ຂປລ. ໃນໄລຍະ 64 ປີຜ່ານມາ ເຖິງປັດຈຸບັນ, ວິທະຍຸກະຈາຍສຽງແຫ່ງຊາດລາວ ໄດ້ມີການເຕີບໃຫຍ່ຂະຫຍາຍຕົວ ທັງປະລິມານ ແລະ ຄຸນນະພາບ, ໄດ້ມີບົດບາດອັນສໍາຄັນ ໃນການເປັນກະບອກສຽງອັນແຫລມຄົມ ໃຫ້ແກ່ພັກ ແລະ ລັດຖະບານ ໃນການໂຄສະນາເຜີຍແຜ່ແນວທາງ ນະໂຍບາຍ ແລະ ຜົນສໍາເລັດ ໃນການນໍາພາ-ຊີ້ນໍາ ຂອງ ພັກ-ລັດ ໃນແຕ່ລະໄລຍະ, ປຸກລະດົມປະຊາຊົນທຸກຊັ້ນຄົນ ໃຫ້ມີຄວາມສາມັກຄີຮັກແພງ, ມີນໍ້າໃຈຮັກຊາດ, ຮັກບ້ານເກີດເມືອງນອນ, ພ້ອມທັງ ເຂົ້າຮ່ວມ ແລະ ສະໜັບສະໜູນ ການຈັດຕັ້ງຜັນຂະຫຍາຍ ແນວທາງນະ ໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດ.

ທ່ານ ສຸວັນ ວິໄລແສງ ຜູ້ອໍານວຍການໃຫຍ່ ວິທະຍຸກະຈາຍສຽງແຫ່ງຊາດລາວ ໃຫ້ສຳພາດຕໍ່ສື່ມວນຊົນ ໃນວັນທີ 7 ສິງຫາ 2024 ຜ່ານມາ, ໃນໂອກາດວັນສື່ມວນຊົນ ແລະ ການພິມຈໍາໜ່າຍ ຄົບຮອບ 74 ປີ (13/8/1950-13/8/2024) ວ່າ: ວິທະຍຸກະຈາຍສຽງແຫ່ງຊາດລາວ ໄດ້ສ້າງຕັ້ງຂຶ້ນໃນວັນທີ 13 ສິງຫາ 1960, ເປັນວັນດຽວກັນກັບ ວັນສ້າງຕັ້ງສື່ມວນຊົນ ແລະ ການພິມຈໍາໜ່າຍ ເຊິ່ງໃນປີນີ້, ມີອາຍຸຄົບຮອບ 64 ປີ, ການເຕີບໃຫຍ່ຂະຫຍາຍຕົວຂອງ ວິທະຍຸກະຈາຍສຽງແຫ່ງຊາດລາວ ໄດ້ຕິດພັນກັບ ປະຫວັດສາດຂອງຊາດ, ຂອງພັກ, ຂອງການປະຕິວັດ ແລະ ປະຊາຊົນລາວບັນດາເຜົ່າ ບໍ່ວ່າໃນສະໄໝຕໍ່ສູ້ປົດປ່ອຍຊາດ ກໍຄື ໄລຍະປົກປັກຮັກສາ ແລະ ສ້າງສາພັດທະນາປະ ເທດຊາດ, ວິທະຍຸກະຈາຍສຽງແຫ່ງຊາດ ຍັງຮັກສາໄດ້ບົດບາດອັນສໍາຄັນ ໃນການເປັນກະບອກສຽງອັນແຫລມຄົມຂອງພັກ ແລະ ລັດ ໃນການໂຄສະນາເຜີຍແຜ່ ແນວທາງນະໂຍບາຍ ຂອງພັກ-ລັດຖະບານ ວາງອອກ ໃນແຕ່ລະໄລ ຍະ, ພ້ອມທັງ ເຮັດໜ້າທີ່ໃນການອະທິບາຍ, ຊີ້ແຈງ ແລະ ຕອບໂຕ້ ຕາມກໍລະນີ ຕໍ່ກຸ່ມຄົນ ບໍ່ດີທີ່ຫວັງມ້າງເພທໍາລາຍລະບອບໃໝ່ຂອງພວກເຮົາ.

