*ຕໍ່ກັບການບໍລິໂພກຂ່າວສານຜ່ານສື່ອອນລາຍຕ່າງໆນັ້ນ ຄໍລຳສື່ອອນລາຍພວກເຮົາໄດ້ອອກມາເຕື່ອນເລື້ອຍໆວ່າຕ້ອງມີສະຕິໃນການບໍລິໂພກ, ກ່ອນຈະແຊຂ່າວ ຫລື ບັນຫາຕ່າງໆຕ້ອງພິຈາລະນາຊອກຫາແຫລ່ງທີ່ໄປທີ່ມາຂອງຂ່າວຢ່າງລະອຽດ, ຖ້າບໍ່ແມ່ນຂ່າວທີ່ເຜີຍແຜ່ ໂດຍເພສສື່ທາງການຂອງລາວ ເຊັ່ນ: Lao National Radio, ໂທລະພາບແຫ່ງຊາດລາວ, ປະເທດລາວ Pathedlao, Medai Lao ແລະ ອື່ນໆແລ້ວຕ້ອງລະວັງເພາະ ທ່ານອາດຕົກເປັນເຫຍື່ອຂອງການບໍລິໂພກຂ່າວປອມ ຫລື Fake News.

     ສະນັ້ນ ຈຶ່ງບໍ່ຄວນແຊ, ສະແດງຄວາມຄິດເຫັນ ແລະ ຕິດຕາມຢ່າງເດັດຂາດເພາະນັ້ນຈະເປັນການສະໜັບສະໜູນຂໍ້ມູນຂ່າວສານທີ່ບໍ່ຖືກຕ້ອງໃຫ້ກວ້າງຂວາງອອກຕື່ມ ແລະ ຍັງເປັນການສ້າງຄວາມວຸ້ນວາຍໃຫ້ແກ່ສັງຄົມ. ດັ່ງກໍລະນີທີ່ຫາກໍ່ຂຶ້ນຢູ່ແຂວງອຸດົມໄຊ ເມື່ອທ້າຍເດືອນຜ່ານມາ ໄດ້ມີບັນຊີເຟສບຸກຂ່າວທີ່ບໍ່ເປັນທາງການຈຳນວນໜຶ່ງ ໄດ້ເຜີຍແຜ່ຂ່າວສານທີ່ບໍ່ມີມູນຄວາມຈິງດ້ວຍການນຳເອົາວິດີໂອໄພນ້ຳຖ້ວມ ແລະ ຕັ້ງຫົວຂໍ້ຂ່າວວ່າ: “ນ້ຳຖ້ວມເມືອງ ຫລາ ແຂວງອຸດົມໄຊ ວັນທີ 25/7/ 2024 ບໍ່ມີສັນຍານ, ບໍ່ມີໄຟຟ້າ, ບໍ່ມີນ້ຳແຖມທາງຂາດຫາກະໄດ້ສັນຍານຕອນນີ້ ທີ 27/7/2024”  ແລະ ໄດ້ມີການແຊຂ່າວອອກໄປຫລາຍພໍສົມຄວນ ຊ່ຶງຂ່າວດ່ັງກ່າວນ້ີແມ່ນບ່ໍມີມູນຄວາມຈິງໃດໆ (ຂ່າວປອມ) ສຳລັບວິດີໂອດັ່ງກ່າວນີ້ແມ່ນວິດີໂອ ເຫດການໄພນ້ຳຖ້ວມທີ່ເກີດຂຶ້ນ ໃນ ຄັ້ງ ວັນທີ 26 ສິງຫາ 2022 ຜ່ານ ມາທີ່ເມືອງຫລາ ແຂວງອຸດົມໄຊ. ສະນັ້ນ ຈຶ່ງແຈ້ງເຕືອນເຖິງປະຊາຊົນ ບັນດາເຜົ່າ ໃຫ້ບໍລິໂພກຂ່າວຢ່າງມີ ສະຕິ, ຕິດຕາມຂໍ້ມູຂ່າວສານຈາກສຳ ນັກງານຂ່າວ ຫລື ແຫລ່ງຂ່າວທີ່ເປັນ ທາງການ, ໃນການນຳໃຊ້ຂ່າວສານຜ່ານສື່ສັງຄົມອອນລາຍທີ່ກ່ຽວຂ້ອງກັບແຂວງອຸດົມໄຊ ໃຫ້ຕິດຕາມຜ່ານເຟສບຸກສະຖານີວິທະຍຸ ແລະ ໂທລະພາບ ແຂວງອຸດົມໄຊ.

    ນັ້ນເປັນອີກໜຶ່ງກໍລະນີທີ່ເກີດຂຶ້ນ ໃນສ່ືສັງຄົມອອນລາຍ ຊຶ່ງໃນແຕ່ລະວັນແມ່ນຫລາຍເຫດການທີ່ເກີດຂຶ້ນ ເຮັດໃຫ້ຜູ້ບໍລິໂພກສື່ອອນລາຍເກີດຄວາມສັບສົນ ແລະ ຕົກເປັນເຫຍື່ອຂອງກຸ່ມຄົນບໍ່ດີແບບບໍ່ຮູ້ສຶກໂຕ. ການສ້າງໜ້າເພສຂ່າວປອມ ຂອງກຸ່ມຄົນບໍ່ດີນັ້ນ ແມ່ນມີຈຸດປະສົງເພື່ອເພີ່ມຍອດຕິດຕາມ, ຍອດແຊຕ່າງໆໂດຍຫວັງສ້າງຄວາມແຕກແຍກໃນສັງຄົມ, ສ້າງຄວາມຂັດແຍ່ງຕໍ່ແນວທາງນະໂຍບາຍຂອງພັກ-ລັດ ແລະ ອື່ນໆ. ສະນັ້ນ, ບັນຫາສຳຄັນຂອງການບໍລິໂພກຂໍ້ມູນຂ່າວສານຜ່ານສື່ອອນລາຍຕ້ອງມີສະຕິຮອບຄອບ, ຄິດກ່ອນແຊ, ຄິດກ່ອນສະແດງຄວາມຄິດເຫັນເພື່ອປ້ອງກັນໂຕທ່ານເອງ ແລະ ສັງຄົມ.

ໂດຍ: ໄໝຄຳ ຍ້ອມສິນ

KPL