ຂປລ
ອີງຕາມຕົວເລກ ຂໍ້ມູນຫລ້າສຸດ ທີ່ອົງການສ່ວຍສາ ອາກອນແຫ່ງຊາດຈີນ ເປີດເຜີຍໃຫ້ຮູ້ວ່າ: 6 ເດືອນຕົ້ນປີນີ້, ລາຍຮັບ ຈາກການຈໍາໜ່າຍ ຂອງວິສາຫະກິດ ໃນທົ່ວປະເທດຈີນ ໄດ້ຮັກສາຈັງຫວະການເຕີບໂຕ ຢ່າງໝັ້ນທ່ຽງ
ຂປລ.ວີທະຍຸສາກົນແຫ່ງ ສປ ຈີນ, ອີງຕາມຕົວເລກ ຂໍ້ມູນຫລ້າສຸດ ທີ່ອົງການສ່ວຍສາ ອາກອນແຫ່ງຊາດຈີນ ເປີດເຜີຍໃຫ້ຮູ້ວ່າ: 6 ເດືອນຕົ້ນປີນີ້, ລາຍຮັບ ຈາກການຈໍາໜ່າຍ ຂອງວິສາຫະກິດ ໃນທົ່ວປະເທດຈີນ ໄດ້ຮັກສາຈັງຫວະການເຕີບໂຕ ຢ່າງໝັ້ນທ່ຽງ, ຂະນະທີ່ ການພັດທະນາ ອຸດສາຫະກໍາ ການຜະລິດຂອງ ສປ ຈີນ ໄດ້ຮັບການຍົກລະດັບ ໃຫ້ມີຄຸນນະພາບສູງຂຶ້ນ ບົນພື້ນຖານ ຄວາມໝັ້ນທ່ຽງ. ຂະນະທີ່ ຈັງຫວະ ການເຕີບໂຕ ຂອງລາຍຮັບຈາກການຈໍາໜ່າຍຂອງອຸດສາຫະກໍາ ການຜະລິດ ເພີ່ມຂຶ້ນ 1,5% ເມື່ອທຽບໃສ່ ຈັງຫວະ ການເຕີບໂຕລວມ ຂອງວິສາຫະກິດ ໃນທົ່ວປະເທດ, ກາຍເປັນສິ່ງຄໍ້າປະກັນ ທີ່ສໍາຄັນ ໃນການຮັກສາການເຕີບໂຕ ຂອງເສດຖະກິດຢ່າງໝັ້ນທ່ຽງ. ພ້ອມດຽວກັນນີ້, ລາຍຮັບຈາກການຈໍາໜ່າຍ ຂອງອຸດສາຫະກໍາເຕັກໂນໂລຊີສູງ ເພີ່ມຂຶ້ນ 14,3% ເມື່ອທຽບໃສ່ ໄລຍະດຽວກັນ ຂອງປີ 2024, ໄດ້ຮັກສາຈັງຫວະ ການເຕີບໂຕ ຢ່າງວ່ອງໄວ. ຍອດມູນຄ່າ ການຈັດຊື້ ອຸປະກອນກົນຈັກ ຂອງວິສາຫະກິດ ໃນທົ່ວປະເທດເພີ່ມຂຶ້ນ 11,1% ເມື່ອທຽບໃສ່ ໄລຍະດຽວກັນຂອງປີ 2024 ໂດຍໄດ້ຮັກສາທ່າອ່ຽງການເຕີບໂຕ ຢ່າງວ່ອງໄວນັບແຕ່ປີ 2024 ເປັນຕົ້ນມາ. ນອກນີ້, ຍອດມູນຄ່າ ການຈໍາໜ່າຍ ລະຫວ່າງ ແຂວງຕ່າງໆຂອງ ສປ ຈີນ ກວມເອົາ 40,7% ຂອງຍອດມູນຄ່າການຈໍາໜ່າຍ ຂອງວິສາຫະກິດ ໃນທົ່ວປະເທດ ເພີ່ມຂຶ້ນ 0,6% ເມື່ອທຽບໃສ່ ໄລຍະດຽວກັນຂອງປີ 2024./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
