*ທ່ານ ກົງແກ້ວ ມີວໍລະຈັກ  ປະທານຄະນະສະມາຊິກສະພາແຫ່ງ ຊາດ ປະຈໍາເຂດເລືອກຕັ້ງທີ 13 ໃຫ້ຮູ້ວ່າ: ເນ່ືອງໃນໂອກາດເຂົ້າຮ່ວມກອງປະຊຸມສະໄໝສາມັນເທື່ອ ທີ 8 ຂອງສະພາແຫ່ງຊາດ ຊຸດທີ IX ທີ່ນະຄອນຫລວງວຽງຈັນ :  ການເຄື່ອນໄຫວວຽກງານໃນໄລຍະຜ່ານມາ  ສະພາປະຊາຊົນແຂວງສະຫວັນນະເຂດ ໄດ້ເອົາໃຈໃສ່ຫລາຍດ້ານເປັນຕົ້ນດ້ານນິຕິບັນຍັດ: ເປັນເຈົ້າການເຂົ້າຮ່ວມການທາບທາມ, ປັບປຸງ, ປະກອບຄໍາເຫັນໃນ ການພິຈາລະນາ, ຮັບຮອງບັນດາຮ່າງກົດໝາຍ ໄດ້ 3 ຄັ້ງ, ມີ 13 ສະບັບ ໃນນັ້ນ ກົດໝາຍທີ່ຈະນໍາ ເຂົ້າພິຈະລະນາ ຮັບຮອງໃນກອງປະຊຸມສະໄໝສາມັນເທື່ອທີ 8 ຂອງ ສະພາແຫ່ງຊາດ ຊຸດທີ IX ຈໍານວນ 9 ສະບັບ. ປະຕິບັດຕາມການມອບໝາຍ ຂອງສະພາແຫ່ງຊາດ, ຄະນະກໍາມະການລະດັບຊາດ ປັບປຸງລັດຖະທໍາມະນູນ ແຫ່ງ ສປປ ລາວ ສະບັບປີ 2015 ໄດ້ການປະເມີນ ການຈັດຕ້ັງປະຕິບັດລັດຖະທໍາມະນູນສະບັບດັ່ງກ່າວ. ນອກຈາກນີ້, ພວກເຮົາຍັງໄດ້ພິຈາລະນາ ແລະ ຮັບຮອງນິຕິກໍາໃຕ້ກົດໝາຍ ຈໍານວນ 2 ສະບັບ ໃນກອງປະຊຸມສະໄໝສາມັນ ເທື່ອທີ 7 ( ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງກອງທຶນໄພພິບັດ ແຂວງ ສະຫວັນນະເຂດ (ສະບັບສ້າງໃໝ່) ແລະ ຂໍ້ຕົກລົງຂອງທ່ານເຈົ້າແຂວງໆ ວ່າດ້ວຍການຄຸ້ມຄອງ ແລະ ນໍາໃຊ້ທີ່ດິນກະສິກໍາ (ສະບັບສ້າງໃໝ່) ແລະ ໃນກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນ ແຂວງ ຊຸດທີ II ຈະນໍາເຂົ້າພິຈາລະນາ ຕື່ມອີກ 3  ສະບັບ , ໃນນີ້ສະບັບປັບປຸງ 2 ສະບັບ, ສ້າງໃໝ່1 ສະບັບ.

    ດ້ານການຕົກລົງບັນຫາພ້ືນຖານ ສໍາຄັນຂອງຊາດ: ຄະນະສະມາຊິກ ສະພາແຫ່ງຊາດ ປະຈໍາເຂດເລືອກ ຕັ້ງໄດ້ຖືສໍາຄັນໃນການຄ້ົນຄວ້າ, ວິເຄາະ, ວິໄຈຢ່າງເລິກເຊິ່ງ ເປັນຕົ້ນການເຂົ້າຮ່ວມຄົ້ນຄວ້າພິຈາລະນາ ແລະ ຮັບຮອງເອົາບັນຫາສໍາຄັນຂອງຊາດ ໃນຂົງເຂດການເມືອງ ແລະ ການປົກຄອງ, ເສດຖະກິດ- ສັງຄົມ, ແຜນງົບປະມານແຫ່ງລັດ, ດ້ານການຈັດຕັ້ງ ແລະ ບຸກຄະລາກອນ ເພື່ອນໍາສະເໜີກອງປະຊຸມ ສະພາແຫ່ງຊາດພິຈາລະນາ ແລະ ຮັບຮອງແນໃສ່ຮັບປະກັນໃນການຈັດຕັ້ງປະຕິບັດໃຫ້ສອດຄ່ອງ ແລະ ແທດເໝາະກັບສະພາບຕົວຈິງ ເຊິ່ງ ສາມາດຮັບຮອງອອກເປັນມະຕິ ຈໍານວນ 20 ສະບັບ. ໃນນີ້ວຽກງານຂົງເຂດລັດຖະບານ 4 ສະບັບ, ວຽກງານອົງການກວດສອບແຫ່ງລັດ 1 ສະບັບ, ວຽກງານສະພາແຫ່ງຊາດ 1 ສະບັບ, ວຽກງານສ້າງ ແລະ ປັບປຸງກົດໝາຍ ຈໍານວນ 13 ສະ ບັບ (ກົດໝາຍສ້າງໃໝ່  2  ສະບັບ, ກົດໝາຍປັບປຸງ 11 ສະບັບ) ວຽກບຸກຄະລາກອນ 1 ສະບັບ. ນອກຈາກນີ້, ໄດ້ເຂົ້າຮ່ວມກອງປະຊຸມ ຂອງຄະນະປະຈໍາສະພາປະຊາຊົນ ແຂວງ, ກອງປະຊຸມປຶກສາຫາລືວຽກງານສໍາຄັນຕ່າງໆ ຮ່ວມກັບອົງການປົກຄອງແຂວງ ກ່ຽວກັບການລົງທຶນຂອງລັດ ໂດຍສະເພາະແມ່ນໂຄງການກໍ່ສ້າງພື້ນຖານໂຄງລ່າງຂອງແຂວງ, ການຕົກລົງນໍາໃຊ້ເງິນເກີນແຜນປີ 2023 ນໍາໃຊ້ ປີ 2024. ດ້ານການຕິດຕາມກວດກາ: ວຽກຕິດຕາມກວດກາຖືເປັນບຸລິມະສິດຂອງສະພາແຫ່ງຊາດ ກໍ່ຄື ສະພາປະຊາຊົນແຂວງເຊ່ິງ ຜ່ານມາພວກເຮົາໄດ້ເຄື່ອນໄຫວ ຕິດຕາມກວດກາຮ່ວມກັບຄະນະ ປະຈໍາສະພາແຫ່ງຊາດ, ຄະນະປະຈໍາສະພາປະຊາຊົນແຂວງ ໃນການຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ, ນິຕິກໍາໃຕ້ກົດໝາຍ, ແຜນພັດ ທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດໃນນາມ ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວ ບັນດາເຜົ່າ ທັງໝົດ 19 ຄັ້ງ ໃນ 14 ເມືອງ 1 ນະຄອນ. ໃນນັ້ນ, ໄດ້ເອົາໃຈໃສ່ເຄື່ອນໄຫວຕິດຕາມກວດກາຕາມມະຕິຂອງກອງປະຊຸມສະພາແຫ່ງຊາດ ສະບັບເລກທີ 133/ ສພຊ, ລົງວັນທີ 1 ກໍລະກົດ 2024 ກ່ຽວກັບການຈັດຕັ້ງປະຕິບັດໂຄງການລົງທຶນດ້ານແຮ່ທາດໃນໄລຍະຜ່ານມາ ແລະ ແຜນການປະຕິບັດວຽກງານໃນຕໍ່ໜ້າ ເຊິ່ງໄດ້ລົງຕິດຕາມພື້ນທີ່ຕົວຈິງຢູ່ເມືອງເຊ ໂປນ, ເມືອງວິລະບູລີ; ຕິດຕາມກວດກາການພັດທະນາຊົນນະບົດ ແລະ ລຶບລ້າງຄວາມທຸກຍາກທີ່ຕິດພັນກັບວຽກງານ 3 ສ້າງຕາມ ມະຕິກອງປະຊຸມສະພາແຫ່ງຊາດສະບັບເລກທີ 134/ສພຊ, ລົງວັນທີ 01 ກໍລະກົດ 2024 ໄດ້ສ້າງເມືອງພົ້ນທຸກ 2 ເມືອງ: ເມືອງອາດສະ ພັງທອງ ແລະ ເມືອງວິລະບູລີ ທີ່ລາຍງານໃນກອງປະຊຸມສະໄໝສາມັນ ເທື່ອທີ 7 ຜ່ານມານີ້ ແລະ ສືບຕໍ່ປະຕິບັດໃນປີ 2024 ແມ່ນ 2 ເມືອງ ຄື: ເມືອງນອງ ແລະ ເມືອງ ອາດສະພອນ.

