕໍ່ໜ້າ, ຊຶ່ງເປັນໂອກາດດີ ໃນການສືບຕໍ່ຮັດແໜ້ນການພົວພັນ ແລະ ການຮ່ວມມື ລະຫວ່າງ ສອງກະຊວງການຕ່າງປະເທດລາວ ແລະ ສະວິດ.
ກອງປະຊຸມຄັ້ງນີ້, ທັງສອງຝ່າຍ ໄດ້ຕີລາຄາຄືນ ການຈັດຕັ້ງຜັນຂະຫຍາຍ ຜົນຂອງກອງປະຊຸມປຶກສາຫາລືດ້ານການເມືອງ ຄັ້ງທີ 3 ຜ່ານມາ ທີ່ໄດ້ຈັດຂຶ້ນ ໃນເດືອນພຶດສະພາ 2022 ທີ່ນະຄອນຫລວງເບີນ, ປະເທດ ສະວິດ ໂດຍສະເພາະ ໄດ້ທວນຄືນຄວາມຄືບໜ້າຂອງການຮ່ວມມືສອງຝ່າຍ, ການແລກປ່ຽນທັດສະນະ ກ່ຽວກັບການຮ່ວມມື ໃນຫລາຍດ້ານ ເປັນຕົ້ນ ດ້ານການເມືອງ, ເສດຖະກິດ, ການຄ້າ, ການລົງທຶນ, ການສຶກສາ, ວັດທະນະທຳ-ສັງຄົມ, ການຮ່ວມມື ເພື່ອການພັດທະນາ ແລະ ຂະແໜງການອື່ນໆ ທີ່ສອງຝ່າຍມີທ່າແຮງ ແລະ ມີຄວາມສົນໃຈຮ່ວມກັນ ພ້ອມທັງການວາງແນວທາງຍຸດທະສາດ ການຮ່ວມມືໃນຕໍ່ໜ້າ. ພ້ອມນີ້, ສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສະວິດ ຕະຫລອດໄລຍະ 60 ກວ່າປີຜ່ານມາ ລວມທັງໃນຂອບສອງຝ່າຍ ແລະ ຫລາຍຝ່າຍ.
ນັບຕັ້ງແຕ່ສອງປະເທດ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 4 ກັນຍາ 1963 ເປັນຕົ້ນມາ, ສປປ ລາວ ແລະ ສະວິດ ມີການພົວພັນຮ່ວມມືທີ່ດີນຳກັນ ແລະ ເຕີບໃຫຍ່ຂະຫຍາຍຕົວຂຶ້ນເລື້ອຍໆ, ຊຶ່ງສະແດງອອກ ສອງຝ່າຍໄດ້ມີການແລກປ່ຽນການຢ້ຽມຢາມເຊິ່ງກັນ ແລະ ກັນ ຢ່າງເປັນປົກກະຕິ ລະຫວ່າງການນໍາຂັ້ນສູງ.
ສຳລັບ ກອງປະຊຸມປຶກສາຫາລືຄັ້ງນີ້ ບໍ່ພຽງແຕ່ເປັນກົນໄກ ການປຶກສາຫາລືຢ່າງເປັນປະຈຳ ແຕ່ຍັງແມ່ນການສ້າງເງື່ອນໄຂຄວາມສະດວກ ແກ່ການຮ່ວມມືພັດທະນາ ໃນຂະແໜງການຕ່າງໆ ກ້າວໄປເຖິງການພົວພັນແລກປ່ຽນ ຂັ້ນສູງໃນອະນາຄົດ, ພ້ອມທັງສະແດງໃຫ້ເຫັນເຖິງຄວາມມຸ່ງໝັ້ນ ທາງດ້ານການເມືອງອັນໜັກແໜ້ນ ຂອງສອງລັດຖະບານ ເພື່ອສືບຕໍ່ຮັດແໜ້ນ ສາຍພົວພັນມິດຕະພາບ ທີ່ມີມາຍາວນານ ແລະ ການຮ່ວມມືຢ່າງສ້າງສັນ, ຮັບປະກັນຜົນປະໂຫຍດຮ່ວມກັນ ແລະ ຄວາມຜາສຸກຂອງສອງປະເທດ ໃຫ້ນັບມື້ນັບເຂັ້ມແຂງ.
ໂອກາດນີ້, ທ່ານ ໄມທອງ ທໍາມະວົງສາ ໄດ້ສະແດງຄວາມຂອບໃຈຢ່າງຈິງໃຈ ມາຍັງລັດຖະບານ ແລະ ປະຊາຊົນ ສະວິດ ທີ່ໃຫ້ການສະໜັບສະໜູນຊ່ວຍເຫລືອ ແກ່ ສປປ ລາວ ທັງດ້ານທຶນຮອນ ແລະ ດ້ານວິຊາການ, ຊຶ່ງເປັນການປະກອບສ່ວນອັນສຳຄັນ ເຂົ້າໃນການຈັດຕັ້ງປະຕິບັດ ແຜນການສ້າງສາພັດທະນາ ເສດຖະກິດ-ສັງຄົມ ແຫ່ງຊາດ ຕະຫລອດໄລຍະຜ່ານມາ ລວມທັງການສະໜັບສະໜູນ ສປປ ລາວ ໃຫ້ຫລຸດພົ້ນອອກຈາກ ສະຖານະການເປັນປະເທດ ດ້ອຍພັດທະນາໃນອະນາຄົດ.
ພາບ: ຂັນໄຊ