ຂປລ
ທ່ານ ໂດນັນ ທຣຳ, ວ່າທີ ປະທານາທິບໍດີ ສະຫະລັດ ອາເມລິກາ ກ່າວວ່າ: ຈະເຊັນ ລັດຖະດຳລັດ ທີ່ຂຶ້ນພາສີ 10% ຕໍ່ສິນຄ້າຂອງ ສປ ຈີນ ໃນມື້ທຳອິດ ທີ່ຕົນຂຶ້ນ ດຳລົງຕຳແໜ່ງ ປະທານາທິບໍດີ ຢ່າງເປັນທາງການ ໃນວັນທີ 20ມັງກອນນີ້.
ຂປລ.ວິທະຍຸ ສາກົນ ແຫ່ງ ສປ ຈີນ, ທ່ານ ໂດນັນ ທຣຳ, ວ່າທີ ປະທານາທິບໍດີ ສະຫະລັດ ອາເມລິກາ ກ່າວວ່າ: ຈະເຊັນ ລັດຖະດຳລັດ ທີ່ຂຶ້ນພາສີ 10% ຕໍ່ສິນຄ້າຂອງ ສປ ຈີນ ໃນມື້ທຳອິດ ທີ່ຕົນຂຶ້ນ ດຳລົງຕຳແໜ່ງ ປະທານາທິບໍດີ ຢ່າງເປັນທາງການ ໃນວັນທີ 20ມັງກອນນີ້. ພາຍຫລັງ ຫລາຍປີຜ່ານມາ ສົງຄາມ ຂຶ້ນພາສີ ຕໍ່ສິນຄ້າຈີນ ທີ່ ສ.ອາເມລິກາ ກໍ່ຂຶ້ນ ໄດ້ສ້າງຜົນກະທົບ ຕໍ່ຜູ້ອື່ນ ແລະ ກໍກະທົບເຖິງ ຕົນເອງ ເຊັ່ນກັນ, ຜູ້ໄດ້ຮັບຜົນກະທົບ ຕົ້ນຕໍ່ ແມ່ນປະຊາຊົນ ແລະ ວິສາຫະກິດ ອາເມລິກາ. ຕາມຜົນການສຳຫລວດ ພົນລະເມືອງ ສະຫະລັດ ອາເມລິກາ 2.000 ຄົນ ໃນເດືອນທັນວາປີກາຍນີ້ ສະແດງ ໃຫ້ເຫັນວ່າ: ມີ 1 ສ່ວນ 3 ໄດ້ເພີ່ມການຈັດຊື້ ແລະ ສະສົມສິນຄ້າ ເນື່ອງຈາກ ຄວາມວິຕົກກັງວົນ ຕໍ່ການຂຶ້ນພາສີ ໃນອະນາຄົດ.ຜົນການຄົ້ນຄວ້າ ຫລາຍຢ່າງສະແດງໃຫ້ເຫັນວ່າ: ຄວາມກົດດັນ ຈາກການຂຶ້ນພາສີ ໄດ້ໂຍນໃສ່ ຜູ້ບໍລິໂພກ ຂອງ ສ.ອາເມລິກາ ໃນທີ່ສຸດ. ຜົນການສຳຫລວດ ຂອງມະຫາວິທະຍາໄລ ຊີກາໂກ ເມື່ອບໍ່ດົນມານີ້ ສະແດງ ໃຫ້ເຫັນວ່າ, ນັກເສດຖະສາດ 98% ເຫັນວ່າ ພາສີສູງດັ່ງກ່າວ ຕົ້ນຕໍແມ່ນ ຜູ້ບໍລິໂພກ ຂອງສ.ອາເມລິກາ ເປັນຜູ້ແບກຫາບ. ອີງຕາມການຄາດຄະເນ ຂອງບໍລິສັດມູດີ, ຜູ້ບໍລິໂພກ ຂອງ ສ.ອາເມລິກາ ໄດ້ແບກຫາບຕົ້ນທຶນ 92% ໃນການຂຶ້ນພາສີຕໍ່ ສປ ຈີນ, ແຕ່ລະປີ ຄອບຄົວອາເມລິກາ ໄດ້ເພີ່ມລາຍຈ່າຍ 1.300 ໂດລາສະຫະລັດ ຍ້ອນການຂຶ້ນພາສີ.ຂະນະທີ່ ສ.ອາເມລິກາ ເຈຕະນາໃຊ້ດ່ານພາສີ ເປັນອາວຸດ, ແຕ່ສົງຄາມພາສີ ບໍ່ສາມາດສະກັດກັ້ນ ການພັດທະນາ ຂອງສປ ຈີນໄດ້ ເນື່ອງຈາກ ການນຳເຂົ້າ ແລະ ສົ່ງອອກສິນຄ້າປະເພດ ຂອງ ສປ ຈີນ ໄດ້ສ້າງສະຖິຕິ ສູງສຸດຄັ້ງໃໝ່ ໃນປະຫວັດສາດ, ເປັນປະເທດໃຫຍ່ ອັນດັບໜຶ່ງ ໃນການຄ້າສິນຄ້າປະເພດ ຈັບບາຍໄດ້ ຂອງໂລກ ເປັນເວລາ 8 ປີລຽນຕິດ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
