ຂປລ. ແຫລ່ງຂ່າວຈາກ ແຂວງອຸດົມໄຊ ໃຫ້ຮູ້ວ່າ: ການປູກອ້ອຍຂາຍເປັນສິນຄ້າ ເພື່ອສ້າງລາຍຮັບມາສູ່ຄອບຄົວ ສາມາດສ້າງລາຍຮັບສະເລ່ຍ 80 ລ້ານກີບຕໍ່ຫລັງຄາເຮືອນຕໍ່ປີ.
  ທ່ານ ຢາພູ້ ແຊ່ງປື້ ນາຍບ້ານໆ ຕືກາ ເມືອງນາໝໍ້ ແຂວງອຸດົມໄຊ ໄດ້ໃຫ້ສຳພາດໃນວັນທີ 9 ກໍລະກົດ 2024 ນີ້ວ່າ: ບ້ານຕືກາ ຕັ້ງຢູ່ຫ່າງຈາກເທສະບານເມືອງ ປະມານ 52 ກິໂລແມັດ, ເນື້ອທີ່ບ້ານທັງໝົດ 656.54 ເຮັກຕາ, ມີຊາຍແດນຕິດກັບບ້ານປາງໄຄ ເມືອງບຸນໃຕ້ ແຂວງຜົ້ງສາລີ ເປັນເຜົ່າອາຄາ ກວມເອົາ 100%, ມີ 57 ຫລັງຄາເຮືອນ, 68 ຄອບຄົວ, ພົນລະເມືອງທັງໝົດ 273 ຄົນ ຍິງ 134 ຄົນ, ແຮງງານຕົ້ນຕໍ 130 ແຮງງານ, ປະຊາຊົນມີມູນເຊື້ອດູໝັ່ນຂະຫຍັນພຽນ ແລະ ຖືອາຊີບປູກຝັງ, ລ້ຽງສັດ ເປັນຕົ້ນຕໍ່ ອາຊີບຫລັກແມ່ນປູກອ້ອຍຂາຍເປັນສິນຄ້າ ເພື່ອສ້າງລາຍຮັບມາສູ່ຄອບຄົວ ກວມເອົາເກືອບ 100% ຂອງຫລັງຄາເຮືອນທັງໝົດ ສາມາດສ້າງລາຍຮັບສະເລ່ຍ 80 ລ້ານກີບຕໍ່ຫລັງຄາເຮືອນຕໍ່ປີ.
  ການປູກອ້ອຍຂອງປະຊາຊົນ ບ້ານຕືກາ ແມ່ນໄດ້ເລີ່ມປູກມາແຕ່ປີ 2008 ໂດຍແມ່ນການຊຸກຍູ້, ສົ່ງເສີມຂອງພັກ-ລັດ ດ້ວຍຄວາມເປັນຫ່ວງເປັນໄຍ ຢາກໃຫ້ປະຊາຊົນມີອາຊີບທີດີ ຫລຸດພົ້ນອອກຈາກຄວາມທຸກຍາກເທື່ອລະກ້າວ ໄດ້ຊອກຫານັກລົງທຶນ ມາຊ່ວຍຊຸກຍູ້ສົ່ງເສີມ ໂດຍແມ່ນ ບໍລິສັດ ໂຮງງານ ຈຸຢູນ ເມືອງລ້າ ສປ ຈີນ ມາລົງທຶນ ແລະ ຊື້ຄືນ ແລະ ໃກ້ຊິດຕິດເທດ, ພ້ອມນີ້, ຫ້ອງການກະສິກໍາ ແລະ ປ່າໄມ້ ເມືອງນາໝໍ້ ໄດ້ຊຸກຍູ້ສົ່ງເສີມ ໂດຍຊ່ວຍແນະນໍາ ຂະບວນການປູກ, ວິທີບົວລະບັດຮັກສາ, ເຊິ່ງການປູກໄລຍະທໍາອິດ ມີພຽງ 30 