ຂປລ. ບຸນ​ກອງ​ເຂົ້າ​ເມືອງ​ສັງ​ທອງ ​ແຂວງ​ວຽງຈັນ ຈະຈັດຂຶ້ນລະຫວ່າງ ວັນທີ 16-18  ມັງກອນ 2026  ຈຸດປະສົງ ກໍເພື່ອອະນຸລັກຮັກສາສົ່ງເສີມວັດທະນະທຳ, ຮີດຄອງປະເພນີອັນດີງາມຂອງຊາດລາວ ກໍຄືປະຊາຊົນຊາວເມືອງສັງທອງ​ ທີ່ເຄີຍສືບທອດກັນມາແຕ່ບູຮານນະການ ໃຫ້ຄຽງຄູ່ກັບຄົນລາວ, ຊາດລາວ​ ກໍຄືຊາວເມືອງສັງທອງໃຫ້ມີຄວາມໂດດເດັ່ນສູງຂຶ້ນ ແລະ ເປັນທີ່ຮູ້ຈັກຂອງສັງຄົມ; ເພື່ອເປັນການຊຸກຍູ້ສົ່ງເສີມວຽກງານການທ່ອງທ່ຽວ​ ໃຫ້ໄດ້ຮັບການພັດທະນາຍົກລະດັບຂຶ້ນ ແນໃສ່ການດຶງດູດໃຫ້ນັກທ່ອງທ່ຽວພາຍໃນ ແລະ ຕ່າງປະເທດໃຫ້ເຂົ້າມາທ່ຽວເມືອງສັງທອງນັບມື້ນັບຫລາຍຂຶ້ນ.

