ຂປລ. ຂີ້ເຫຍື້ອສາທາລະນະ ຫລື ຂີ້ເຫຍື້ອທີ່ບໍ່ມີເຈົ້າຂອງ ໝາຍເຖິງສິ່ງເສດເຫລືອຕ່າງໆ ທີ່ຖິ້ມຢ່າງຊະຊາຍຢູ່ຕາມແຄມຖະໜົນຫົນທາງ, ດິນເປົ່າຫວ່າງ ແລະ ສະຖານທີ່ສາທາລະນະອື່ນໆ ທີ່ບໍ່ມີພາກສ່ວນໃດຮັບຜິດຊອບໃນການເກັບມ້ຽນ ຊຶ່ງປັດຈຸບັນຂີ້ເຫຍື້ອສາທາລະນະນີ້ ຍັງມີປະກົດໃຫ້ເຫັນຢູ່ບາງບ່ອນ ອັນໄດ້ສ້າງຄວາມເປິເປື້ອນ ບໍ່ງາມຕາໃຫ້ກັບຕົວເມືອງ ແລະ ສ້າງພາບພົດອັນບໍ່ດີໃຫ້ກັບປະເທດເຮົາ.

ບັນຫາຂີ້ເຫຍື້ອສາທາລະນະນີ້ ຖືເປັນບັນຫາ ແລະ ສິ່ງທ້າທາຍຕໍ່ການຈັດຕັ້ງປະຕິບັດໂຄງການ ວຽງຈັນສະອາດ ເນື່ອງຈາກວ່າ ປະຊາຊົນຈຳນວນໜຶ່ງ ທີ່ອາໄສຢູ່ໃນນະຄອນຫລວງວຽງຈັນ ຍັງບໍ່ໄດ້ເຮັດສັນຍາເກັບມ້ຽນຂີ້ເຫຍື້ອ, ປະຊາຊົນສ່ວນຫລາຍຍັງມີແນວຄິດມັກງ່າຍໃນການເກັບມ້ຽນຂີ້ເຫຍື້ອ ຈຶ່ງເກີດມີປາກົດການຖິ້ມຂີ້ເຫຍື້ອຊະຊາຍ ເຮົາຈະສັງເກດເຫັນ ພາຍຫລັງສິ້ນສຸດງານບຸນປະເພນີຕ່າງໆ ປະຈຳຊາດ ຫລື ບຸນປະຈຳຊົນເຜົ່າ ສິ່ງທີ່ຕາມມາກໍແມ່ນຂີ້ເຫຍື້ອ ຈໍານວນຫລວງຫລາຍທີ່ຖືກຖິ້ມຢ່າງຊະຊາຍ ແລະ ຕ້ອງໃຊ້ເວລາຫລາຍວັນ ຈຶ່ງເກັບມ້ຽນສຳເລັດ, ສິ່ງທີ່ຮ້າຍແຮງໄປກວ່ານັ້ນ ແມ່ນປະຊາຊົນທີ່ອາໄສຢູ່ແຄມທາງຈຳນວນໜຶ່ງ ຍັງບໍ່ສົນໃຈໃນການເກັບມ້ຽນຂີ້ເຫຍື້ອດັ່ງກ່າວ ປ່ອຍໃຫ້ແຕ່ພາກສ່ວນຮັບຜິດຊອບເປັນຜູ້ເກັບມ້ຽນພຽງຝ່າຍດຽວ ຊຶ່ງກໍມີຈຳນວນຄົນໜ້ອຍຢູ່ແລ້ວແລະຕ້ອງໃຊ້ເວລາຫລາຍວັນຈຶ່ງເກັບມ້ຽນສຳເລັດ. 

ຕາມຂໍ້ມູນຂອງອົງການພັດທະນາ ແລະ ບໍລິຫານຕົວເມືອງວຽງຈັນ (ອພບ) ໄດ້ໃຫ້ຮູ້ວ່າ: ການຈັດ ເກັບຂີ້ເຫຍື້ອຂອງ ອພບ ທີ່ຍັງແກ້ໄຂບໍ່ຕົກແມ່ນບັນຫາຂີ້ເຫຍື້ອສາທາລະນະ ຊຶ່ງມີຜູ້ນໍາມາກອງໄວ້ຢູ່ແຄມທາງຢ່າງຊະຊາຍ ໂດຍສ່ວນໃຫຍ່ກໍແມ່ນຂີ້ເຫຍື້ອມືຖືຂອງຜູ້ມັກງ່າຍ ທີ່ມັກເອົາມາວາງແອ້ມແປະໃກ້ກັບ ຈຸດວາງຂີ້ເຫຍື້ອຂອງຜູ້ເຮັດສັນຍາເກັບມ້ຽນກັບ ອພບ. ນອກນັ້ນ, ກໍມີຂີ້ເຫຍື້ອຂອງຫົວໜ່ວຍທຸລະກິດ ຂອງພໍ່ຄ້າ ແມ່ຂາຍ ແລະ ອື່ນໆ ຊຶ່ງຈະນໍາໃສ່ລົດໄປຖິ້ມຢູ່ຈຸດດິນວ່າງ ຫລື ທີ່ດິນຮົກເຮື້ອແຄມທາງຕ່າງໆ ຊຶ່ງນັບມື້ມີປະລິມານເພີ່ມຂຶ້ນຢ່າງຕໍ່ເນື່ອງ ໂດຍບັນຫານີ້ ຫລາຍພາກສ່ວນຕ້ອງມີສ່ວນຮ່ວມ ເປັນເຈົ້າການໃນການແກ້ໄຂຢ່າງຈິງຈັງ ຈຶ່ງຈະເຮັດໃຫ້ນະຄອນຫລວງວຽງຈັນມີຄວາມສະອາດຈົບງາມ. ຢ່າງໃດກໍດີ, ພາຍຫລັງທີ່ມີມະຕິຕົກລົງ ກ່ຽວກັບການຈັດຕັ້ງປະຕິບັດໂຄງການວຽງຈັນສະອາດກໍຖືເປັນອີກໜຶ່ງບ່ອນອີງ ໃນການປະຕິບັດງານໂຕຈິງ ແລະ ເຊື່ອແນ່ວ່າ ບັນຫາຂີ້ເຫຍື້ອຈະໄດ້ຮັບການແກ້ໄຂໃຫ້ດີຂຶ້ນໃນອະນາຄົດອັນໃກ້ນີ້.

KPL