ຂປລ
ຂປລ. ເມື່ອບໍ່ດົນມານີ້, ສູນວັດທະນະທໍາຈີນ ປະຈໍາລາວ ແລະ ພະແນກວັດທະນະທໍາ ແລະ ທ່ອງທ່ຽວແຂວງເຫີເປີຍ ໄດ້ຈັດກິດຈະກຳ ສະເຫລີມສະຫລອງບຸນໄຫວພະຈັນ ປະຈຳປີ 2024 “ຮ່ວມກັນຊົມພະຈັນດວງດຽວກັນ” ຄວາມງົດງາມແຂວງເຫີເປີຍ, ພາຍໃນງານ ໄດ້ຮັບຊົມການສະແດງ ສິລະປະວັດທະນະທໍາ ຈາກແຂວງເຫີເປີຍ
ຂປລ. ເມື່ອບໍ່ດົນມານີ້, ສູນວັດທະນະທໍາຈີນ ປະຈໍາລາວ ແລະ ພະແນກວັດທະນະທໍາ ແລະ ທ່ອງທ່ຽວແຂວງເຫີເປີຍ ໄດ້ຈັດກິດຈະກຳ ສະເຫລີມສະຫລອງບຸນໄຫວພະຈັນ ປະຈຳປີ 2024 “ຮ່ວມກັນຊົມພະຈັນດວງດຽວກັນ” ຄວາມງົດງາມແຂວງເຫີເປີຍ, ພາຍໃນງານ ໄດ້ຮັບຊົມການສະແດງ ສິລະປະວັດທະນະທໍາ ຈາກແຂວງເຫີເປີຍເຊັ່ນ: ການສະແດງກາຍຍະສິນ, ງິ້ວປັກກິ່ງ, ມາຍາກົນ, ມວຍໄທເກັກ, ການຮ້ອງເພງປະສານສຽງ. ພ້ອມນີ້, ຍັງໄດ້ເຂົ້າຊົມການວາງສະແດງຮູບພາບການທ່ອງ ທ່ຽວ “ສະບາຍດີ! ປະເທດຈີນ” ຄວາມງົດງາມແຂວງເຫີເປີຍ, ສໍາຜັດກັບສິລະປະການເຮັດ ທູບຫອມແບບດັ້ງເດີມຊິງຢວນ ແລະ ສິລະປະການ ປັກແສ່ວ ອັນເປັນມໍລະດົກ ວັດທະນະທໍາ ນາມມະທໍາຂອງຈີນອີກດ້ວຍ.
ທ່ານ ນາງ ຫລີຢີ່ຜິງ ຫົວໜ້າສູນວັດທະນະທໍາຈີນ ປະຈຳ ສປປ ລາວ ໄດ້ກ່າວວ່າ: ກິດຈະກໍາ “ຮ່ວມກັນຊົມພະຈັນດວງດຽວກັນ” ແມ່ນໄດ້ຈັດຂຶ້ນພ້ອມກັນຢູ່ທົ່ວໂລກ ຂອງກະຊວງວັດທະນະທໍາ ແລະ ທ່ອງທ່ຽວ ແຫ່ງ ສປ ຈີນ. ສຳລັບການສະຫລອງບຸນ ໄຫວ້ພະຈັນ ຢູ່ປະເທດລາວປີນີ້ ແມ່ນໄດ້ຈັດໃຫ້ມີຫລາຍກິດຈະກໍາ ເປັນຕົ້ນ ອ່ານບົດກະວີບຸນໄຫວ້ພະຈັນ, ກິດຈະກໍາສໍາຜັດວັດທະນະທໍາ ແລະ ທ່ອງທ່ຽວຈີນ, ຫ້ອງຮຽນວັດທະນະທໍາການຊົງຊາ, ຫ້ອງຝຶກອົບຮົມມວຍໄທເກັກ, ການວາງສະແດງຮູບພາບ ແລະ ອື່ນໆ ໂດຍຜ່ານການຈັດກິດຈະກໍາວັດທະນະທໍາ ແລະ ທ່ອງທ່ຽວທີ່ອຸດົມສົມບູນ ແລະ ມີຫລາຍສີສັນ, ແບ່ງປັນເທສະການ ໄຫວ້ພະຈັນທີ່ມ່ວນຊື່ນ ເປັນສິລິມຸງຄຸນ ແລະ ສະຫງົບສຸກຮ່ວມກັນກັບປະຊາຊົນລາວ.
ບຸນປະເພນີໄຫວ້ພະຈັນ ເປັນງານໜຶ່ງທີ່ມີຄວາມໝາຍສໍາຄັນ ທາງດ້ານວັດທະນະທໍາຂອງ ສປ ຈີນ ເຊິ່ງບຸນດັ່ງກ່າວ, ມີຄວາມເຊື່ອຖືຂອງຊາວຈີນ ໂດຍຈະປຽບເອົາດວງຈັນທີມົນກົມ ຄືດັ່ງຄວາມສາມັກຄີກົມກຽວ ຂອງຄົນໃນຄອບຄົວ ແລະ ອີກດ້ານໜຶ່ງແມ່ນບຸນແຫ່ງ ຄວາມພ້ອມໜ້າພ້ອມຕາ ຂອງຄົນໃນຄອບຄົວ ໂດຍທຸກຄົນຈະມາເຕົ້າໂຮມກັນ ຮ່ວມກັນສະເຫລີມສະຫລອງ ໂດຍການໃຕ້ໂຄມໄຟທີ່ມີລວດລາຍສີສັນ ແລະ ຮັບປະທານເຂົ້າໜົມໄຫວ້ພະຈັນ, ພ້ອມກັນຊົມດວງຈັນທີ່ສະຫວ່າງສະໄຫວ.
ຂ່າວ: ກິດຕ
ພາບ: ເກດສະໜາ
KPL