ຂປລ.​ ໜັງສືພິມປະເທດລາວ ສະບັບກ່ອນໆໄດ້ລົງໄປແລ້ວກ່ຽວກັບ ຄຳຖາມ-ຄຳຕອບ ຂອງສະພາແຫ່ງຊາດ ແລະ ສະ ພາປະຊາຊົນຂັ້ນແຂວງ ຊຶ່ງມາສະບັບນີ້ ຂໍສືບຕໍ່ນຳສະເໜີ ຄຳຖາມ-ຄຳຕອບ ກ່ຽວກັບການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອເປັນຂໍ້ມູນປະກອບຄວາມຮູ້ ແລະ ຄວາມເຂົ້າໃຈ ທີ່ຖືກຕ້ອງກ່ຽວກັບການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ແນໃສ່ເຮັດໃຫ້ການເລືອກຕັ້ງສະ ມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນແຂວງ ຊຸດທີ V ຖືກຕ້ອງຕາມກົດໝາຍ, ມີຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້.

ຄໍາຖາມ 1 : ການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແມ່ນຫຍັງ?

ຕອບ: ການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແມ່ນການເສີມຂະຫຍາຍສິດປະຊາທິປະໄຕ ຂອງພົນລະເມືອງລາວຜູ້ມີສິດເລືອກຕັ້ງ ເຂົ້າໃນການເລືອກເອົາບຸກຄົນທີ່ມີມາດຖານ ແລະ ເງື່ອນໄຂຄົບຖ້ວນກວ່າໝູ່ເປັນສະມາຊິກພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອເປັນຕົວແທນປະຕິບັດສິດອໍານາດຂອງປະ ຊາຊົນລາວບັນດາເຜົ່າ ຢູ່ໃນອົງການອໍານາດລັດຂັ້ນສູນກາງ ແລະ ທ້ອງຖິ່ນ.

ຄໍາຖາມ 2: ການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນ ແຂວງ ຊຸດທີ V ມີຄວາມໝາຍສໍາຄັນແນວໃດ?

ຕອບ: ການເລືອກຕັ້ງສະມາຊິກສະພາແຫ່ງຊາດຊຸດທີ X ແລະ ສະພາປະຊາຊົນຂັ້ນແຂວງຊຸດ ທີ V ມີຄວາມສໍາຄັນທີ່ສຸດ, ຍ້ອນວ່າແມ່ນການເສີມຂະຫຍາຍ ແລະ ປະຕິບັດສິດ ປະຊາທິປະໄຕ ຂອງປະຊາຊົນລາວບັນດາເຜົ່າ ເຂົ້າໃນການປັບປຸງ, ບູລະນະລະບົບອົງການອໍານາດລັດຂັ້ນສູນກາງ ແລະ ທ້ອງຖິ່ນ ໃຫ້ເຂັ້ມແຂງ ເປັນຕົ້ນ ແມ່ນປັບປຸງບູລະນະ ແລະ ສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງ ປະຊາຊົນລາວບັນດາເຜົ່າ.

ການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນແຂວງ ຊຸດທີ V ແມ່ນມີຂຶ້ນໃນເວລາທີ່ພັກປະຊາຊົນປະຕິວັດລາວ ກໍາອໍານາດມາໄດ້ 50 ປີ ແລະ ກໍແມ່ນ 50 ປີ ແຫ່ງການເຕີບໃຫຍ່ຂະຫຍາຍຕົວ ຂອງລັດສາທາລະນະລັດ ປະຊາທິປະໄຕ ປະຊາຊົນລາວ ກໍຄື ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຢູ່ໃນ
ທ່າມກາງບັນຍາກາດທີ່ສະພາບການຂອງໂລກ, ພາກພື້ນ ພວມມີການຜັນແປຢ່າງສັບສົນ, ຄາດຄະເນໄດ້ຍາກທີ່ສົ່ງຜົນກະທົບທາງດ້ານຕັ້ງໜ້າ ແລະ ຫຍໍ້ທໍ້ຕໍ່ພາລະກິດປົກປັກຮັກສາ ແລະ ສ້າງສາປະເທດຊາດ ຂອງພວກເຮົາ. ຢູ່ພາຍໃນປະ ເທດ, ພວກເຮົາຍັງ ສືບຕໍ່ປະສົບກັບຄວາມຫຍຸ້ງຍາກທາງດ້ານເສດຖະກິດ-ການເງິນ ມາເປັນເວລາຫລາຍປີ. ສະນັ້ນ, ການເລືອກຕັ້ງຄັ້ງນີ້ ຈຶ່ງມີຄວາມໝາຍສໍາຄັນເປັນພິເສດ ຊຶ່ງຮຽກຮ້ອງໃຫ້ພົນລະເມືອງລາວ ຜູ້ມີສິດເລືອກຕັ້ງທຸກຄົນຍິງຕ້ອງເພີ່ມທະວີຄວາມສາມັກຄີເປັນປຶກແຜ່ນພາຍໃນຊາດ ແລະ ລະຫວ່າງ ເຜົ່າຕ່າງໆ, ພ້ອມກັນໄປໃຊ້ສິດປ່ອນບັດເລືອກຕັ້ງໃຫ້ຄົບຖ້ວນ ແລະ ໃຫ້ເລືອກເອົາຜູ້ມີມາດຖານ ແລະ ເງື່ອນໄຂຄົບຖ້ວນກວ່າໝູ່ ເປັນສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ເພື່ອສາມາດເຮັດຫລ້ອນໜ້າທີ່ອັນມີກຽດ ໃນຖານະເປັນຕົວແທນໃຫ້ແກ່ສິດ ແລະ ຜົນປະໂຫຍດ ຂອງປະຊາຊົນລາວບັນດາເຜົ່າ.

