*ປີຜ່ານມາໂຮງງານປຸງແຕ່ງທອງ-ຄຳພູຄຳ ສາມາດຂົນແຮ່ອອກຈາກບໍ່ໄປໃສ່ໂຮງງານ ແລະ ຂົນສິ່ງເສດເຫລືອທີ່ບໍ່ແມ່ນແຮ່ອອກຈາກບໍ່ໄດ້ປະມານ 30 ລ້ານໂຕນ ເຊິ່ງການສຳປະທານຂອງໂຮງງານດັ່ງກ່າວ ຈະດຳເນີນໄປຮອດໄຕມາດທໍາອິດຂອງປີ 2026 ພາຍຫລັງສິ້ນສຸດການດຳເນີນໂຄງແລ້ວ ຕາມແຜນແມ່ນຈະຖົມຄືນກ່ອນມອບໃຫ້ລັດຖະບານກໍຄືອົງການປົກຄອງທ້ອງຖິ່ນເພື່ອນຳໃຊ້ໃນອະນາຄົດ.

    ທ່ານ ຂັນຊະນະ ຫົວໜ້າດູແລ ການຂຸດຄົ້ນພາກສະໜາມໂຮງງານປຸງແຕ່ງທອງ-ຄຳພູຄຳ ບໍລິສັດ ພູເບ້ຍ ມາຍນິງ ຈຳກັດ ເມືອງອານຸວົງ ແຂວງໄຊສົມບູນ ໃຫ້ສຳພາດຕໍ່ສື່ມວນຊົນເມື່ອບ່ໍດົນນີ້ວ່າ: ການຂຸດຄົ້ນບໍ່ທອງ-ຄຳພູຄຳ ເລີ່ມມາແຕ່ປີ 2007 ການ ຂຸດຄົ້ນເປັນບໍ່ເປີດມີເນື້ອທີ່ປະມານ 3 ກິໂລແມັດ ເລິກປະມານ 300-400 ກວ່າແມັດ ເປັນບ່ໍທອງແດງ. ໃນ ປີ 2024 ສາມາດຂົນແຮ່ອອກຈາກບໍ່ໄປໃສ່ໂຮງງານຂົນສິ່ງເສດເຫລືອອອກຈາກ ບໍ່ໄດ້ປະມານ 30 ລ້ານໂຕນ ເຫັນວ່າການຈັດຕັ້ງປະຕິບັດແມ່ນສາມາດບັນລຸໄດ້ຕາມເປົ້າໝາຍທ່ີວາງໄວ້. ສຳລັບປີ 2025 ນີ້, ກຳລັງຂຸດຄົ້ນຢູ່ຈຸດທີ 8 ເປົ້າໝາຍ ໃຫ້ສາມາດຂົນແຮ່ ແລະ ສິ່ງເສດເຫລືອອອກຈາກບໍ່ໃຫ້ໄດ້ປະມານ 29 ລ້ານໂຕນ ເຊິ່ງມາຮອດປັດຈຸບັນກຳລັງດຳເນີນການຂຸດຄົ້ນໄປໄດ້ດີພໍສົມຄວນ.

     ຢ່າງໃດກໍດີ ໄປຄຽງຄູ່ກັບການຂຸດຄົ້ນໂຮງງານປຸງແຕ່ງທອງ-ຄຳພູຄຳ ຍັງໄດ້ເອົາໃຈໃສ່ດ້ານຄວາມປອດໂດຍນຳໃຊ້ລະບົບຄວາມປອດໄພຂອງສາກົນເຊັ່ນ: ການຄຸ້ມຄອງຄວາມປອດໄພຂອງພະນັກງານ, ການຄຸ້ມຄອງພາຫະນະຮັບໃຊ້ຕ່າງໆໄດ້ຮັບການກວດກາ ມາດຕະຖານດ້ານເຕັກນິກຕ່າງໆຂອງສາກົນວາງອອກ. ພ້ອມດຽວກັນນັ້ນ, ກໍໄດ້ເອົາໃຈໃສ່ຕໍ່ການຮັກສາສິ່ງແວດລ້ອມຢ່າງເຄັ່ງຄັດ ໂດຍນຳໃຊ້ລະບົບການຈັດການສິ່ງແວດລ້ອມສາກົນ, ການຈັດການນໍ້າເສຍບໍ່ໃຫ້ໄຫລລົງສູ່ແມ່ນໍ້າເດັດຂາດກວດຄຸ້ມຄອງສານເຄມີທີ່ນຳໃຊ້ໃນໂຮງງານບໍ່ໃຫ້ໄຫລໄປສູ່ພາຍນອກກ່ອນມີການບຳບັດໃຫ້ມີຄວາມປອດໄພ.

ໂດຍ: ຢ່່າຕົ່ງ

KPL