ຂປລ. ​ໃນ​ໂອກາດ​ສະ​ເຫຼລີມສະຫລອງ ວັນ​ກໍາມະກອນ​ສາກົນ 1 ພຶດສະພາ ​ຄົບຮອບ 139 ປີ (1 ພຶດສະພາ 1886-1 ພຶດສະພາ 2025) ສູນ​ກາງ​ສະຫະພັນ​ກໍາມະບານ​ລາວ​ ​ໄດ້​ກະກຽມຫລາຍ​ກິດຈະກຳ ​ເພື່ອ​ສະ​ເຫລີ​ມສະຫລອງ​ວັນ​ສໍາຄັນ​ດັ່ງກ່າວ ​ມີ​​ຄວາມໝາຍສຳຄັນ, ມີເນື້ອ​ໃນເລິກ​ເຊິ່ງ ​ແລະ ກວ້າງ​ຂວາງ, ພ້ອມກັນຫວນຄືນມູນເຊື້ອ ປະຫວັດຄວາມເປັນມາ ຂອງວັນກໍາມະກອນສາກົນ ຊຶ່ງເປັນວັນທີ່ມີຄວາມໝາຍຄວາມສຳຄັນ ຂອງຊົນຊັ້ນກຳມະກອນ ແລະ ຊາວຜູ້ອອກແຮງງານ ໃນທົ່ວໂລກໄດ້ລຸກຮືຂຶ້ນ ເພື່ອ​ຕໍ່ສູ້​ກັບ​ຊົນ​ຊັ້ນ​ນາຍທຶນ, ທວງ​ໃຫ້​ພວກ​ນາຍທຶນ​ເພີ່ມ​ເງິນ​ເດືອນ ​ແລະ ຫຼຸດຜ່ອນ​ຊົ່ວ​ໂມງ​ເຮັດ​ວຽກ​ລົງ.

ທ່ານ ພອນສານ ວິໄລເມັ້ງ ຮອງປະທານຄະນະບໍລິຫານງານ ສູນກາງສະຫະພັນກຳມະບານລາວ ໄດ້​ໃຫ້​ຮູ້​ໃນ​ໂອກາດຖະແຫລງຂ່າວ ກ່ຽວກັບວັນດັ່ງກ່າວໃນວັນທີ 24 ເມສາ ຜ່ານມານີ້ວ່າ: ​ໃນ​ປີ 2025 ນີ້, ສູນ​ກາງ​ສະຫະພັນ​ກໍາມະບານ​ລາວ​ໄດ້​ມີແຈ້ງ​ການ​ເຖິງ ສະຫະພັນ​ກໍາມະບານກະຊວງ, ອົງການ​, ນະຄອນຫລວງ ​ແລະ ແຂວງ ເພື່ອ​ຈັດ​ຕັ້ງ​ການສະ​ເຫລີ​ມສະຫລອງ​ ວັນ​ກໍາມະກອນສາກົນ ໃຫ້​ມີເນື້ອ​ໃນ ເລິກ​ເຊິ່ງ ​ແລະ ກວ້າງ​ຂວາງ ​ເປັນ​ຕົ້ນ ຈັດ​ຕັ້ງ​​ປາຖະກະຖາ​ມູນ​ເຊື້ອ​ວັນ​ກໍາມະກອນ​ສາກົນ​ ຄົບຮອບ 139 ປີ ​ເພື່ອ​ເປັນ​ການ​​ໂຄສະນາ​ສຶກສາ​ອົບຮົມ ​ໃຫ້​ແກ່ສະມາຊິກ​ກໍາມະບານ, ກໍາມະກອນ ​ແລະ ຜູ້​ອອກ​ແຮງ​ງານ​ ໃຫ້​ຮັບ​ຮູ້​, ເຂົ້າ​ໃຈ​​ ແລະ ລະນຶກເຖິງມູນເຊື້ອການກໍາເນີດ ເຕີບໃຫຍ່ຂອງຊົນຊັ້ນກໍາມະກອນສາກົນ ແລະ ​ຊົນຊັ້ນກໍາມະກອນ​ລາວ ໃນໄລຍະຜ່ານມາ ກໍຄື ປັດຈຸບັນຕາມເງື່ອນໄຂ ແລະ ຄວາມເໝາະສົມຂອງແຕ່ລະບ່ອນ; ຈັດກິດຈະກໍາຖາມ-ຕອບ ຄວາມຮູ້ກ່ຽວກັບ ວັນກໍາມະກອນສາກົນ ຜ່ານສື່ ຫລື ເຮັດແບບຊຶ່ງໜ້າດ້ວຍບັນຍາກາດທີ່ເບີກບານມ່ວນຊື່ນ ແລະ ມີເນື້ອໃນ; ຈັດກິດຈະກໍາ​ຍ່າງ​ເພື່ອ​ສຸຂະພາບ 1 ພຶດສະພາ ຄົບຮອບ 139 ປີ ຢູ່ທີ່ສວນປະຕູໄຊ; ຈັດການ​ແຂ່ງຂັນກິລາຕີກັອຟ ເພື່ອລະດົມທຶນກະກຽມກອງປະຊຸມໃຫຍ່ຜູ້ແທນກຳມະບານລາວ ທົ່ວປະເທດຄັ້ງທີ IX; ຈັດຂະບວນການອະນາໄມລວມ, ອະນາໄມສະຖານທີ່ສຳນັກງານ, ອົງການ ແລະ ສະຖານທີ່ສາທາລະນະໃຫ້ມີຄວາມສະອາດງາມຕາ ພ້ອມທັງຮັກສາສິ່ງແວດລ້ອມໃຫ້ດີ. ສຳລັບສະຫະພັນກໍາມະບານກະຊວງ, ອົງການ, ນະຄອນຫລວງ, ແຂວງ, ສະຫະພັນກໍາມະບານເມືອງ, ນະຄອນ, ກໍາມະບານຮາກຖານ ແລະ ຫົວໜ່ວຍແຮງງານ ໃຫ້ຈັດຕັ້ງການອອກແຮງງານອະນາໄມ ຕາມສຳນັກງານ, ອົງການ, ສະຖານທີ່ເຮັດວຽກ ແລະ ສະຖານທີ່ຕ່າງໆຕາມເງື່ອນໄຂ, ຄວາມເໝາະສົມຕົວຈິງ; ລົງໂຄສະນາເຄື່ອນທີ່ຢູ່ຕາມຫົວໜ່ວຍ ແຮງງານເພື່ອສ້າງຄວາມຮັບຮູ້ ໃຫ້ແກ່ກໍາມະກອນ, ມີກິດຈະກໍາຖາມ-ຕອບຕ່າງໆ ພ້ອມທັງໂຄສະນາຜ່ານສື່ຂອງກໍາມະບານ ແລະ ສື່ຕ່າງໆ ໃຫ້ມີບັນຍາກາດຟົດຟື້ນ ແລະ ກວ້າງຂວາງ.

 ການ​ຈັດ​ກິດຈະກຳ​ດັ່ງກ່າວ ກໍ​ເພື່ອຫວນຄືນມູນເຊື້ອ, ປະຫວັດຄວາມເປັນມາ ຂອງວັນກໍາມະ ກອນສາກົນ ຊຶ່ງເປັນວັນທີ່ມີຄວາມໝາຍ ຄວາມສຳຄັນຂອງຊົນຊັ້ນກຳມະກອນ ແລະ ຊາວຜູ້ອອກແຮງງານໃນທົ່ວໂລກ ໄດ້ລຸກຮືຂຶ້ນເພື່ອ​ຕໍ່ສູ້​ກັບ​ຊົນ​ຊັ້ນ​ນາຍທຶນ, ທວງ​ໃຫ້​ພວກ​ນາຍທຶນ​ເພີ່ມ​ເງິນ​ເດືອນ ​ແລະ ຫລຫລຸດຜ່ອນ​ຊົ່ວ​ໂມງ​ເຮັດ​ວຽກ​ລົງ. ຂະ​ບວນການ​ຕໍ່ສູ້​ຄັ້ງ​ທຳ​ອິດ​ ແມ່ນ​ຢູ່​ປະ​ເທດອັງກິດ​ ໃນ​ປີ 1764 ​ເພາະ​​ປະ​ເທດ​ອັງກິດ​ໃນ​​ເວລາ​ນັ້ນ​ ເປັນ​ປະ​ເທດ​ທີ່​ຂະຫຍາຍຕົວ​ທາງ​ດ້ານ​ອຸດສາຫະກຳ​ໄວກວ່າ​ໝູ່, ໃນ​ເດືອນພະຈິກ ປີ 1884 ຢູ່​ເມືອງ​ຫລວງ​ຊິ​ກາ​ໂກ ​ເປັນ​ຈຸດ​ໃຈກາງ​ອຸດສາຫະກຳ ​ຂອງ​ປະ​ເທດ​ອາ​ເມ​ລິ​ກາ ຂະ​ບວນກຳມະກອນ ​ໄດ້​ມີ​ການ​ຕໍ່ສູ້​ກັບ​ພວກ​ນາຍທຶນ​ຢ່າງ​ຮຸ່ນ​ແຮງ​, ​ຮຽກຮ້ອງ ແລະ ປຸກ​ລະດົມໃຫ້ກຳມະກອນ, ຊາວ​ຜູ້​ອອກ​ແຮງ​ງານ​ທຸກ​ທົ່ວ​ໜ້າ​ ກຽມພ້ອມ​ຕໍ່ສູ້​ເພື່ອ​ທວງ​ເອົາ​ສິດ​ຂອງ​ຕົນ. ມາ​ໃນວັນ​ທີ 1 ພຶດສະພາ 1886 ​ເປັນ​ເທື່ອ​ທຳ​ອິດ​ທີ່ຊົນ​ຊັ້ນ​ກຳມະກອນ ​ແລະ ຊາວ​ຜູ້​ອອກ​ແຮງ​ງານ​ ໃນ​ປະ​ເທດ​ອາ​ເມ​ລິກາ ໄດ້​ມີ​ການ​ຕໍ່ສູ້​​ ໂດ​ຍອີງ​ໃສ່ເນື້ອ​ໃນ​ຂອງ​ຖະ​ແຫລ​ງການ​ ຮຽກຮ້ອງ​ໃຫ້​ພວກ​ນາຍທຶນ ​ຕ້ອງ​ປະຕິບັດ​ຕາມ​ ການສະ​ເໜີ​ຂອງ​ກຳມະກອນ​ວ່າ: “​ແຕ່​ນີ້​ຕໍ່​ໄປ​ບໍ່​ໃຫ້​ກຳມະກອນ​ຜູ້​ໃດ​ເຮັດ​ວຽກ​ເກີນ 8 ຊົ່ວ​ໂມງ​ຕໍ່​ມື້, 8 ຊົ່ວ​ໂມງ​ພັກຜ່ອນ ​ແລະ 8 ຊົ່ວ​ໂມງ​ຮໍ່າຮຽນ” ​​ໃນ​ມື້​ນັ້ນ​ໄດ້​ມີ​ກຳມະກອນ​ນັດ​ຢຸດ​ງານ​ເຖິງ 5.000 ​ແຫ່ງ​ໃນ​ຕົວ​ເມືອງ​ໃຫຍ່​ ຂອງ​ປະ​ເທດ​ອາ​ເມລິກາ​ເຊັ່ນ: ນິວຢອກ, ບານ​ຕີ​ມໍ, ວໍ​ຊິງ​ຕັນ ​ແລະ ອື່ນໆ ​ໄດ້​ຮຽກຮ້ອງ ​ແລະ ບັງຄັບ​ໃຫ້​ນາຍທຶນ​ຕ້ອງ​ຮັບຮອງ​ ເອົາ​ສິດ​ໃນ​ການ​ເຮັດ​ວຽກ​ ຂອງ​ກຳມະກອນ​ ໃນ​ມື້ໜຶ່ງ 8 ຊົ່ວ​ໂມງ. ​ຕໍ່​ໜ້າສະພາບ​ການ​ຄື​ແນວ​ນັ້ນ, ວັນ​ທີ 14 ກໍລະກົດ ປີ 1889 ກອງ​ປະຊຸມ​ພັກ​ກອມ​ມູນິດ​ສາກົນ ​ຄັ້ງ​ທີ II ​ໄດ້​ເປີດ​ຂຶ້ນ​ຢູ່ທີ່​ນະຄອນຫລວງປາຣີ (ປະ​ເທດ​ຝຣັ່ງ), ມີຜູ້ແທນເຂົ້າຮ່ວມກອງປະຊຸມທັງ​ໝົດ 393 ຄົນ ຊຶ່ງ​ແມ່ນ​ຜູ້​ແທນ​ມາ​ຈາກ 22 ປະ​ເທດ, ​ເອີ​ຣົບ, ອາ​ເມ​ລິ​ກາ ​ແລະ ອາກຊັງ​ຕິນ, ທີ່ປະຊຸມ​ໄດ້​ຜ່ານ​ໂຄງການ​ດຳ​ເນີນ​ງານ​ສຳຄັນ​ຄື: ຊົນ​ຊັ້ນ​ກຳມະກອນ​ສາມັກຄີ​ຕໍ່ສູ້ ແມ່ນ ທວງ​ເອົາ​ສິດ ແລະ ຜົນ​ປະ​ໂຫຍ​ດຂອງ​ຕົນ​ຢູ່​ ບັນດາ​ປະ​ເທດ​ທຶນ​ນິຍົມ ​ແລະ ຣັດ​ເຊຍ​ ໂດຍ​ໂຄ່ນ​ລົ້ມ​ລະບອບ​ນາຍທຶນ ​ເພື່ອ​ປະຕິບັດ​ຄຳ​ຂັວນ “ມື້ໜຶ່ງ​ເຮັດ​ວຽກ 8 ຊົ່ວ​ໂມງ ​ແລະ ກຳນົດ​ເອົາວັນ​ທີ 1 ພຶດສະພາ 1886 ​ເປັນ​ວັນ​ກຳມະກອນ​ສາກົນ”, ນັບແຕ່​ນັ້ນ​ມາ “ວັນ​ທີ 1 ​ພຶດສະພາ ຂອງ​ທຸກໆ​ປີ ຈຶ່ງ​ໄດ້​ກາຍ​ເປັນ​ວັນ​ບຸນ​ໃຫຍ່ ​ຂອງ​ຊົນ​ຊັ້ນ​ກຳມະກອນ​ໃນທົ່ວໂລກ”.

KPL