ຫລັງຄາເຮືອນ ຕໍ່ມາກໍໄດ້ມີການຂະຫຍາຍການປູກເພີ່ມຂຶ້ນ ປັດຈຸບັນນີ້ ມີທັງໝົດ 56 ຫລັງຄາ ປູກອ້ອຍໃນເນື້ອທີ່ 48 ເຮັກຕາ ໃນນີ້, ຂະຫຍາຍໃໝ່ 18 ເຮັກຕາ, ການລົງທຶນປູກອ້ອຍແມ່ນບໍລິສັດເປັນຜູ້ລົງທຶນ ລວມມີ ຄ່າໄຖ, ປຸ໋ຍ, ຜ້າຢ່າງປົກໜານ, ຢາຂ້າແມງໄມ້, ສ້ອມແປງທາງເຂົ້າສວນອ້ອຍ, ຄ່າຂົນສົ່ງ, ແຕ່ພາຍຫລັງຕັດອ້ອຍຂາຍ ບໍລິສັດຈະຫັກຄ່າລົງທຶນດັ່ງກ່າວຄືນ. ສ່ວນປະຊາຊົນ ແມ່ນປະກອບສ່ວນທາງດ້ານແຮງງານ ບົວລະບັດຮັກສາ ແລະ ຂົນອ້ອຍຂຶ້ນລົດ.
   ທ່ານ ຢາພູ້ ແຊ່ງປື້ ໃຫ້ຮູ້ຕື່ມວ່າ: ບ້ານຕືກາ ຕັ້ງແຕ່ເລີ່ມມີກິດຈະກໍາປູກອ້ອຍ ເຮັດໃຫ້ປະຊາຊົນມີລາຍຮັບ, ມີຊີວິດການເປັນຢູ່ທີດີຂຶ້ນ ເມື່ອທຽບໃສ່ເມື່ອກ່ອນ, ເຊິ່ງແຕ່ລະປີສາມາດສະເລ່ຍໄດ້ 4.000 ໂຕນຕໍ່ປີ ແລະ ສ້າງລາຍຮັບໄດ້ 4,5 ຕື້ກວ່າກີບຕໍ່ປີ ສະເລ່ຍໃສ່ຫລັງຄາເຮືອນ ໄດ້ 80 ລ້ານກວ່າກີບຕໍ່ຫລັງຄາເຮືອນຕໍ່ປີ. ແຕ່ເຖິງຢ່າງໃດກໍຕາມ ການປູກອ້ອຍຍັງພົບຄວາມຍຸ້ງຍາກຢູ່ ເປັນຕົ້ນ ແຮງງານ, ເຊິ່ງຍັງຕ້ອງການແຮງງານຈຳນວນຫລາຍເວລາຕັດ ແລະ ຂົນຂຶ້ນລົດ, ພ້ອມນີ້ ມີບັນຫາດ້ານສັດຕູພຶດທໍາລາຍ ບາງປີດິນຟ້າອາກາດບໍ່ອໍານວຍ ຈະໄດ້ປະລິມານຫລຸດລົງ ແລະ ປະຊາຊົນບໍ່ມີວັດຖຸ-ອຸປະກອນ ທີ່ກ່ຽວຂ້ອງ ໂດຍສະເພາະເຄື່ອງຈັກ ເພື່ອຊ່ວຍໃນການປູກ-ຕັດອ້ອຍ ເນື່ອງຈາກວ່າທຸກອັນແມ່ນເປັນຂອງບໍລິສັດລົງທຶນ ເຮັດໃຫ້ປະຊາຊົນບໍ່ໄດ້ລາຍຮັບທີ່ດີເທົ່າທີ່ຄວນ, ແຜນການຕໍ່ໜ້າຈະສູ້ຊົນ ຂະຍາຍເນື້ອທີ່ປູກອ້ອຍຕື່ີມ ຕາມຄວາມສາມາດ ແລະ ເງື່ອນໄຂຂອງແຕ່ລະຄອບຄົວ ເພື່ອຈະສ້າງລາຍຮັບໃຫ້ຫລາຍຂຶ້ນຕື່ມ.

KPL