ຂປລ
ເຈົ້າໜ້າທີ່ບໍລິສັດ ບາສາຣ ອອຍສ (BOC ) ຂອງ ທາງການ ອີຣັກ ຝ່າຍຮັບຜິດຊອບການຜະລິດ ແລະ ສົ່ງອອກ ແຫລ່ງນໍ້າມັນ ທາງພາກໃຕ້ ເປີດເຜີຍວ່າ: ການຜະລິດນໍ້າມັນ ຂອງ ອີຣັກ ໃນແຫລ່ງນໍ້າມັນຫລັກ ທາງພາກໃຕ້ ຫລຸດລົງເຖິງ 70%
ຂປລ.ສຳນັກຂ່າວ ອິນໂຟເຄວສ: ເຈົ້າໜ້າທີ່ບໍລິສັດ ບາສາຣ ອອຍສ (BOC ) ຂອງ ທາງການ ອີຣັກ ຝ່າຍຮັບຜິດຊອບການຜະລິດ ແລະ ສົ່ງອອກ ແຫລ່ງນໍ້າມັນ ທາງພາກໃຕ້ ເປີດເຜີຍວ່າ: ການຜະລິດນໍ້າມັນ ຂອງ ອີຣັກ ໃນແຫລ່ງນໍ້າມັນຫລັກ ທາງພາກໃຕ້ ຫລຸດລົງເຖິງ 70% ຈາກ ລະດັປະມານ 4,3 ລ້ານຖັງ ຕໍ່ວັນ ເຫລືອພຽງ 1,3 ລ້ານຖັງຕໍ່ວັນ, ເນື່ອງຈາກ ການປະທະກັນ ທີ່ ພວມເກີດຂຶ້ນ ໃນພາກພື້ນ ສົ່ງຜົນໃຫ້ ອີຣັກ ບໍ່ສາມາດ ສົ່ງອອກ ນໍ້າມັນ ຜ່ານຊ່ອງແຄບຮໍມຸຊໄດ້. ປັດຈຸບັນ, ສາງເກັບນໍ້າມັນດີບ ຂອງ ອີຣັກ ໄດ້ເພີ່ມຂຶ້ນສູ່ລະດັບ ສູງສຸດແລ້ວ ແລະ ຜົນຜະລິດທີ່ເຫລືອ ຫລັງຈາກ ການຫລຸດ ກຳລັງການຜະລິດ ຄັ້ງໃຫຍ່ ຈະຖືກນໍາໄປປ້ອນ ໃຫ້ແກ່ ໂຮງກັ່ນ ພາຍໃນປະເທດ.
ການສົ່ງອອກ ນໍ້າມັນຂອງ ອີຣັກ ຊຶ່ງເປັນ ສະມາຊິກຂອງ ໂອເປກ ຫລຸດລົງ ຢ່າງວ່ອງໄວ ໄປສູ່ລະດັບ ສະເລ່ຍ 800.000 ຖັງຕໍ່ວັນ (ວັນທີ 8 ມີນາ ຜ່ານມາ) ໂດຍມີ ກຳປັ່ນ ບັນທຸກ ນໍ້າມັນພຽງ 2 ລຳ ທີ່ເຮັດການໂຫລດສິນຄ້າ, ເນື່ອງຈາກ ກຳປັ່ນອື່ນໆ ບໍ່ສາມາດ ແລ່ນຜ່ານຊ່ອງແຄບ ເຂົ້າສູ່ທ່າກຳປັ່ນ ທາງພາກໃຕ້ ຂອງ ອີຣັກໄດ້ ຢ່າອິດສະລະ. ຕົວເລກດັ່ງກ່າວ ຫລຸດລົງ ຢ່າງຫລວງຫລາຍ ເມື່ອພິຈາລະນາ ຈາກ ເອກະສານ ຂອງ ກະຊວງນໍ້າມັນ ທີ່ ລະບຸວ່າ ຍອດສົ່ງອອກນໍ້າມັນ ຈາກແຫລ່ງ ທາງພາກໃຕ້ ລວມມີ 3,334 ລ້ານຖັງຕໍ່ວັນ ເມື່ອເດືອນກຸມພາ.
ການຫລຸດລົງ ຂອງ ປະລິມານ ການຜະລິດ ແລະ ການສົ່ງອອກ ນໍ້າມັນ ໃນຄັ້ງນີ້, ຄາດວ່າ ຈະສ້າງ ຄວາມເຄັ່ງຕຶງຕໍ່ສະຖານະການ ການເງິນ ຂອງ ອີຣັກ ເນື່ອງຈາກ ລັດຖະບານ ຕ້ອງເພິ່ງພາ ລາຍໄດ້ ຈາກ ການຂາຍນໍ້າມັນດີບ ສຳລັບ ການໃຊ້ຈ່າຍ ພາກລັດ, ໃນຂະນະທີ່ ລາຍໄດ້ ຈາກນໍ້າມັນ ກວມເອົາ ອັດຕາສ່ວນ ຫລາຍກວ່າ 90% ຂອງລາຍໄດ້ທັງໝົດ ຂອງ ປະເທດ./
KPL
