ຂປລ. ການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ V ແມ່ນການນໍາໃຊ້ສິດປະຊາທິປະໄຕ ຂອງປະຊາຊົນລາວບັນດາເຜົ່າ ຕາມແນວທາງນະໂຍບາຍຂອງພັກ ເຂົ້າໃນການບູລະນະລັດປະຊາທິປະໄຕປະຊາຊົນ ໃຫ້ມີຄວາມໜັກແໜ້ນ, ເຂັ້ມແຂງ, ເປັນການນໍາໃຊ້ສິດຂອງພົນລະເມືອງຕາມທີ່ໄດ້ກໍານົດໄວໃນລັດຖະທໍາມະນູນ. 

        ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ, ປະທານຄະນະກໍາມະການເລືອກຕັ້ງລະດັບຊາດໄດ້ໃຫ້ສໍາພາດຕໍ່ສ່ືມວນຊົນເມື່ອບໍ່ດົນມານີ້, ກ່ຽວກັບການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ໂດຍທ່ານໄດ້ຍົກໃຫ້ເຫັນການຈັດຕັ້ງປະຕິບັດວຽກ ງານສ້າງ ແລະ ປັບປຸງກົດໝາຍຕະຫລອດໄລຍະ 5 ປີຜ່ານມາຂອງສະພາແຫ່ງຊາດ ຊຸດທີ IX ແລະ ການເຄື່ອນໄຫວຂອງສະພາແຫ່ງຊາດ ຊຸດທີ IX, ສະພາປະຊາຊົນຂັ້ນແຂວງ ຊຸດທີ IV ພ້ອມທັງ ເນັ້ນໃຫ້ປະຊາຊົນລາວບັນດາເຜົ່າຖືເອົາການເລືອກຕັ້ງ ສສຊ ແລະ ສສຂ ທ່ີຈະຈັດຂ້ຶນພ້ອມກັນໃນຂອບເຂດທົ່ວປະເທດ ໃນວັນທີ 22 ກຸມພາ 2026 ນີ້, ເປັນໜ້າທ່ີການເມືອງທີ່ສໍາຄັນ ທີ່ຈະຕ້ອງໄດ້ເອົາໃຈໃສ່ເພ່ືອເລືອກເອົາບຸກຄົນທ່ີມີ ຄວາມຮູ້, ຄວາມສາມາດ, ຄົບຕາມມາດຖານເງື່ອນໄຂ ເພື່ອເປັນຕົວແທນຂອງປະຊາຊົນ, ນຳເອົາຄຳຄິດເຫັນຂອງປະຊາຊົນ ໄປສະເໜີຕໍ່ພາກສ່ວນທີ່ກ່ຽວຂ້ອງ ເພື່ອກ້າວໄປສູ່ການ ປັບປຸງແກ້ໄຂບັນຫາປະກົດການຫຍໍ້ທໍ້ທີ່ເກີດຂຶ້ນໃນສັງຄົມໃຫ້ເປັນຮູບປະທຳ. ທັງນີ້, ແນໃສ່ນໍາເອົາຜົນ ປະໂຫຍດມາສູ່ປະເທດຊາດ ກໍຄື ປະຊາຊົນລາວບັນດາເຜົ່າ. ສະນັ້ນ, ປະຊາຊົນລາວບັນດາເຜົ່າ ໃນຂອບເຂດທົ່ວປະເທດທີ່ມີອາຍຸຄົບ 18 ປີ ຂ້ຶນໄປ ໃຫ້ພ້ອມກັນໄປໃຊ້ສິດເລືອກຕັ້ງເອົາ ສສຊ ແລະ ສສຂ ຢ່າງພ້ອມພຽງຮຽງໜ້າ, ເຮັດໃຫ້ການເລືອກຕັ້ງ ໃນວັນທີ 22 ກຸມພາ 2026 ກາຍເປັນປາງບຸນໃຫຍ່ຂອງຊາດ ແລະ ສາມາດດໍາເນີນໄປຢ່າງເປັນຂະບວນຟົດຟື້ນ ເພື່ອເລືອກຕັ້ງເອົາຜູ້ແທນທີ່ດີເດັ່ນ ຄົບມາດຖານເງື່ອນໄຂ ແລະ ເຮັດໃຫ້ການເລືອກຕັ້ງຄັ້ງນີ້ໄດ້ຮັບຜົນສໍາເລັດຕາມຄາດໝາຍທີ່ວາງໄວ້ ເພື່ອນໍາເອົາຜົນປະໂຫຍດມາສູ່ປະເທດຊາດກໍຄື ປະຊາຊົນລາວບັນດາເຜົ່າ.

     ພ້ອມນ້ີ, ທ່ານ ໄຊສົມພອນ ພົມວິຫານ ຍັງສະເໜີໃຫ້ຄະນະກໍາມະການເລືອກຕັ້ງທຸກຂັ້ນ, ອໍານາດການປົກຄອງທຸກຂັ້ນນໍາພາການປ່ອນບັດເລືອກຕັ້ງໃຫ້ຮັບປະກັນ ຄວາມໂປ່ງໃສ ແລະ ສໍາເລັດທັນຕາມກໍານົດເວລາຮ້ອຍສ່ວນຮ້ອຍ. ພ້ອມກັນນັ້ນ, ກໍໃຫ້ປະຊາຊົນລາວບັນດາເຜົ່າ ຈົ່ງຍົກສູງສະຕິລະວັງຕົວ, ພ້ອມກັນເປັນເຈົ້າການປະກອບສ່ວນເຂົ້າໃນການເຄື່ອນໄຫວວຽກງານປ້ອງກັນຊາດ-ປ້ອງກັນຄວາມສະຫງົບ ໃນວັນເລືອກຕັ້ງໃຫ້ຮັບປະກັນຄວາມສະຫງົບປອດໄພ. ພ້ອມນັ້ນ, ຜູ້ມີສິດເລືອກຕັ້ງກໍຕ້ອງຂີດໝາຍບັດລົງຄະແນນສຽງເລືອກຕັ້ງໃຫ້ຖືກຕ້ອງຕາມລະບຽບການເລືອກຕັ້ງຮ້ອຍສ່ວນຮ້ອຍ, ບໍ່ໃຫ້ມີບັດຕາຍ ຈຶ່ງຈະເຮັດໃຫ້ທຸກຄະແນນສຽ ໄດ້ເປັນສ່ວນປະກອບສໍາຄັນ ໃຫ້ແກ່ການບູລະນະລັດ ປະຊາທິປະໄຕ ປະຊາຊົນ ຢ່າງແທ້ຈິງ.

ຂ່າວ: ທະນູທອງ

KPL