   ໃນຕໍ່ກັບວຽກງານສູ້ຊົນໃນທ້າຍປີ 2024 ລັດຖະບານ ໄດ້ສຸມໃສ່ພັດທະນາຮອບດ້ານ 45 ຈຸດສຸມເປັນບຸລິມະສິດ ລະຫວ່າງ ສູນກາງ ແລະ ທ້ອງຖິ່ນຕາມຂໍ້ຕົກ ລົງເລກທີ 72/ນຍ ໃນການຈັດຕັ້ງໂຄງການຕ່າງໆຢູ່ຈຸດສຸມກຸ່ມບ້ານ ພັດທະນາລຽບຕາມຊາຍແດນ; ແຂວງສະຫວັນນະເຂດ ແມ່ນຈຸດສຸມຈຽງຕູບ ເມືອງເຊໂປນ; ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງພວກເຮົາໄດ້ລົງຊຸກຍູ້ ແລະ ໄດ້ຂົນຂວາຍທຶນຮອນໃນການກໍ່ສ້າງໂຮງຮຽນຢູ່ປະຈໍາເຂດ ບ້ານກ໋ອກ-ບ້ານລາດ ກຸ່ມບ້ານພັດ ທະນາຈຽງຕູບອາຄານຮຽນ 3 ຫ້ອງ, 1 ຫ້ອງການຄູ ແລະ ໄດ້ກໍ່ສ້າງ ສໍາເລັດພ້ອມທັງເປີດນໍາໃຊ້ແລ້ວ ໃນມູນຄ່າ 950 ກວ່າລ້ານກີບ.  ການ ຕິດຕາມກວດກາຮ່ວມກັບຄະນະປະ ຈໍາສະພາແຫ່ງຊາດ ໃນການຈັດຕັ້ງ ປະຕິບັດຍຸດທະສາດ ການປະຕິຮູບ ລະບົບການສຶກສາ ແລະ ການພັດ ທະນາຊັບພະຍາກອນມະນຸດແຫ່ງຊາດ ທີ່ເມືອງນອງ, ເມືອງອຸທຸມພອນ ແລະ ນະຄອນໄກສອນ ພົມວິຫານ. ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ຍັງໄດ້ປະສານສົມທົບກັບຄະນະປະຈໍາສະພາປະຊາຊົນແຂວງ ເອົາໃຈໃສ່ໃຫ້ຄໍາປຶກສາດ້ານກົດໝາຍໄດ້ທັງໝົດ 63 ຄັ້ງ, ມີ 102 ເທື່ອຄົນ, ຍິງ 36 ເທື່ອຄົນ, ຮັບຄໍາຮ້ອງຂໍຄວາມເປັນທໍາຂອງປະຊາຊົນ ທັງໝົດ 23 ເລື່ອງ, ໄດ້ພິຈາລະນາແລ້ວ 18 ເລື່ອງ, ປັດຈຸບັນກໍາລັງປະສານສົມທົບ ແລະ ດໍາເນີນການຄົ້ນຄວ້າແກ້ໄຂ 5 ເລື່ອງ.

     ໃນຖານະເປັນຕົວແທນຂອງ ປະຊາຊົນ ໄດ້ປະຕິບັດຄໍາແນະນໍາ ຂອງຄະນະປະຈໍາສະພາແຫ່ງຊາດ ໃນການລົງພົບປະກັບປະຊາຊົນແລະ ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 7 ຂອງ ສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ໃນທົ່ວແຂວງໄດ້ທັງໝົດ 41 ຈຸດ ເຊິ່ງມີຜູ້ມີສິດເລືອກຕັ້ງ ເຂົ້າຮ່ວມຮັບຟັງ ທັງໝົດ 5.824 ຄົນ, ຍິງ 2.204 ຄົນ, ກວມເອົາ 26 ກຸ່ມບ້ານ ແລະ ເຂດເທສະບານ 14 ເມືອງ 1 ນະຄອນ. ໄລຍະລົງພົບປະຜູ້ມີສິດ ເລືອກຕັ້ງ, ມີປະຊາຊົນກໍ່ຄືຜູ້ມີສິດເລືອກຕັ້ງຊັກຖາມ ແລະ ສະເໜີຕໍ່ຄະນະສະມາຊິກສະພາແຫ່ງຊາດທັງໝົດ 54 ຄໍາສະເໜີ ສ່ວນການແກ້ໄຂ, ການໃຫ້ຄວາມກະຈ່າງແຈ້ງຕໍ່ຄໍາສະເໜີ ແມ່ນຢູ່ໃນໄລຍະການສັງລວມຂອງຄະນະເລຂາທິການ, ຕິດພັນກັບການພົບປະຜູ້ມີສິດເລືອກຕັ້ງນັ້ນພວກຂ້າພະເຈົ້າ ຍັງໄດ້ເອົາໃຈໃສ່ຂົນຂວາຍລະດົມທຶນຮອນ ເພື່ອນໍາໄປຊ່ວຍເຫລືອປະຊາຊົນເຂດຫ່າງໄກສອກຫລີກ, ໂຮງຮຽນເປັນຕົ້ນແມ່ນມອບອຸປະກອນການຮຽນ, ອຸປະກອນກິລາ, ເຄື່ອງນຸ່ງຫ່ົມ ແລະ ເງິນສົດຈໍານວນໜຶ່ງ ລວມເປັນມູນຄ່າຈໍານວນ 187 ລ້ານກວ່າກີບ.

KPL