ຂປລ
ທ່ານ ສີ ຈິ້ນຜິງ, ປະທານ ປະເທດຈີນ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ມິເຊວ ມາຕິນ ນາຍົກລັດຖະມົນຕີອຽກລັງ ທີ່ເດີນທາງມາຢ້ຽມຢາມ ສປ ຈີນ ຢ່າງເປັນທາງການ.
ຂປລ.ວິທະຍຸ-ໂທລະພາບ ສູນກາງຈີນຫລື CMG, ວັນທີ 5 ມັງກອນນີ້ ຢູ່ຫໍສະພາ ປະຊາຊົນ ແຫ່ງຊາດ ທີ່ນະຄອນຫລວງປັກກິ່ງ, ທ່ານ ສີ ຈິ້ນຜິງ, ປະທານ ປະເທດຈີນ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ມິເຊວ ມາຕິນ ນາຍົກລັດຖະມົນຕີອຽກລັງ ທີ່ເດີນທາງມາຢ້ຽມຢາມ ສປ ຈີນ ຢ່າງເປັນທາງການ. ໃນໂອກາດນີ້ ທ່ານ ສີ ຈິ້ນຜິງ, ຊີ້ໃຫ້ເຫັນວ່າ: ສປ ຈີນ ຍິນດີຮ່ວມກັບ ອຽກລັງ ເພີ່ມທະວີ ການແລກປ່ຽນ ທາງດ້ານຍຸດທະສາດ, ລົງເລິກ ຄວາມໄວ້ເນື້ອ ເຊື່ອໃຈກັນ ທາງການເມືອງ, ເປີດກວ້າງການຮ່ວມມື ທີ່ຕິດແທດຕົວຈິງ, ເພື່ອສ້າງຄວາມຜາສຸກ ໃຫ້ແກ່ ປະຊາຊົນ ຂອງສອງປະເທດ, ເພີ່ມພະລັງແຮງ ເຂົ້າໃນການຂະຫຍາຍ ການພົວພັນ ລະຫວ່າງ ສປ ຈີນ-ເອີຣົບ. ສປ ຈີນ ຍິນດີເພີ່ມທະວີ ການຮ່ວມມື ດ້ານເສດຖະກິດ ການຄ້າກັບ ອຽກລັງ, ເຊື່ອມຕໍ່ຍຸດທະສາດ ການພັດທະນາ ໃນຂົງເຂດ ປັນຍາປະດິດ, ເສດຖະກິດ ດີຈີຕອນ ແລະ ຂົງເຂດອື່ນໆ, ຊຸກຍູ້ ການລົງທຶນຕໍ່ກັນ, ບັນລຸການຊ່ວຍຊູຍູ້ໜູນກັນ ທາງດ້ານທ່າແຮງ, ຊົມໃຊ້ກາລະໂອກາດ ແລະ ພັດທະນາຮ່ວມກັນ. ທ່ານ ມິເຊວ ມາຕິນ ກ່າວວ່າ: ອຽກລັງ ຍຶດໝັ້ນປະຕິບັດ ນະໂຍບາຍ ປະເທດຈີນດຽວ, ຍິນດີຮ່ວມກັບ ສປ ຈີນ ລົງເລິກການຮ່ວມມື ໃນຂົງເຂດການຄ້າ, ການລົງທຶນ, ວິທະຍາສາດ ເຕັກໂນໂລຊີແລະ ຂົງເຂດອື່ນໆ. ສປ ຈີນ ໄດ້ເສີມຂະຫຍາຍບົດບາດ ສຳຄັນທີ່ຂາດບໍ່ໄດ້ໃນ ວຽກງານສາກົນ. ການແກ້ໄຂ ຄວາມຂັດແຍ້ງສາກົນໃດໆ ລ້ວນແຕ່ຄວນເຄົາລົບ ແລະ ປະຕິບັດ ຕາມກົດໝາຍສາກົນ. ອຽກລັງ ຍິນດີຮັກສາການ ຕິດຕໍ່ພົວພັນ ແລະ ການປະສານງານ ຢ່າງແໜ້ນແຟ້ນກັບ ສປ ຈີນ ເພື່ອປົກປັກຮັກສາ ກົດໝາຍສາກົນ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
