ຂປລ
ທ່ານ ຟ້າມມິງຈິງ, ນາຍົກລັດຖະມົນຕີ ຫວຽດນາມ ໄດ້ລົງໄປ ກວດກາ ແລະ ຊອກຮູ້ ຂໍ້ມູນ ກ່ຽວກັບ ແຜນການສ້າງ ທາງລົດໄຟ ລາວກາຍ-ຮ່າໂນ້ຍ-ຫາຍຟ່ອງ ທີ່ເຊື່ອມຕໍ່ ສສຫວຽດນາມ-ສປ ຈີນ ຢູ່ນະຄອນ ລາວກາຍຂອງ ສສ ຫວຽດນາມ.
ຂປລ.ວິທະຍຸ ສາກົນ ແຫ່ງ ສປ ຈີນ, ເມື່ອບໍ່ດົນມານີ້, ທ່ານ ຟ້າມມິງຈິງ, ນາຍົກລັດຖະມົນຕີ ຫວຽດນາມ ໄດ້ລົງໄປ ກວດກາ ແລະ ຊອກຮູ້ ຂໍ້ມູນ ກ່ຽວກັບ ແຜນການສ້າງ ທາງລົດໄຟ ລາວກາຍ-ຮ່າໂນ້ຍ-ຫາຍຟ່ອງ ທີ່ເຊື່ອມຕໍ່ ສສຫວຽດນາມ-ສປ ຈີນ ຢູ່ນະຄອນ ລາວກາຍຂອງ ສສ ຫວຽດນາມ. ໃນໂອກາດ ດັ່ງກ່າວ, ທ່ານ ຟ້າມມິງຈິງ ໄດ້ຮຽກຮ້ອງໃຫ້ ກະຊວງ ຄົມມະນາຄົມ ຂົນສົ່ງ ຮ່ວມກັບ ບັນດາ ກະຊວງ ແລະ ອົງການ ທຽບເທົ່າ ກະຊວງ ທີ່ກ່ຽວຂ້ອງ ຂອງ ສສຫວຽດນາມ ຈົ່ງເລັ່ງ ວຽກງານ ກະກຽມ ເພື່ອລາຍງານ ໂຄງການ ແລະ ເລັ່ງລາຍງານ ຄວາມຄືບໜ້າ ຂອງໂຄງການ ດັ່ງກ່າວ ຕື່ມອີກ, ເຊິ່ງຕ້ອງໄດ້ລາຍງານ ຂໍ້ສະເໜີ ການລົງທຶນ ພ້ອມທັງ ນະໂຍບາຍ ແລະ ກົນໄກພິເສດ ຂອງໂຄງການ ດັ່ງກ່າວຕໍ່ລັດຖະບານ ຫວຽດນາມ ໃນເດືອນມັງກອນປີ 2025 ແລະ ຍື່ນໃຫ້ ສະພາແຫ່ງຊາດ ຫວຽດນາມ ໃນເດືອນກຸມພາປີ 2025, ພ້ອມກໍານົດ ໂຄງການ ດັ່ງກ່າວ ຕ້ອງເລີ່ມລົງມື ກໍ່ສ້າງ ໃນເດືອນທັນວາປີ 2025 ນໍາອີກ. ອີງຕາມແຜນການ, ທາງລົດໄຟ ລາວກາຍ-ຮ່າໂນ້ຍ-ຫາຍຟ່ອງ ມີຄວາມຍາວ ທັງໝົດ 417 ກິໂລແມັດ, ໂດຍຈະແລ່ນຜ່ານ 9 ແຂວງ, ນະຄອນ ແລະ ເຂດຂອງ ສສ ຫວຽດນາມ ແລະ ຈະກາຍເປັນ ຊ່ອງທາງ ຂົນສົ່ງ ສາກົນ ທີ່ເຊື່ອມຕໍ່ກັບ ສປ ຈີນ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
