ຂປລ
ທ່ານ ປີເຕີ ຊີຈາໂຕ, ລັດຖະມົນຕີ ກະຊວງ ການຕ່າງປະເທດ ຮົງກາລີ ໄດ້ແຈ້ງໃຫ້ຮູ້ ຜ່ານທາງສື່ ສັງຄົມ ອອນລາຍວ່າ: ທໍ່ສົ່ງ ນໍ້າມັນ ເຊື້ອໄຟ “ມິດຕະພາບ” ຈາກຣັດເຊຍ ໄປຫາຮົງກາລີ ໄດ້ຟື້ນຟູ ການດໍາເນີນງານ ຄືນໃໝ່ແລ້ວ,
ຂປລ.ວິທະຍຸ ກະຈາຍສຽງ ສາກົນ ແຫ່ງ ສປ ຈີນ, ທ່ານ ປີເຕີ ຊີຈາໂຕ, ລັດຖະມົນຕີ ກະຊວງ ການຕ່າງປະເທດ ຮົງກາລີ ໄດ້ແຈ້ງໃຫ້ຮູ້ ຜ່ານທາງສື່ ສັງຄົມ ອອນລາຍວ່າ: ທໍ່ສົ່ງ ນໍ້າມັນ ເຊື້ອໄຟ “ມິດຕະພາບ” ຈາກຣັດເຊຍ ໄປຫາຮົງກາລີ ໄດ້ຟື້ນຟູ ການດໍາເນີນງານ ຄືນໃໝ່ແລ້ວ, ການສະໜອງ ພະລັງງານຂອງ ຮົງກາລີ ແມ່ນມີຄວາມໝັ້ນຄົງ. ນັບແຕ່ວັນທີ 19 ທັນວານີ້ ເປັນຕົ້ນມາ, ທໍ່ສົ່ງນໍ້າມັນ ເຊື້ອໄຟ “ມິດຕະພາບ” ໄດ້ຍຸດຕິ ການສົ່ງນໍ້າມັນ ເຊື້ອໄຟຈາກ ຣັດເຊຍ ແລະ ກາຊັກສະຖານ ໄປສູ່ ຮົງກາລີ, ສະໂລວາກີ ແລະ ເຢຍລະມັນ. ທໍ່ສົ່ງນໍ້າມັນເຊື້ອໄຟ “ມິດຕະພາບ” ແມ່ນລະບົບ ເຄືອຂ່າຍ ທໍ່ສົ່ງນໍ້າມັນ ເຊື້ອໄຟ ຂະໜາດໃຫຍ່ ທີ່ສົ່ງນໍ້າມັນເຊື້ອໄຟຈາກ ຣັດເຊຍ ໄປສູ່ເຂດ ເອີຣົບກາງ ແລະ ເອີຣົບ ຕາເວັນອອກ, ກ່ອນໜ້ານີ້, ທໍ່ສົ່ງນໍ້າມັນ ດັ່ງກ່າວ ເຄີຍເກີດ ການຮົ່ວໄຫລ ຫລາຍຄັ້ງ. ພາຍຫລັງ ເກີດການປະທະກັນ ລະຫວ່າງ ຣັດເຊຍ-ອູແກຣນ ໃນປີ 2022 ເປັນຕົ້ນມາ, ຣັດເຊຍ ແລະ ອູແກຣນ ໄດ້ກ່າວປະນາມ ເລື້ອຍໆວ່າ ຝ່າຍກົງກັນຂ້າມ ເປັນຝ່າຍໂຈມຕີ ທໍ່ສົ່ງນໍ້າມັນ ດັ່ງກ່າວ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
