*ໄລ​ຍະ​ນະນີ້ ຄໍ​ລໍາ​ສຶກສາ​ຫາ​ຄວາມ​ຮູ້ ຈະນໍາ​​ເອົາ​ເຕັກນິກ​ການ​ປູກພືດ,​ຜັກ, ໝາກ​ໄມ້ ​ແລະ ການ​ລ້ຽງສັດ​ມາສະ​ເໜີທ່ານ​ຜູ້​ອ່ານ ​ເພື່ອ​ໃຫ້​ຜູ້​ທີ່​ມີ​ສົນ​ໃຈ​ເລື່ອງ​ກະສິກໍາ​ສາມາດ​ນໍາ​ໄປ​ໃຊ້​ໄດ້​ໃນ​ຊີວິດ​ປະ​ຈໍາ​ວັນ ​ແລະ ມື້​ນີ້ ​ເຮົາ​ຈະ​ມາ​ນໍາ​ສະ​ເໜີ​ເຕັກ​ນິກການປູກໝາກ​ເລັ່ນ ​​ເຊິ່ງວາໝາກ​ເລັ່ນ ຈັດເປັນພືດລົ້ມລຸກລະດູດຽວ, ບາງສາຍພັນສູງເຖິງ 2 m, ຕົ້ນອ່ອນມີລັກສະນະເປັນຊົງກົມ , ລໍາຕົ້ນບໍ່ແຂງແຮງຫັກງ່າຍ, ເມື່ອແກ່ຂຶ້ນຕົ້ນຈະເປັນຫລ່ຽມ ແລະ ແຂງແຮງຂຶ້ນ, ແຕກງ່າຕັ້ງແຕ່ສ່ວນລຸ່ມຂອງລໍາຕົ້ນ ໂດຍຈະມີຂົນປົກຄຸມ ແລະ ມີກິ່ນສະເພາະຕົວ, ລໍາຕົ້ນຂອງໝາກເລັ່ນບາງສາຍພັນເປັນລໍາຕົ້ນຕັ້ງຊື່ແຂງແຮງ, ແຕ່ບາງສາຍພັນມີລັກສະນະລໍາຕົ້ນເປັນເຄືອຍາວເລື້ອຍຂຶ້ນສູງ ຫລື ເລື້ອຍຕາມດິນ, ໃບເປັນໃບດ່ຽວລຽງສະຫລັບມີເກສອນ​ໂຕແມ່ ແລະ ເກສອນຕົວຜູ້ໃນດອກດຽວກັນ ໂດຍອອກດອກເປັນຊໍ່, ມີໃບຍ່ອຍແຕກອອກທາງຂ້າງ 7-9 ໃບ, ມີສີຂຽວສົດມີຂົນປົກຄຸມທົ່ວໃບ, ດອກໝາກເລັ່ນເປັນດອກ 5 ດອກ ອອກດອກບໍລິເວນຂໍ້ຂອງກິ່ງ, ດອກມີຂະໜາດນ້ອຍເປັນສີເຫລືອງ, ມີກີບດອກ 5 ກີບ, ພາຍໃນດອກປະກອບດ້ວຍເກສອນຕົວຜູ້ 5 ອັນ ອ້ອມຮອບເກສອນແມ່ທີ່ຢູ່ດ້ານໃນ, ໝາກມີລັກສະນະອວບນໍ້າ ແລະ ມີຮູບຮ່າງແຕກຕ່າງກັນຕາມສາຍພັນ ເຊັ່ນ: ຮູບມົນກົມສ່ວນຂະໜາດມີຂະໜາດນ້ອຍຈົນເຖິງຂະໜາດໃຫຍ່, ໝາກອ່ອນຈະມີສີຂຽວອົມຂາວ ແລະ ຄ່ອຍໆປ່ຽນເປັນສີຂາວເມື່ອຫມາກແກ່ ແລະ ເປັນສີແດງເມື່ອໝາກສຸກ ເມັດໝາກເລັ່ນມີລັກສະນະແປໆຄ້າຍຮູບໄຂ່ເປັນສີເຫລືອງ ຫລື ສີນໍ້ຕານອ່ອນ ແລະ ຂະໜາດນ້ອຍ ໂດຍມີຂົນປົກຄຸມ, ຂອບນອກຍາວປະມານ 3-5 mm, ໂດຍອາດມີຫລາຍເຖິງ 250 ເມັດໃນ 1 ໝາກ.