ຄໍາຖາມ 3: ການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ມີຫລັກການແນວໃດ?

ຕອບ: ການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ມີ 5 ຫລັກການພື້ນຖານ ດັ່ງນີ້:

1. ຫລັກການທົ່ວໄປ: ມີຄວາມໝາຍວ່າ ພົນລະເມືອງລາວຜູ້ມີສິດເລືອກຕັ້ງ ແຕ່ອາຍຸ 18 ປີ ຂຶ້ນໄປ ລ້ວນແຕ່ມີສິດປ່ອນບັດເລືອກຕັ້ງ ແລະ ຜູ້ມີອາຍຸ 21 ປີຂຶ້ນໄປ ລ້ວນແຕ່ມີສິດສະໝັກຮັບເລືອກຕັ້ງຕາມທີ່ໄດ້ກໍານົດໄວ້ໃນກົດໝາຍ.

2. ຫລັກການສະເໝີພາບ: ມີຄວາມໝາຍວ່າ ພົນລະເມືອງລາວຜູ້ມີສິດເລືອກຕັ້ງ ມີສິດເທົ່າທຽມກັນ ໃນການເລືອກຕັ້ງ ແລະ ສະໝັກຮັບເລືອກຕັ້ງ ໂດຍບໍ່ຈໍາແນກ ເພດ, ເຜົ່າ, ຖານະທາງດ້ານສັງຄົມ, ລະດັບການສຶກສາ ແລະ ຄວາມເຊື່ອຖື.

3. ຫລັກການໂດຍກົງ: ມີຄວາມໝາຍວ່າ ພົນລະເມືອງລາວຜູ້ມີສິດເລືອກຕັ້ງ ເປັນຜູ້ດໍາເນີນການປ່ອນບັດດ້ວຍຕົນເອງ ເພື່ອເລືອກເອົາຜູ້ສະໝັກຮັບເລືອກຕັ້ງທີ່ຕົນເຫັນວ່າມີມາດຕະຖານ ແລະ ເງື່ອນໄຂຄົບຖ້ວນ ເປັນສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ຍົກເວັ້ນກໍລະນີ ທີ່ກໍານົດໄວ້ສະເພາະຢູ່ໃນກົດໝາຍ.

4. ຫລັກການລົງຄະແນນສຽງປິດລັບ: ມີຄວາມໝາຍວ່າ ພົນລະເມືອງລາວ ຜູ້ມີສິດເລືອກຕັ້ງ ແຕ່ລະຄົນ ເປັນຜູ້ຕັດສິນໃຈຂີດບັດດ້ວຍຕົນເອງ ແລະ ນໍາເອົາບັດທີ່ຂີດນັ້ນໄປປ່ອນໃສ່ຫີບບັດ ໂດຍ ບໍ່ໃຫ້ຄົນອື່ນຮູ້ ແລະ ເຫັນນໍາ. ຍົກເວັ້ນກໍລະ ນີສະເພາະທີ່ໄດ້ກໍານົດໄວ້ໃນກົດໝາຍ.

5. ຫລັກກການຍຸຕິທໍາ: ມີຄວາມໝາຍວ່າ ການປ່ອນບັດເລືອກຕັ້ງ ແລະ ສະໝັກຮັບເລືອກຕັ້ງ ເປັນສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ຕ້ອງມີຄວາມໂປ່ງໃສ, ບໍ່ມີການລັກໂລບ, ປອມແປງຄະແນນສຽງ,ບໍ່ໂຄ ສະນາໃສ່ຮ້າຍປ້າຍສີ ຊິ່ງກັນ ແລະ ກັນ. ພໍ້ກັນໃໝ່ໃນສະບັບໜ້າ

KPL