ຂປລ
ທ່ານ ເຊິງຊິວຜິງ ຮອງລັດຖະມົນຕີ ກະຊວງການຄ້າຈີນ ໄດ້ກ່າວວ່າ: ກະຊວງການຄ້າຈີນ ຈະຮ່ວມກັບ ພາກສ່ວນທີ່ກ່ຽວຂ້ອງ ວາງຫລາຍນະໂຍບາຍ ແລະ ມາດຕະການ ເພື່ອຊຸກຍູ້ ການສົ່ງອອກ ການບໍລິການ, ເພີ່ມທະວີ ໃນດ້ານການເງິນ, ພາສີ, ການທະນາຄານ ແລະ ການຫັນການຕິດຕາມຄຸ້ມຄອງ ໃຫ້ມີຄວາມສະດວກ ສະບາຍ ກວ່າເກົ່າ ເພື່ອຊຸກຍູ້ ການຄ້າສົ່ງອອກ ການບໍລິການຕື່ມອີກ.
ຂປລ.ວິທະຍຸສາກົນແຫ່ງ ສປ ຈີນ, ວັນທີ 27 ສິງຫານີ້, ທ່ານ ເຊິງຊິວຜິງ ຮອງລັດຖະມົນຕີ ກະຊວງການຄ້າຈີນ ໄດ້ກ່າວວ່າ: ກະຊວງການຄ້າຈີນ ຈະຮ່ວມກັບ ພາກສ່ວນທີ່ກ່ຽວຂ້ອງ ວາງຫລາຍນະໂຍບາຍ ແລະ ມາດຕະການ ເພື່ອຊຸກຍູ້ການສົ່ງອອກ ການບໍລິການ, ເພີ່ມທະວີ ໃນດ້ານການເງິນ, ພາສີ, ການທະນາຄານ ແລະ ການຫັນການຕິດຕາມ ຄຸ້ມຄອງ ໃຫ້ມີຄວາມສະດວກ ສະບາຍ ກວ່າເກົ່າ ເພື່ອຊຸກຍູ້ ການຄ້າສົ່ງອອກ ການບໍລິການຕື່ມອີກ.ໃນດ້ານນະໂຍບາຍການເງິນ ແລະ ພາສີ ຈະນຳໃຊ້ຊ່ອງທາງເງິນທຶນ ທີ່ມີຢູ່ໃນປັດຈຸບັນ ຂອງສູນກາງ ແລະ ທ້ອງຖິ່ນ ໃຫ້ດີ, ເພີ່ມຄວາມແຮງໃນການສະໜັບສະໜູນ ຂົງເຂດສຳຄັນ ແລະ ໂຄງການສຳຄັນ ໃນດ້ານການສົ່ງອອກ ການບໍລິການ; ເພີ່ມທະວີ ການພັດທະນາ ແບບປະດິດສ້າງໃໝ່ ໃນຂົງເຂດ ການຄ້າ ການບໍລິການ ເພື່ອດຶງດູດ ການລົງທຶນ ຈາກກອງທຶນຕ່າງໆ ແລະ ດຶງດູດທຶນ ຈາກສັງຄົມໃຫ້ລົງທຶນ ເຂົ້າໃນຂົງເຂດ ການຄ້າ ການບໍລິການ ແລະ ການຄ້າດິຈີຕອນ ໃຫ້ຫລາຍກວ່າເກົ່າ. ໃນດ້ານການຫັນການຕິດຕາມຄຸ້ມຄອງ ໃຫ້ມີຄວາມສະດວກສະບາຍ ຈະປັບປຸງ ລະບຽບການຕິດຕາມຄຸ້ມຄອງ ດ້ານພາສີໃຫ້ສົມບູນຂຶ້ນຕື່ມ; ອຳນວຍຄວາມສະດວກ ໃຫ້ແກ່ການໄປມາຫາສູ່ ຂອງປະຊາຊົນ ແລະ ຊຸກຍູ້ໃຫ້ຊາວຕ່າງປະເທດ ເຂົ້າມາບໍລິໂພກຢູ່ ສປ ຈີນ; ໃຫ້ຊຳລະເງິນທຶນ ດ້ານການຄ້າ ການບໍລິການ ມີຄວາມສະດວກຍິ່ງຂຶ້ນ. ໃນດ້ານການບຸກເບີກຕະຫລາດສາກົນ ຈະເສີມຂະຫຍາຍບົດບາດ ຂອງອົງການສື່ກາງ ໃນຂົງເຂດການຄ້າ ການບໍລິການ ໃຫ້ດີຂຶ້ນຕື່ມ ເພື່ອໃຫ້ການຊ່ວຍເຫລືອ ແກ່ວິສາຫະກິດ ຫລາຍກວ່າເກົ່າ ໃນການບຸກເບີກ ຕະຫລາດສາກົນ ແລະ ສະໜັບສະໜູນ ວິສາຫະກິດໄປຈັດ ຫລື ເຂົ້າຮ່ວມງານວາງສະແດງ ຢູ່ຕ່າງປະເທດ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