      ວິທີການປູກ: ສາມາດປູກດ້ວຍວິທີກ້າເມັດ ໂດຍມີວິທີການດັ່ງລຸ່ມນີ້: ການກະກຽມດິນ: ຈໍາເປັນຕ້ອງຍົກຄູ ຫລື ເຮັດເປັນຂຸມຄ້າຍຄືປູກພືດຜັກທົ່ວໄປ ແຕ່ຕ້ອງກໍາຈັດວັດສະພືດ ກ່ອນ, ໄຖດິນເລິກປະມານ 20-30 cm, ຕາກດິນປະໄວ້ 10-15 ວັນ, ຈາກນັ້ນ ໄຖພວນດິນອີກຮອບທີ 2, ໃຫ້ຫວ່ານຝຸ່ນຄອກໃສ່ໃນອັດຕາສ່ວນ 19-31 kg/10 m, ເມື່ອຕາກດິນຮອບທີ 2 ແລ້ວ ໃຫ້ໄຖຍົກຄູກວ້າງປະມານ 70-80 cm, ສໍາລັບປູກແຖວດຽວ ລະຫວ່າງແຖວ 100-120 cm, ສໍາລັບປູກຫລາຍຄູ ແມ່ນເຮັດຄູສູງປະມານ 30 cm, ສ່ວນຫລາຍນິຍົມກ້າເບ້ຍກ່ອນຍ້າຍປູກ, ອາຍຸເບ້ຍແມ່ນ 25-30 ວັນ ຫລື ມີໃບແທ້ 5-7 ໃບ ແລ້ວຈຶ່ງຍ້າຍປູກ ນິຍົມປູກໃນ​ໄລຍະທ້າຍລະດູຝົນທີ່ຝົນ ຖ້າປູກກ່ອນຊ່ວງລະດູຝົນ ຫລື ຕົ້ນລະດູຝົນ ແມ່ນມັກປະສົບບັນຫາໝາກເໜົ່າງ່າຍ, ໄລຍະຫ່າງລະຫວ່າງຕົ້ນ ຫລື ຂຸມແມ່ນ 50 cm ແລະ ຫລັງຈາກປູກໄດ້ 1 ອາທິດ ຄວນເອົາເຟືອງປົກ ຄຸມຮອບເຫງົ້າຕົ້ນໄວ້ ເພື່ອຮັກສາຄວາມຊຸ່ມໃນດິນ, ຫມາກເລັ່ນບາງສາຍພັນມີລັກສະນະເລືອຂຶ້ນສູງ ແລະ ລໍາຕົ້ນບໍ່ແຂງແຮງ ຈໍາເປັນຕ້ອງເຮັດຄ້າງໃຫ້ຫລັງຈາກປູກໄດ້ 15 ວັນ ຫລື ໃຊ້ໄມ້ປັກລະຫວ່າງຕົ້ນ ແລະ ໃຊ້ລວດມັດດຶງໄວ້ທາງຂ້າງເພື່ອໃຫ້ລໍາຕົ້ນເລືອໄປ.

     ການເກັບກ່ຽວ: ແມ່ນຂຶ້ນຢູ່ກັບສາຍພັນແຕ່ລະຊະນິດ ເຊິ່ງມີໄລຍະການເກັບກ່ຽວທີ່ເໝາະສົມວ່າຄວນຈະເກັບກ່ຽວໃນ​ໄລຍະໃດ ຊຶ່ງໂດຍສະເລ່ຍແລ້ວໄລຍະການເກັບກ່ຽວນັ້ນແມ່ນເລີ່ມແຕ່ຈາກການຍ້າຍປູກ ແລ້ວຈະເລີ່ມອອກດອກ ໄດ້ 1 ເດືອນ ຫລື 1 ເດືອນເຄິ່ງກໍ່ຈະເລີ່ມອອກດອກ ແລະ ເລີ່ມເກັບກ່ຽວໃນ​ໄລຍະອາຍຸປະມານ 70-90 ວັນ ຫລື 2-3 ເດືອນ ກໍ່ສາມາດເກັບກ່ຽວໄດ້ແລ້ວ.

    ສໍາ​ລັບ ສາ​ເຫດທີ່ເຮັດໃຫ້ໝາກເລັ່ນກົ້ນ​ເໜົ່າ ຍ້ອນໝາກບໍ່ສົມບູນ ເນື່ອງຈາກການຂາດທາດ​ແຮ່​ທາດ  (Ca) ເຖິງແມ່ນວ່າຈະມີ​ແຮ່​ທາດ (Ca) ໃນດິນຫລາຍກໍ່ຕາມ​ແຕ່​ອາດ​ຈະ​ບໍ່ພຽງພໍ. ສະນັ້ນ, ​ເມື່ອ​ພົບ​ບັນຫາ​ນີ້ ແນະນໍາໃຫ້ໃສ່ປູນຂາວ ໂດຍການໂຮຍບໍລິເວນເຫງົ້າ ຫລື ປະສົມໃສ່ໃນນໍ້າແລ້ວຫົດໃສ່ບໍລິເວນຕົ້ນ ຫລື ໃສ່ອາຫານເສີມທີ່ມີ​ແຮ່​ທາດ​ທີ່​ພຶດຕ້ອງການສີດ​ໃສ່​ຕົ້ນ.

ໂດຍ: ລູກສາວຫລ້າ