ຂປລ. ໄລຍະທ້າຍເດືອນກໍລະກົດ ຫາ ເດືອນສິງຫາ 2024 ນີ້, ບໍລິສັດ ໄຟຟ້າປາກແບງ ຈຳກັດ ໄດ້ປະຕິ ບັດມາດຕະການປ້ອງກັນໄພນ້ຳຖ້ວມ ໃຫ້ຖືກຕາມຫລັກວິທະຍາສາດ ແລະ ເຮັດໃຫ້ລະບົບຕິດຕາມວັດແທກ ການຕົກຕະກອນຂອງຫີນ, ຊາຍ-ຂີ້ຕົມ ຂອງໂຄງການເຂື່ອນໄຟຟ້າປາກແບງ ໄດ້ຜ່ານການທົດສອບ ຈາກໄພນໍ້າຖ້ວມ. ນອກນັ້ນ, ສະຖານີອຸທົກກະສາດ ສຳລັບການຕິດຕາມການປ່ອຍນໍ້າອອກຈາກອ່າງ ທີ່ສ້າງສຳເລັດເມື່ອບໍ່ດົນມານີ້, ກໍໄດ້ດຳເນີນການຢ່າງເປັນປົກກະຕິ, ການເກັບກຳຂໍ້ມູນວັດແທກມີຄວາມຄົບຖ້ວນ, ສາມາດສະໜອງຂໍ້ມູນວັດແທກ ຢ່າງມີປະສິດທິພາບ ແລະ ຮັບໃຊ້ການກໍ່ສ້າງຂອງເຂື່ອນ ເຊິ່ງເປັນມາດຕະການ ປ້ອງກັນຄວາມປອດໄພທີ່ແຂງແຮງໃນໄລຍະລະດູຝົນ.
ລະບົບຕິດຕາມການຕົກຕະກອນຂອງຫີນ, ຊາຍ-ຂີ້ຕົມ ຂອງໂຄງການເຂື່ອນໄຟຟ້າປາກແບງ ຕັ້ງຢູ່ເມືອງປາກແບງ ແຂວງອຸດົມໄຊ ເຊິ່ງລະບົບນີ້, ແມ່ນຕິດຕາມລະດັບນໍ້າ, ປະລິມານການໄຫລ ແລະ ການຕົກຕະກອນຂອງຫີນ, ຊາຍ-ຂີ້ຕົມ ໃນໄລຍະກໍ່ສ້າງເຂື່ອນໄຟຟ້າປາກແບງ. ນັບແຕ່ໄດ້ເລີ່ມກໍ່ສ້າງໃນວັນທີ 4 ມິຖຸນາ ເປັນຕົ້ນມາ, ບໍລິສັດໄຟຟ້າປາກແບງ ໃນຖານະເປັນຜູ້ພັດທະນາໂຄງການ ເຂື່ອນໄຟຟ້າດັ່ງກ່າວ, ໄດ້ຖືເອົາວຽກງານຕ້ານໄພນໍ້າຖ້ວມໃນລະດູຝົນ ເປັນວຽກງານຈຸດສຸມທີ່ສຳຄັນກວ່າໝູ່ ໂດຍໄດ້ສົມທົບກັບຜູ້ປະຕິບັດການກໍ່ສ້າງ ເພື່ອສ້າງແຜນປ້ອງກັນໄພນໍ້າຖ້ວມ ແລະ ແຜນຮັບມືກັບເຫດສຸກເສີນ ທີ່ເກີນລະດັບ ໄພນ້ຳຖ້ວມມາດຕະຖານຢ່າງລ່ວງໜ້າ, ພ້ອມທັງໄດ້ຈັດຕັ້ງປະຕິບັດບັນດາໜ້າວຽກກະກຽມຄວາມພ້ອມ ເພື່ອຮັບມືກັບເຫດສຸກເສີນ ແລະ ປ້ອງກັນໄພພິບັດຕແຕ່ແຕ່ຫົວທີ.
ຕາມແຈ້ງເຕືອນ ຂອງກົມອຸຕຸນິຍົມ ແລະ ອຸທົກກະສາດຂອງລາວ ໄດ້ໃຫ້ຮູ້ວ່າ: ໃນກາງເດືອນກໍລະກົດ ຈະມີພາຍຸ ພຣະພິຣຸນ (Prapiroon) ແລະ ພາຍຸດີເປຣຊັນ (tropical depression) ພັດຜ່ານເຂດດິນແດນຂອງລາວ ເຊິ່ງຈະເຮັດໃຫ້ຫລາຍພື້ນທີ່ ມີຝົນຕົກແຮງຢ່າງຕໍ່ເນື່ອງ. ພາຍຫລັງໄດ້ຮັບຮູ້ການ ແຈ້ງເຕືອນດັ່ງກ່າວແລ້ວ, ບໍລິສັດໄຟຟ້າປາກແບງ ກໍໄດ້ຮີບຮ້ອນຈັດຕັ້ງປະຕິບັດບັນດາໜ້າວຽກ ເພື່ອປ້ອງກັນໄພນໍ້າຖ້ວມ ຕາມຂໍ້ກຳນົດຢ່າງເປັນຮູບປະທຳ, ພ້ອມທັງໄດ້ນຳໃຊ້ສະຖານີອຸທົກກະສາດ ສຳລັບການຕິດຕາມການປ່ອຍນໍ້າອອກຈາກອ່າງ ເພື່ອວັດ ແທກປະລິມານການໄຫລ ເຊິ່ງໄດ້ສ້າງສຳເລັດ ແລະ ເປີດນຳໃຊ້ໃນກາງເດືອນມິຖຸນາ ຜ່ານມາ.