ທ່ານ ຄໍາປະເສີດ ບຸດດາວົງ ຄະນະປະຈໍາພັກ ຮອງຄະນະກໍາມະການອົງການປົກຄອງ ເມືອງສັງທອງ ໄດ້ໃຫ້ສໍາພາດຕໍ່ສື່ມວນຊົນ​ວ່າ: ການຈັດງານບຸນປະເພນີເຂົ້າຫອມສັງທອງ ແລະ ຕະຫລາດນັດວາງສະແດງຂາຍສິນຄ້າ ປະຈໍາປີ 2026 ແມ່ນຈະໄດ້ຈັດຂຶ້ນໃນລະຫວ່າງວັນທີ 16-18 ມັງກອນ 2026 ນີ້,​ ເປັນເວລາ 3 ວັນເຕັມ ​ໂດຍ ງານໃນປີນີ້ ນອກຈາກຈະໄດ້ເນັ້ນໃສ່ກິດຈະກຳທາງດ້ານສາສະໜາທີ່ເປັນຮີດຄອງປະເພນີອັນດີງາມແລ້ວ ຍັງຈະເນັ້ນໃສ່ການດຶງດູດເອົານັກທ່ອງທ່ຽວເຂົ້າມາທ່ຽວໃນງານໃຫ້ຫລາຍຂຶ້ນ ເພື່ອເຮັດໃຫ້ງານບຸນໃນຄັ້ງນີ້ມີສີສັນ ແລະ ເປັນທີ່ໜ້າປະທັບໃຈຂອງນັກທ່ອງທ່ຽວ​ ທັງພາຍໃນ ແລະ ຕ່າງປະເທດ.​  ສະນັ້ນ ຄະນະຮັບຜິດຊອບການຈັດງານພວກເຮົາກໍ່ໄດ້ມີການຫ້າງຫາກະກຽມທາງດ້ານຄວາມພ້ອມຕ່າງໆ ໂດຍສະເພາະແມ່ນທາງດ້ານການປະດັບປະດາ-ຕົບແຕ່ງສະຖານທີ່ຈັດງານ ເປັນຕົ້ນແມ່ນການຕົບແຕ່ງ-ເອ້ຍ້ອງກອງເຂົ້າຫອມສັງທອງຈໍານວນ 5 ກອງ, ຖຽງນາ, ເລົ້າເຂົ້າ, ລານເຂົ້າ ແລະ ອື່ນໆ ທີ່ເປັນເອກະລັກຂອງເມືອງສັງທອງ ເຊິ່ງໃນປີນີ້ກໍ່ຈະມີຫລາຍລາຍການສະແດງ ແລະ ຫລາກຫລາຍກິດຈະກຳ ໂດຍສະເພາະແມ່ນການສະແດງສິລະປະວັນນະຄະດີ, ປະກວດນາງສາວເຂົ້າຫອມ, ປະກວດອາຫານພື້ນບ້ານ ແລະ ແຂ່ງຂັນກິລາມວນຊົນ. ພ້ອມດຽວກັນນັ້ນ​ ພາຍໃນງານບຸນ​ ຍັງຈະມີຕະຫລາດນັດຂາຍສິນຄ້າກະສິກຳ, ສິນຄ້າໂອດັອບ ແລະ ສິນຄ້າທົ່ວໄປຢ່າງຫລວງຫລາຍຕະຫລອດໄລຍະ 3 ມື້ 3 ຄືນ ເພື່ອໃຫ້ນັກທ່ອງທ່ຽວ​ ທີ່ເຂົ້າມາທ່ຽວງານ​ ໄດ້ເບິ່ງໄດ້ຊິມອາຫານ ແລະ ແລກປ່ຽນຊື້-ຂາຍສິນຄ້າຈາກປະຊາຊົນພາຍໃນເມືອງຂອງພວກເຮົາ. ສໍາລັບ ຈຸດປະສົງ​ຂອງ​ງານ​ບຸນ​ໃນ​ຄັ້ງ​ນີ້ ຈຸດປະສົງ ກໍ່ເພື່ອອະນຸລັກຮັກສາສົ່ງເສີມວັດທະນະທຳ, ຮີດຄອງປະເພນີອັນດີງາມຂອງຊາດລາວ ກໍ່ຄືປະຊາຊົນຊາວເມືອງສັງທອງ​ ທີ່ໄດ້ເຄີຍສືບທອດກັນມາແຕ່ບູຮານນະການ ໃຫ້ຄຽງຄູ່ກັບຄົນລາວ, ຊາດລາວ​ ກໍຄືຊາວເມືອງສັງທອງໃຫ້ມີຄວາມໂດດເດັ່ນສູງຂຶ້ນ ແລະ ເປັນທີ່ຮູ້ຈັກຂອງສັງຄົມ; ເພື່ອເປັນການຊຸກຍູ້ສົ່ງເສີມວຽກງານການທ່ອງທ່ຽວ​ ໃຫ້ໄດ້ຮັບການພັດທະນາຍົກລະດັບຂຶ້ນ ແນໃສ່ການດຶງດູດໃຫ້ນັກທ່ອງທ່ຽວພາຍໃນ ແລະ ຕ່າງປະເທດໃຫ້ເຂົ້າມາທ່ຽວເມືອງສັງທອງນັບມື້ນັບຫລາຍຂຶ້ນ.

​​ເອົາ​ເປັນ​ວ່າ​ທ່ານ​ໃດ​ທີ່​ໄດ້​ມາ​ຢ້ຽມຢາມ​ເມືອງ​ສັງ​ທອງ ​ແຂວງ​ວຽງຈັນ ກໍ​ບໍ່​ຄວນ​ພາດ​​ໃນ​ການ​ສໍາຜັດການ​ດໍາລົງ​ຊີວິດ​ຂອງ​ປະຊາຊົນ ​ແລະ ຊີມ​ອາຫານ​ແຊບ,ຊື້​ເຄື່ອງກິນ​ທໍາ​ມະ​ຊາດ​ໄດ້​ຮັບຮອງ​ວ່າ​ທ່ານ​ຈະ​ປະ​ທັບ​ໃຈ.

(ຂໍ້ມູນຈາກ ຂ່າວສານເມືອງສັງທອງ)

KPL