ມາຮອດປັດຈຸບັນ, ວິທະຍຸກະຈາຍສຽງແຫ່ງຊາດລາວ ໄດ້ມີການເຕີບໃຫຍ່ຂະຫຍາຍຕົວ ທັງປະລິມານ ແລະ ຄຸນນະພາບ ໄດ້ເປັນກະບອກສຽງອັນສຳຄັນ ໃນການໂຄສະນາເຜີຍແຜ່ ຂໍ້ມູນຂ່າວສານຕ່າງໆ ທັງຢູ່ ພາຍໃນ ແລະ ຕ່າງປະເທດ ໃຫ້ສັງຄົມ ໄດ້ຮັບຮູ້ຢ່າງທົ່ວເຖິງ ຜ່ານການອອກ ອາກາດຜ່ານ 4 ລະບົບ ຄື: AM, SW, FM ແລະ Radio Internet ເຊິ່ງແຕ່ລະວັນອອກອາກາດ 98 ລາຍກາຍ, ມີລາຍການຢູ່ໃນຄວາມຮັບຜິດຊອບທັງໝົດ 148 ລາຍການ. ໃນນີ້, ວິທະຍຸກະຈາຍສຽງແຫ່ງຊາດລາວ ຜະລິດເອງ 107 ລາຍການ, ຄູ່ຮ່ວມສັນຍາຜະລິດ 4 ລາຍການ, ຜູ້ເຊົ່າເວລາຜະລິດ 19 ລາຍການ ແລະ ພາກສ່ວນກະຊວງ, ອົງການຈັດຕັ້ງອື່ນໆ ຜະລິດ 18 ລາຍການ. ພ້ອມນີ້, ໃນຊຸມປີຜ່ານມານີ້, ວິທະຍຸກະຈາຍສຽງແຫ່ງຊາດ ໄດ້ຮັບການປັບປຸງ, ປ່ຽນຖ່າຍ ອຸປະກອນເຕັກນິກໃໝ່ ຈໍານວນໜຶ່ງ ເພື່ອຕອບສະໜອງ ໃຫ້ແກ່ການຜະລິດຂ່າວ, ຜະລິດລາຍການ, ລະບົບສະຕູດີໂອ ແລະ ລະບົບຄວບຄຸມ ການອອກອາກາດ ຈາກລະບົບອານາລອກ ເປັນດີຈິຕອນ ຕາມທ່າອ່ຽງລວມຂອງພາກພື້ນ ແລະ ສາກົນ, ໄດ້ປັບປຸງເນື້ອໃນ ແລະ ຮູບແບບລາຍການ ໃຫ້ມີເນື້ອຫາສາລະ, ມີຄວາມຫລາກຫລາຍ ດຶງດູດຜູ້ຟັງໃຫ້ມາຕິດຕາມ ແລະ ຊົມລາຍການທາງ ວິທະຍຸໃຫ້ຫລາຍຂຶ້ນ, ເປີດໂອກາດໃຫ້ພາກເອກະຊົນ, ນິຕິບຸກຄົນ ເຂົ້າມາມີສ່ວນຮ່ວມ ໃນການໃນການຜະລິດ ແລະ ສ້າງສັນລາຍການ ນໍາວິທະຍຸພວກເຮົາ ນັບມື້ຫລາຍຂຶ້ນ. ພ້ອມນີ້, ຍັງໄດ້ຊຸກຍູ້ສົ່ງເສີມ ໃຫ້ນັກຈັດລາຍການ ຈັດລາຍການສົດ ແລະ ອອກອາກາດ ຄຽງຄູ່ກັນ ທັງແບບໄດ້ຍິນແຕ່ສຽງ (ຮູບແບບເກົ່າ) ແລະ ມີທັງພາບ ແລະ ສຽງ (ຮູບແບບໃໝ່) ຜ່ານລະບົບອອນລາຍ, ຜ່ານທາງເວັບໄຊ ຂອງວິທະຍຸກະຈາຍສຽງແຫ່ງຊາດລາວ ແລະ ເຟສບຸກ.

ໂອກາດນີ້, ທ່ານ ສຸວັນ ວິໄລແສງ ຍັງໄດ້ຮຽກຮ້ອງ ໃຫ້ສື່ມວນຊົນລາວ ທຸກຂະແໜງການ ພ້ອມກັນ ສືບຕໍ່ເຮັດໜ້າທີ່ ເປັນກະບອກສຽງທີ່ສໍາຄັນໃຫ້ແກ່ ພັກ-ລັດ ແລະ ປະຊາຊົນລາວບັນດາເຜົ່າ ເພື່ອໂຄສະນາແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມ, ລະບຽບກົດໝາຍ ຂອງລັດວາງອອກ ໃຫ້ດີຂຶ້ນກວ່າເກົ່າ, ພ້ອມທັງເປັນເວທີໃຫ້ຂໍ້ມູນຂ່າວສານ, ສາລະໜ້າຮູ້ ແລະ ສາລະບັນເທິງ, ສ້າງຄວາມສາມັກຄີປອງດອງ, ກະຕຸກຊຸກຍູ້ ໃຫ້ທຸກຊັ້ນຄົນ ໃນສັງຄົມ ປະຕິບັດລະບຽບກົດໝາຍ ປະກອບສ່ວນເປັນກໍາລັງແຮງ ສ້າງສາພັດທະນາປະເທດຊາດ. ພ້ອມກັນນີ້, ທັງເນື້ອໃນ ແລະ ຮູບແແບການໂຄສະນາຂອງສື່ມວນຊົນ ຕ້ອງໄດ້ປັບປຸງໃຫ້ມີຄວາມຫລາກຫລາຍ ແລະ ດຶງດູດໃຈຜູ້ຟັງ, ຜູ້ຊົມ ແລະ ຜູ້ອ່ານ ຂຶ້ນກວ່າເກົ່າ, ໄປພ້ອມໆ ກັບການປັບປຸງ ແລະ ພັດທະນາລະບົບເຕັກໂນໂລຊີແບບໃໝ່, ຫັນເປັນທັນສະໄໝ ແລະ ຍົກລະດັບບຸກຄະລາກອນສື່ ໃຫ້ມີຄຸນນະພາບສູງຂຶ້ນ, ທັງສາມາດວິເຄາະ-ວິໄຈ, ຕອບໂຕ້ ແລະ ວິຈານບັນຫາຕ່າງໆ ໃຫ້ສັງຄົມໄດ້ຮັບຮູ້ ຕາມ 4 ລັກສະນະຂອງສື່ມວນຊົນລາວ ຄື: ລັກສະນະຕົວຈິງ, ລັກສະນະສຶກສາອົບຮົມ, ລັກສະນະແນະນໍາ ແລະ ລັກສະນະຕໍ່ສູ້.

ຂ່າວ: ທະນູທອງ

ພາບ: ອ່າຍຄຳ

KPL