ຂປລ
ອາທິດຜ່ານມາ ກຸ່ມຫັດຖະກຳຜະລິດສາດຜື ບ້ານເດື່ອເຕ້ຍ ກຸ່ມສະພັງ ເມືອງມຸນລະປາໂມກ ແຂວງຈຳປາສັກ ໄດ້ຮັບກາໝາຍສິນຄ້າໜຶ່ງເມືອງ, ໜຶ່ງຜະລິດຕະພັນ.
*ອາທິດຜ່ານມາ ກຸ່ມຫັດຖະກຳຜະລິດສາດຜື ບ້ານເດື່ອເຕ້ຍ ກຸ່ມສະພັງ ເມືອງມຸນລະປາໂມກ ແຂວງຈຳປາສັກ ໄດ້ຮັບກາໝາຍສິນຄ້າໜຶ່ງເມືອງ, ໜຶ່ງຜະລິດຕະພັນ ເພື່ອຊຸກຍູ້ສົ່ງເສີມຜະລິດຕະພັນຫັດຖະກຳໃຫ້ກ້າວໄປສູ່ຄຸນນະພາບ ແລະ ກ້າວໄປເຖິງການຕໍ່ຍອດສ້າງມູນຄ່າເພີ່ມດ້ວຍການຢັ້ງຢືນເປັນຜະລິດຕະພັນໜື່ງເມືອງໜື່ງຜະລິດຕະພັນແຫ່ງຊາດ (ODOP).
ທ່ານ ວົງສົມພອນ ວົງພາຈອນ ຮອງຫົວໜ້າຫ້ອງການອຸດສະຫະກຳການຄ້າເມືອງ ໃຫ້ຮູ້ວ່າ: ບ້ານ ເດື່ອເຕ້ຍ ເປັນບ້ານໜຶ່ງຢູ່ລຽບຕາມແຄມແມ່ນໍ້າຂອງ ຫ່າງຈາກຕົວເມືອງ ໄປທາງທິດໃຕ້ 9 ກິໂລແມັດ, ພາຍໃນບ້ານມີ 117 ຄອບຄົວ, ມີພົນລະເມືອງ 741 ຄົນ, ຍິງ 373 ຄົນ, ປະຊາຊົນສ່ວນໃຫຍ່ຖືເອົາອາຊີບເຮັດນາເປັນຕົ້ນຕໍ, ປູກຝັງ- ລ້ຽງສັດຫາປາເປັນສຳຮອງ ແລະ ມີປະຊາຊົນຈຳນວນ 24 ຄອບຄົວ ໄດ້ຜະລິດສາດຜື.
ຫັດຖະກຳສາດຜື ແມ່ນຜະລິດຕະພັນໜຶ່ງທີ່ເປັນມູນເຊື້ອເຄີຍປະຕິບັດສືບທອດກັນມາແຕ່ລຸ້ນປູ່ຍ່າຕາຍາຍຂອງພໍ່ແມ່ປະຊາຊົນພາຍໃນບ້ານເດື່ອເຕ້ຍ ຈົນມາຮອດປັດຈຸບັນນີ້, ກຸ່ມຜະລິດສາດຜື ໄດ້ດຳເນີນການຜະລິດຫລາຍຂຶ້ນ ແລະ ຂະຫລາຍຕົວດ້ວຍການຮ່ວມມືກັບຄະນະພັກ-ອົງການປົກຄອງເມືອງ, ປະທານຊີ້ນຳກຸ່ມບ້ານ, ນາຍບ້ານ, ເຫັນວ່າການຜະລິດສາດຜື ເປັນອາຊີບທີ່ສາມາດສ້າງລາຍຮັບໃຫ້ຄອບຄົວພໍ່ແມ່ປະຊາຊົນ. ສະນັ້ນ, ຈຶ່ງເຫັນດີເປັນເອກະພາບກັນສ້າງ ຕັ້ງເປັນກຸ່ມຜະລິດຫັດຖະກຳສາດຜື ບ້ານເດື່ອເຕ້ຍ ຂຶ້ນໃນວັນທີ 5 ເດືອນ ກັນຍາ ປີ 2024, ມາຮອດປັດຈຸບັນ ໜ່ວຍງານສົ່ງເສີມ ແລະ ການຄ້າ ກໍ່ໄດ້ລົງເກັບກຳຂໍ້ມູນຫັດຖະກຳຢ່າງລະອຽດ ສາມາດຕອບສະໜອງກັບຄວາມຮຽກຮ້ອງຕ້ອງການ ແລະ ສາມາດຈຳໜ່າຍຕາມທ້ອງຕະຫລາດ ໄດ້ດັ່ງນັ້ນ, ຫ້ອງການອຸດສາຫະ ກຳ ແລະ ການຄ້າເມືອງ ຈຶ່ງນຳສະເໜີທາງຄະນະພັກ-ອົງການປົກຄອງເມືອງ ສະເໜີເຂົ້າເປັນສິນຄ້າໜຶ່ງເມືອງໜຶ່ງຜະລິດຕະພັນ ແລະ ໄດ້ປະສານສົມທົບກັບພະແນກອຸດສາຫະກຳ ແລະ ການຄ້າແຂວງ ປະກອບເອກະສານເພື່ອນຳສະເໜີຕ່ໍ ກົມສົ່ງເສີມກະຊວງອຸດສາຫະກຳ ແລະ ການຄ້າໃນການພິຈາລະນາຮັບຮອງເອົາຜະລິດຕະພັນດັ່ງກ່າວ ເຂົ້າຮັບກາໝາຍສິນຄ້າ ໜຶ່ງເມືອງໜຶ່ງຜະລິດຕະພັນ ແລະ ເຮັດສັນຍາລະຫ່ວາງກົມສົ່ງເສີມ ກັບກຸ່ມຜະລິດຫັດຖະກຳສາດຜືບ້ານເດື່ອເຕ້ຍ ແລະ ໄດ້ຮັບໃບອະນຸຍາດນຳໃຊ້ກາໝາຍສິນຄ້າ (ໜຶ່ງເມືອງໜຶ່ງຜະລິດຕະພັນແຫ່ງຊາດ) ໃນເດືອນພະຈິກ 2024. ກຸ່ມຜະລິດສາດຜື ບ້ານເດື່ອເຕ້ຍ ມີ 24 ຄອບຄົວ, ມີແຮງງານທັງໝົດ 48 ຄົນ, ຍິງ 24 ຄົນ, ສະເລ່ຍການຜະລິດຄອບຄົວໜຶ່ງໃນ 1 ປີ, ສາມາດຜະລິດສາດຜື ໄດ້ 17 ຜືນ, ສະເລ່ຍລາຍຮັບຄອບຄົວໜຶ່ງ ໄດ້ 2-3 ລ້ານກີບຕໍ່ຄອບຄົວຕໍ່ປີ.
ທ່ານ ວົງສົມພອນ: ການມອບກາໝາຍ ໂອດັອບ ກໍເພື່ອຊຸກຍູ້ສົ່ງເສີມການສ້າງຕັ້ງກຸ່ມຫັດຖະກຳຈັກສານສາດຜື. ເພື່ອສ້າງຜະລິດຕະພັນຫັດຖະກຳໃຫ້ກ້າວໄປສູ່ຄຸນນະພາບ ແລະ ກ້າວໄປເຖິງການຕໍ່ຍອດ ສ້າງມູນຄ່າເພີ່ມດ້ວຍການຢັ້ງຢືນເປັນຜະລິດຕະພັນ ໜຶ່ງເມືອງໜຶ່ງຜະລິດຕະພັນ ແຫ່ງຊາດ (ODOP).
ໂດຍ: ມາລີດາ
KPL
