ຂປລ
ທ່ານ ສີ ຈິ້ນຜິງ ປະທານ ປະເທດຈີນ ໄດ້ສົນທະນາກັບ ທ່ານ ລີເຈມຽງ ປະທານາທິບໍດີ ສ ເກົາຫລີ ຜ່ານທາງ ໂທລະສັບ. ທ່ານ ສີ ຈິ້ນຜິງ ໄດ້ສະແດງ ຄວາມຊົມເຊີຍຕໍ່ ທ່ານ ລີເຈມຽງ ອີກຄັ້ງໜຶ່ງ ທີ່ໄດ້ຮັບເລືອກຕັ້ງ ເປັນປະທານາທິບໍດີ ສ ເກົາຫລີ.
ຂປລ.ວິທະຍຸ ສາກົນ ແຫ່ງ ສປ ຈີນ, ວັນທີ 10 ມິຖຸນານີ້, ທ່ານ ສີ ຈິ້ນຜິງ ປະທານ ປະເທດຈີນ ໄດ້ສົນທະນາກັບ ທ່ານ ລີເຈມຽງ ປະທານາທິບໍດີ ສ ເກົາຫລີ ຜ່ານທາງ ໂທລະສັບ. ທ່ານ ສີ ຈິ້ນຜິງ ໄດ້ສະແດງ ຄວາມຊົມເຊີຍຕໍ່ ທ່ານ ລີເຈມຽງ ອີກຄັ້ງໜຶ່ງ ທີ່ໄດ້ຮັບເລືອກຕັ້ງ ເປັນປະທານາທິບໍດີ ສ ເກົາຫລີ. ທ່ານ ສີ ຈິ້ນຜິງ ຊີ້ໃຫ້ເຫັນວ່າ: ສປ ຈີນ ແລະ ສ ເກົາຫລີ ແມ່ນບ້ານໃກ້ ເຮືອນຄຽງ ທີ່ບໍ່ສາມາດ ຍົກຍ້າຍໜີໄດ້. ນັບແຕ່ ສ້າງຕັ້ງ ສາຍພົວພັນ ທາງການທູດ ຮ່ວມກັນ ເປັນເວລາ 33 ປີມານີ້, ທັງສອງປະເທດ ໄດ້ຕັ້ງໜ້າ ຊຸກຍູ້ການແລກປ່ຽນ ແລະ ການຮ່ວມມື ໃນຂົງເຂດຕ່າງໆ, ບັນລຸ ການຊ່ວຍ ຊູກຍູ້ ໜູນກັນ ແລະ ພັດທະນາ ຮ່ວມກັນ. ສາຍພົວພັນ ລະຫວ່າງ ສປ ຈີນ-ສ ເກົາຫລີ ທີ່ປອດໃສ, ໝັ້ນທ່ຽງ ແລະກ້າວສູ່ລວງເລິກ ຢ່າງບໍ່ຢຸດຢັ້ງ ແມ່ນສອດຄ່ອງກັບ ກະແສ ແຫ່ງການພັດທະນາ ຂອງຍຸກສະໄໝ, ສອດຄ່ອງກັບ ຜົນປະໂຫຍດ ພື້ນຖານ ຂອງປະຊາຊົນ ສອງປະເທດ, ທັງມີຜົນດີ ຕໍ່ສັນຕິພາບ, ສະຖຽນລະພາບ, ການພັດທະນາ ແລະ ຄວາມຈະເລີນ ຮຸ່ງເຮືອງ ຂອງພາກພື້ນ ກໍຄືທົ່ວໂລກ. ໃນໂອກາດນີ້ ທ່ານ ສີ ຈິ້ນຜິງ ເນັ້ນໜັກວ່າ: ສປ ຈີນ ແລະ ສ ເກົາຫລີ ຄວນຍຶດໝັ້ນຈຸດປະສົງ ແຕ່ຫົວທີ ຂອງການສ້າງຕັ້ງ ສາຍພົວພັນ ທາງການທູດ, ຍຶດໝັ້ນ ທິດທາງ ທີ່ມີໄມຕີຈິດ ມິດຕະພາບ ແບບບ້ານໃກ້ ເຮືອນຄຽງ, ຍຶດໝັ້ນ ເປົ້າໝາຍ ທີ່ຕ່າງຝ່າຍ ຕ່າງໄດ້ຮັບຜົນປະໂຫຍດ, ຊຸກຍູ້ ໃຫ້ສາຍພົວພັນ ຄູ່ຮ່ວມມື ຍຸດທະສາດ ລະຫວ່າງ ສປ ຈີນ-ສ ເກົາຫລີ ນັບມື້ກ້າວຂຶ້ນສູ່ ລະດັບ ສູງກວ່າເກົ່າ, ສ້າງຄວາມຜາສຸກ ຫລາຍກວ່າເກົ່າ ໃຫ້ແກ່ ປະຊາຊົນ ສອງປະເທດ, ທັງເພີ່ມ ຄວາມແນ່ນອນ ຫລາຍກວ່າເກົ່າ ໃຫ້ແກ່ ສະຖານະການ ໃນພາກພື້ນ ແລະ ສາກົນ ທີ່ມີການປ່ຽນແປງ ຢ່າງສະຫລັບ ຊັບຊ້ອນ. ທ່ານ ລີເຈມຽງ ໄດ້ສະແດງຄວາມເຫັນດີ ເຫັນພ້ອມ ຕໍ່ຄຳເຫັນຂອງທ່ານ ສີ ຈິ້ນຜິງ ແລະ ກ່າວວ່າ: ການໄປມາຫາສູ່ກັນລະຫວ່າງ ສ ເກົາຫລີ- ສປ ຈີນ ມີປະຫວັດສາດ ດົນນານ, ການແລກປ່ຽນ ດ້ານເສດຖະກິດ ການຄ້າ ແລະ ວັດທະນະທຳ ມີຄວາມແໜ້ນແຟ້ນ. ພາຍໃຕ້ ການຊີ້ນຳ ນຳພາ ທີ່ດີເດັ່ນ ຂອງທ່ານ ສີ ຈິ້ນຜິງ, ສປ ຈີນ ໄດ້ປະສົບ ຜົນສຳເລັດ ໃນດ້ານການພັດທະນາ ທີ່ຍິ່ງໃຫຍ່ ເຊິ່ງຖືເປັນສິ່ງ ທີ່ໜ້າຊົມເຊີຍ. ຂ້າພະເຈົ້າ ໃຫ້ຄວາມສຳຄັນ ເປັນຢ່າງສູງ ຕໍ່ສາຍສຳພັນ ລະຫວ່າງ ສ ເກົາຫລີ- ສປ ຈີນ, ຍິນດີຮ່ວມກັບ ສປ ຈີນ ຊຸກຍູ້ ໃຫ້ສາຍພົວພັນ ໄມຕີຈິດ ມິດຕະພາບ ແບບບ້ານໃກ້ ເຮືອນຄຽງ ລະຫວ່າງ ສອງຝ່າຍ ໄດ້ຮັບການພັດທະນາ ນັບມື້ ກ້າວສູ່ລວງເລິກ, ປັບປຸງ ແລະ ເພີ່ມທະວີ ສາຍສຳພັນ ລະຫວ່າງ ປະຊາຊົນ ສອງປະເທດ ເພື່ອເຮັດໃຫ້ ການຮ່ວມມື ລະຫວ່າງ ສ ເກົາຫລີ-ສປ ຈີນ ໄດ້ຮັບໝາກຜົນ ຫລາຍກວ່າເກົ່າ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