ນັບແຕ່ວັນທີ 31 ກໍລະກົດ ຫາວັນທີ 4 ສິງຫາ 2024, ຕາມຂໍ້ມູນຂອງສະຖານີອຸທົກກະສາດ ສຳລັບການຕິດຕາມ ການປ່ອຍນໍ້າອອກຈາກ ອ່າງຂອງເຂື່ອນປາກແບງ, ລະດັບນໍ້າສູງສຸດຂອງໄພນໍ້າຖ້ວມຄັ້ງທີ 1 ບັນລຸ 326,7 ແມັດ, ປະລິມານການໄຫລປະມານ 10000 m3/s , ເກືອບເຂົ້າກັບເກນ ອອກແບບໄພນໍ້າຖ້ວມ ທີ່ເກີດຂຶ້ນເທື່ອໜຶ່ງໃນໄລຍະ 2 ປີ; ແຕ່ວັນທີ 12 ສິງຫາ ຮອດວັນທີ 26 ສິງຫາ, ລະດັບນໍ້າສູງສຸດຂອງໄພນໍ້າຖ້ວມຄັ້ງທີ 2 ບັນລຸ 330,27 ແມັດ, ປະລິມານການໄຫລປະມານ 14300m3/s, ເກືອບເຂົ້າກັບເກນອອກແບບ ໄພນໍ້າຖ້ວມທີ່ເກີດຂຶ້ນເທື່ອໜຶ່ງ ໃນໄລຍະ 5 ປີ. ໃນໄລຍະດັ່ງກ່າວ, ບໍລິສັດໄຟຟ້າປາກແບງ ໄດ້ຈັດກອງປະຊຸມເພື່ອວິເຄາະ, ພິຈາລະນາ, ຕັດສິນ ແລະ ຈັດສັນວຽກງານປ້ອງກັນໄພນໍ້າຖ້ວມ ໃນໄລຍະລະດູຝົນຢ່າງທັນການ ເປັນຕົ້ນ ຈັດກອງປະຊຸມຫົວຂໍ້ສະເພາະ, ກອງປະຊຸມຈັດສັນວຽກງານ, ກອງປະຊຸມປຸກລະດົມ. ພ້ອມທັງໄດ້ເນັ້ນໃສ່ໜ້າທີ່ຮັບຜິດຊອບຂອງແຕ່ລະຕຳແໜ່ງ ຕິດຕາມຄວບຄຸມ ສະພາບນໍ້າຖ້ວມຢ່າງໃກ້ຊິດ, ຮັບປະກັນໄດ້ແຈ້ງຂ່າວເຫດການ ໃຫ້ຂັ້ນເທິງຮັບຊາບຢ່າງຮີບດ່ວນ ແລະ ຈັດການຢ່າງທັນການ. ນອກນັ້ນ, ຍັງໄດ້ເພີ່ມລະດັບການຄວບຄຸມ ດ້ານຄວາມປອດໄພ, ຮັບປະ ກັນໃຫ້ບັນດາວຽກງານ ປ້ອງກັນໄພນໍ້າຖ້ວມ ໄດ້ຈັດຕັ້ງປະຕິບັດຢ່າງແທ້ຈິງ, ບັນລຸຕາມຂໍ້ກຳນົດທີ່ໄດ້ວາງໄວ້; ເພີ່ມການກວດກາ ແລະ ແກ້ໄຂປັດໄຈຄວາມສ່ຽງ, ຕິດຕາມ ແລະ ເຝົ້າລະວັງການປ່ອຍນໍ້າຈາກຕອນເທິງຂອງແມ່ນ້ຳ ແລະ ຂໍ້ມູນຂອງສະຖານີອຸທົກກະສາດ. ສຳລັບບ່ອນທີ່ອາດເກີດໄພພິບັດດິນເຈື່ອນ, ການຊຸດຕົວຂອງຫີນ ແລະ ນໍ້າປ່າໄຫລຫລາກ, ພວກເຮົາໄດ້ເພີ່ມ ການຕິດຕາມກວດກາ ເພື່ອກຳຈັດຕົ້ນເຫດຂອງຄວາມສ່ຽງຢ່າງທັນການ, ຮັບປະກັນໃຫ້ການກໍ່ສ້າງໂຄງການ ໄດ້ດຳເນີນການຢ່າງປອດໄພ ແລະ ພະນັກງານມີຄວາມປອດໄພ.
ປັດຈຸບັນ, ເຖິງວ່າປະລິມານຝົນຕົກໄດ້ຄ່ອຍໆຫລຸດລົງ ໃນແຕ່ລະທ້ອງຖິ່ນກໍຕາມ, ແຕ່ຍັງຢູ່ໃນໄລຍະລະດູ ຝົນ. ສະນັ້ນ, ບໍລິສັດໄຟຟ້າປາກແບງ ຈະສືບຕໍ່ປະຕິບັດຄວາມຮັບຜິດຊອບ ແລະ ຈັດຕັ້ງບັນດາວຽກງານປ້ອງກັນໄພນໍ້າຖ້ວມໃຫ້ດີ, ຮັບປະກັນໃຫ້ໂຄງການກໍ່ສ້າງລະບົບ ຕິດຕາມການຕົກຕະກອນຂອງຫີນ, ຊາຍ-ຂີ້ຕົມ ສາມາດ ຜ່ານໄລຍະລະດູຝົນຢ່າງປອດໄພ.