ຂປລ
ຂປລ. ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ຕ້ອນຮັບ ທ່ານ ນາງ ຫວູ ຫວຽດ ຈາງ ຜູ້ອໍານວຍການໃຫຍ່ ສໍານັກຂ່າວສານຫວຽດນາມ ພ້ອມດ້ວຍຄະນະ ໃນວັນທີ 20 ພະຈິກ 2024 ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 19-21 ພະຈິກ 2024.
ຂປລ. ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ຕ້ອນຮັບ ທ່ານ ນາງ ຫວູ ຫວຽດ ຈາງ ຜູ້ອໍານວຍການໃຫຍ່ ສໍານັກຂ່າວສານຫວຽດນາມ ພ້ອມດ້ວຍຄະນະ ໃນວັນທີ 20 ພະຈິກ 2024 ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 19-21 ພະຈິກ 2024.
ໂອກາດນີ້, ທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ທ່ານ ນາງ ຫວູ ຫວຽດ ຈາງ ທີ່ໄດ້ນໍາພາຄະນະ ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້, ຊຶ່ງເປັນການປະກອບສ່ວນສຳຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນ ສອງຊາດ ລາວ-ຫວຽດນາມ, ເວົ້າລວມ ເວົ້າສະເພາະ ກໍຄື ຮັດແໜ້ນການພົວພັນຮ່ວມມື ດ້ານວຽກງານຖະແຫລງຂ່າວ ຂອງສອງປະເທດ ໃຫ້ໄດ້ຮັບການພັດທະນາ. ພ້ອມທັງ ສະແດງຄວາມຊົມເຊີຍຕໍ່ການພົວພັນຮ່ວມມື ຂອງສອງສຳນັກ ຂ່າວສານປະເທດລາວ ແລະ ສຳນັກຂ່າວສານຫວຽດນາມ ທີ່ໄດ້ມີການພົວພັນຮ່ວມມືກັນຢ່າງແໜ້ນແຟ້ນ ໃນການໂຄສະນາເຜີຍແຜ່ຂໍ້ມູນຂ່າວສານ ແລະ ເຫດການສໍາຄັນຕ່າງໆ ຂອງສອງປະເທດ ອອກສູ່ສັງຄົມໄດ້ຮັບຮູ້ຢ່າງທົ່ວເຖິິງ.
ພ້ອມນີ້, ທ່ານນາຍົກລັດຖະມົນຕີ ຍັງໄດ້ສະເໜີໃຫ້ສອງສຳນັກຂ່າວສານ ລາວ-ຫວຽດນາມ ເພີ່ມທະວີຮ່ວມມືກັນຕື່ມອີກ ເພື່ອພ້ອມກັນໂຄສະນາເຜີຍແຜ່ ຕອບໂຕ້ຂ່າວບິດເບືອນຄວາມຈິງ, ຂ່າວປອມ ໂດຍສະເພາະ ຕອບໂຕ້ ກຸ່ມຄົນບໍ່ຫວັງດີ ກໍ່ຄວາມບໍ່ສະຫງົບໃນສັງຄົມ ໃນສື່ສັງຄົມອອນລາຍ ແລະ ອື່ນໆ ທີ່ສົ່ງຜົນກະທົບ ຕໍ່ກັບການພັດທະນາ ເສດຖະກິດ-ສັງຄົມ ຂອງສອງປະເທດ ລາວ-ຫວຽດນາມ ແລະ ພ້ອມກັນເພີ່ມທະວີໂຄສະນາເຜີຍແຜ່ ເຫດການສຳຄັນຕ່າງໆ ທີ່ຈະຈັດຂຶ້ນ ໃນປີ 2025 ທີ່ຈະມາເຖິງນີ້.
ທ່ານ ນາງ ຫວູ ຫວຽດ ຈາງ ກໍໄດ້ສະແດງຄວາມຂອບໃຈຕໍ່ ທ່ານ ສອນໄຊ ສີພັນດອນ ທີ່ໄດ້ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງແຈ້ງຜົນສຳເລັດ ຂອງການພົບປະສອງຝ່າຍ ກັບສຳນັກຂ່າວສານປະເທດລາວ ແລະ ລາຍງານໃຫ້ຮູ້ ກ່ຽວກັບການພົວພັນຮ່ວມມືອັນແໜ້ນແຟ້ນ ລະຫວ່າງສຳນັກຂ່າວສານ ຫວຽດນາມ ແລະ ຂ່າວສານປະເທດລາວ ໃນໄລຍະຜ່ານມາ. ພ້ອມນີ້, ຍັງໄດ້ລາຍງານໃຫ້ຮູ້ ກ່ຽວກັບສະພາບລວມ ກໍຄື ການເຄື່ອນໄຫວວຽກງານຕ່າງໆ ຂອງສຳນັກຂ່າວສານຫວຽດນາມ ໃນການໂຄສະນາເຜີຍແຜ່ຂໍ້ມູນຂ່າວສານສຳຄັນຕ່າງໆ ເປັນຕົ້ນ ການເຄື່ອນໄຫວຂອງບັນດາການນຳຂັ້ນສູງ ຂອງສອງປະເທດ ລາວ-ຫວຽດນາມ ແລະ ອື່ນໆ.
ທ່ານ ນາງ ຫວູ ຫວຽດ ຈາງ ຍັງໄດ້ລາຍງານໃຫ້ທ່ານນາຍົກລັດຖະມົນຕີ ຊາບ ກ່ຽວກັບ ແຜນການຮ່ວມມືໃນຕໍ່ໜ້າ ກໍຄື ການຊ່ວຍເຫລືອເຊິ່ງກັນ ແລະ ກັນ ປະຈຳປີ ບົນພື້ນຖານອະນຸສັນຍາ ໂດຍສະເພາະ ການຊ່ວຍເຫລືອທາງ ດ້ານການຍົກລະດັບວິຊາການ, ອຸປະກອນເຕັກນິກຕ່າງໆ ແລະ ຍົກລະດັບຄວາມຮູ້ ດ້ານພາສາຫວຽດນາມ ໃຫ້ບັນນາທິການ ຂອງບັນດາສື່ຂະແໜງການຕ່າງໆ ໂດຍສະເພາະ ສຳນັກຂ່າວສານປະເທດລາວຕື່ມອີກ.
ຂ່າວ: ທະນູທອງ, ພາບ: ຂັນໄຊ
KPL
