ຂປລ
ກອງປະຊຸມ ແລກປ່ຽນ ບຸກຄະລາກອນ ສາກົນຈີນ ຄັ້ງທີ 22 ໄດ້ຈັດຂຶ້ນ ຢູ່ນະຄອນ ຊຽງໄຮ ຂອງ ສປ ຈີນ ເມື່ອບໍ່ດົນມານີ້
ຂປລ.ວິທະຍຸ ສາກົນ ແຫ່ງ ສປ ຈີນ, ກອງປະຊຸມ ແລກປ່ຽນ ບຸກຄະລາກອນ ສາກົນຈີນ ຄັ້ງທີ 22 ໄດ້ຈັດຂຶ້ນ ຢູ່ນະຄອນ ຊຽງໄຮ ຂອງ ສປ ຈີນ ເມື່ອບໍ່ດົນມານີ້, ທ່ານ ນາງ ເຊີ້ນຢີຊິນ ທີ່ປຶກສາແຫ່ງລັດຈີນ ໄດ້ກ່າວເນັ້ນໜັກວ່າ: ຕ້ອງລົງເລິກ ເຊື່ອມຊືມ ແລະ ຜັນຂະຫຍາຍ ຈິດໃຈ ຊີ້ນຳ ອັນສຳຄັນ ຂອງ ທ່ານ ເລຂາທິການໃຫຍ່ ສີ ຈິ້ນຜິງ, ຈັດຕັ້ງ ປະຕິບັດ ແຜນການຈັດວາງ ຂອງກອງປະຊຸມ ຄົບຄະນະ ຄັ້ງທີ 3 ຂອງຄະນະກຳມະການ ສູນກາງພັກກອມມູນິດຈີນ ສະໄໝ ທີ 20, ປະຕິບັດນະໂຍບາຍ ບຸກຄະລາກອນ ທີ່ມີຄວາມຕັ້ງໜ້າ, ເປີດປະຕູ ແລະ ມີປະສິດທິຜົນ ຫລາຍກວ່າເກົ່າ, ເພີ່ມທະວີການ ແລກປ່ຽນ ດ້ານບຸກຄະລາກອນ ໃນສາກົນ ເພື່ອເປັນການຄ້ຳປະກັນ ທາງດ້ານສະຕິປັນຍາ ແລະ ບຸກຄະລາກອນ ໃຫ້ແກ່ ການຊຸກຍູ້ ຄວາມທັນສະໄໝ ແບບຈີນ. ສປ ຈີນ ຈະປັບປຸງກົນໄກ ຮັບປະກັນ ແລະ ສະໜັບສະໜູນ ການນຳເຂົ້າ ບຸກຄະລາກອນ ຕ່າງປະເທດ ໃຫ້ສົມບູນຂຶ້ນ ຢ່າງຕໍ່ເນື່ອງ ແລະະ ຈະໃຫ້ການບໍລິການ ທີ່ມີຄຸນນະພາບ ສູງກວ່າເກົ່າແກ່ ຜູ້ຊ່ຽວຊານ ແລະ ບຸກຄະລາກອນ ປະເພດຕ່າງໆ ຈາກຕ່າງປະເທດ ທີ່ເຮັດວຽກ ແລະ ດຳລົງຊີວິດຢູ່ ສປ ຈີນ. ສປ ຈີນ ຍິນດີຮ່ວມກັບ ບັນດາຝ່າຍ ບັນລຸການຊ່ວຍ ຊູຍູ້ໜູນກັນ ດ້ານທ່າແຮງ ແລະ ການຮ່ວມມືແບບຕ່າງຝ່າຍຕ່າງ ໄດ້ຮັບຜົນປະໂຫຍດ ໃນດ້ານຊັບພະຍາກອນ ທາງປັນຍາ ແລະ ບຸກຄະລາກອນ ສາກົນ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
