*ຜ່ານການລົງພົບປະຜູ້ມີສິດປ່ອນບັດເລືອກຕັ້ງ ແລະ ການຕິດຕາມກວດກາ ຂອງຄະນະສະມາຊິກສະພາແຫ່ງຊາດເຂດເລືອກ ຕັ້ງທີ 18 ແຂວງໄຊສົມບູນໃນໄລຍະຜ່ານມາ ເຫັນວ່າປະຊາຊົນໄດ້ສະເໜີຫາລັດຖະບານ ກໍຄືອົງການປົກຄອງ ແຂວງ ຊ່ວຍແກ້ໄຂມີ 8 ບັນຫາທີ່ ຕ້ອງໄດ້ເອົາໃຈໃສ່ແກ້ໄຂໃນຕໍ່ໜ້າ.

    ທ່ານ ຄຳດອນ ຈັນທະວົງ ສະມາຊິກສະພາແຫ່ງຊາດເຂດເລືອກ ຕັ້ງທີ 18 ແຂວງໄຊສົມບູນໃຫ້ສຳພາດວ່າ:  ບັນຫາ 1 ແມ່ນບັນຫາການຂຸດຄົ້ນແຮ່ທາດຕາມດຳລັດ 141/ ລບ ແລະ ດຳລັດ 61/ລບ ເປັນຕົ້ນບົດປະເມີນຜົນກະທົບຕໍ່ສັງຄົມ ແລະ ສິ່ງແວດລ້ອມ; 2. ບັນຫາຢາເສບຕິດ, ຂີ້ລັກງັດແງະ ແລະ ບັນຫາການດັດສ້າງຜູ້ຕິດຢາເສບຕິດ ທ່ີໄດ້ຮັບການປ່ອຍຕົວແຕ່ກໍບໍ່ສາມາດຢຸດເຊົາການເສບຢາຢ່າງຖາວອນ; 3. ບັນຫາການຖາງປ່າ, ຈູດປ່າຢ່າງຊະຊາຍ; 4. ໂຮງຮຽນ ແລະ ສຸກສາລາຂອງບັນດາບ້ານຈຸດສຸມຕ່າງໆ ມີບາງບ້ານຍັງບໍ່ທັນມີ ແລະ ຈໍານວນ 7.ບັນຫາການແບ່ງດິນ-ແບ່ງປ່າ, ກໍານົດເຂດດິນທໍາການຜະລິດ, ປ່າຊົມໃຊ້ ແລະ ປ່າສະຫງວນຫ້າມຍັງ ບໍ່ທັນຈະແຈ້ງປະຊາຊົນຍັງບຸກລຸກຖາງປ່າຈໍານວນຫລາຍ ແລະ 8 ບັນຫາ ອັດຕາເງິນເຟີ້, ນໍ້າມັນເຊື້ອໄຟ, ຄ່າຄອງຊີບສູງ.    

    ທ່ານ ຄຳດອນ ກ່າວຕື່ມວ່າ: ສຳລັບວິທີການແກ້ໄຂບັນຫາຕ່າງໆ ເພື່ອເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການພັດທະນາຕາມຄວາມຕ້ອງການ ຂອງປະຊາຊົນນັ້ນສະມາຊິກສະພາແຫ່ງຊາດ ປະຈໍາເຂດເລືອກຕັ້ງຕົນກໍຄືສະພາປະຊາຊົນ ແຂວງໄຊສົມບູນ ຈະໄດ້ເອົາໃຈໃສ່ ແລະ ພະຍາຍາມຊຸກຍູ້ໃຫ້ລັດຖະບານ ກໍຄືອົງການປົກຄອງແຂວງ ໂດຍການຄົ້ນຄວ້າ, ພິຈາລະນາ, ປະກອບຄໍາຄິດ ຄໍາເຫັນ ແລະ ຕິດຕາມກວດກາແຜນ ພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງຊາດ ແລະ ຂອງແຂວງສາມາດຈັດຕັ້ງປະຕິບັດໄດ້ຖືກຕາມເປົ້າໝາຍ ກໍຄືການເຮັດໃຫ້ເສດຖະກິດ-ສັງຄົມ ແລະ ບັນຫາພ້ືນຖານໂຄງລ່າງໄດ້ຮັບການປັບປຸງແກ້ໄຂ ເພື່ອເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ ເທື່ອລະກ້າວ. ນອກນັ້ນ, ກໍຍັງຕ້ອໄດ້ຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ, ມະຕິ, ຄໍາສັ່ງຕ່າງໆຂອງສະພາແຫ່ງຊາດ, ຂອງລັດຖະບານ ແລະ ຂອງແຂວງຢ່າງຕໍ່ເນື່ອງ. ສືບຕໍ່ສົມທົບກັບທຸກພາກສ່ວນທ່ີກ່ຽວຂ້ອງ ໃນການຄົ້ນຄວ້າແກ້ໄຂຄໍາສະເໜີ ຂອງປະຊາຊົນທີ່ສະເໜີມາຍັງສະພາປະຊາຊົນແຂວງ ໃຫ້ມີຄວາມລະອຽດເປັນທໍາແລະວ່ອງໄວ.

ໂດຍ: ຢ່າຕົ່ງ

KPL