ຂປລ
ຂປລ. ການສ້າງເສດຖະກິດ ເອກະລາດ ເປັນເຈົ້າຕົນເອງ ຢ່າງມີບາດກ້າວເດີນທີ່ໝັກແໝ້ນ ຕ້ອງແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ໄປພ້ອມກັບການປະສານຢ່າງກົມກຽວ ລະຫວ່າງ ການຍູ້ແຮງພາກການຜະລິດ, ການບໍລິການ ເພື່ອຕອບສະໜອງ ຄວາມຕ້ອງການຊົມໃຊ້ພາຍໃນ ແລະ ສ້າງຄວາມເຂັ້ມແຂງ ຂອງຖານລາຍຮັບພາຍໃນ ກັບການເພີ່ມທະວີປະສິດທິພາບ ໃນການຄຸ້ມຄອງລາຍຮັບ ແລະ ການດຳເນີນມາດຕະການປະຢັດຢ່າງຈິງຈັງ, ທົບທວນຄືນຍຸດທະສາດ
ຂປລ. ການສ້າງເສດຖະກິດ ເອກະລາດ ເປັນເຈົ້າຕົນເອງ ຢ່າງມີບາດກ້າວເດີນທີ່ໝັກແໝ້ນ ຕ້ອງແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ໄປພ້ອມກັບການປະສານຢ່າງກົມກຽວ ລະຫວ່າງ ການຍູ້ແຮງພາກການຜະລິດ, ການບໍລິການ ເພື່ອຕອບສະໜອງ ຄວາມຕ້ອງການຊົມໃຊ້ພາຍໃນ ແລະ ສ້າງຄວາມເຂັ້ມແຂງ ຂອງຖານລາຍຮັບພາຍໃນ ກັບການເພີ່ມທະວີປະສິດທິພາບ ໃນການຄຸ້ມຄອງລາຍຮັບ ແລະ ການດຳເນີນມາດຕະການປະຢັດຢ່າງຈິງຈັງ, ທົບທວນຄືນຍຸດທະສາດ ກໍຄື ການພັດທະນາ ໂຄງປະກອບເສດຖະກິດເຂດແຄວ້ນ ເພື່ອກະຈາຍຄວາມໄດ້ປຽບ ດ້ານທີ່ຕັ້ງ ເຊິ່ງທ່າແຮງຂອງແຕ່ລະທ້ອງຖິ່ນ ເປັນກຳລັງຂັບເຄື່ອນໃຫ້ແກ່ ການພັດທະນາປະເທດຊາດ.
ໃນມະຕິຂອງກົມການເມືອງສູນກາງພັກ ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ໄດ້ຍົກໃຫ້ເຫັນວ່າ: ຢາກສ້າງເສດຖະກິດ ເອກະລາດ ເປັນເຈົ້າຕົນເອງຢ່າງມີບາດ ກ້າວເດີນທີ່ໝັກແໝ້ນ ຕ້ອງສືບຕໍ່ສົ່ງເສີມການຄ້າຢູ່ປະເທດເຮົາ ເປັນຕ່ອງໂສ້ຕົ້ນຕໍ ຂອງລະບົບເສດຖະ ກິດ, ກະຕຸ້ນການເຕີບໂຕ ທາງດ້ານເສດຖະກິດ ໃຫ້ແຂງແຮງ ຕິດພັນກັບການພັດທະນາອຸດສາຫະກໍາປຸງແຕ່ງ ແຕ່ເນັ້ນໄປສູ່ການຫັນເປັນອຸດສາຫະກໍາ ແລະ ທັນສະໄໝ ໃຫ້ກາຍເປັນສາຍພານ ຂອງການຜະລິດທີ່ໜຽວແໜ້ນ ແນໃສ່ເຮັດໃຫ້ການພັດທະນາ ເສດຖະກິດແຫ່ງຊາດ ມີກໍາລັງແຮງທີ່ນັບມື້ສ້າງ ໄດ້ໂຄງປະກອບຂະແໜງ ເສດຖະກິດທີ່ເຂັ້ມແຂງ ຈາກສູນກາງ ໄປສູ່ເສດຖະກິດເຂດແຄວ້ນ ໄດ້ຢ່າງສະໝໍ່າສະເໝີ, ທັງເປີດກວ້າງໄດ້ການຜະລິດສິນຄ້າ, ເຮັດໃຫ້ເປັນແມ່ແຮງ ຂອງການສ້າງຖານລາຍຮັບ ນັບມື້ນັບຫລາຍຂຶ້ນ ແລະ ໄປຕາມທິດສັງຄົມນິຍົມ.
ພ້ອມກັນນີ້, ຕ້ອງປັບປຸງໂຄງສ້າງດ້ານງົບປະມານແຫ່ງລັດ ແລະ ຄຸ້ມຄອງໜີ້ສາທາລະນະ, ເພີ່ມທະວີການສະກັດກັ້ນ ບໍ່ໃຫ້ເກີດມີໜີ້ສິນເກີນການຄວບຄຸມ ແລະ ເປັນເຈົ້າການດຸ່ນດ່ຽງໜີ້ສິນຢ່າງມີວິທະຍາສາດ, ຖືກຕາມຫລັກເສດຖະສາດ ແນໃສ່ຮັບປະກັນ ໃຫ້ພື້ນຖານ ລະບົບການເງິນແຫ່ງຊາດ ມີຄວາມໝັ້ນຄົງ, ຍືນຍົງ, ຮັກສາສະຖຽນລະພາບເສດຖະກິດມະຫາພາກ; ສຸມໃສ່ສ້າງໃຫ້ໄດ້ຄວາມເປັນເຈົ້າດ້ານການເງິນ ໂດຍສະເພາະການເກັບລາຍຮັບ, ຄຸ້ມຄອງລາຍຈ່າຍ, ການສະສົມໃຫ້ຄັງເງິນ ມີຄວາມເຕີບໃຫຍ່, ເຂັ້ມແຂງ; ປັບປຸງກົນໄກການເຄື່ອນໄຫວ ຂອງທະນາຄານ ເພື່ອສ້າງຄວາມເຂັ້ມແຂງ ໃຫ້ແກ່ການຄຸ້ມຄອງເງິນຕາ, ວຽກງານສິນເຊື່ອ ເພື່ອຊຸກຍູ້ການຜະລິດ ແລະ ການບໍລິການ, ການສົ່ງເສີມວິສາ ຫະກິດຂະໜາດນ້ອຍ ແລະ ຂະໜາດກາງ, ກຸ່ມຜະລິດ ແລະ ສະຫະກອນ, ສຸມໃສ່ສ້າງໃຫ້ໄດ້ຄວາມເປັນເຈົ້າ ດ້ານວຽກງານເງິນຕາແຫ່ງຊາດ; ສືບຕໍ່ຍຶດໝັ້ນ ແລະ ຖືການບຸກທະລຸໃນຂົງເຂດບໍລິຫານ-ຄຸ້ມຄອງ ແຜນການ, ການເງິນ, ເງິນຕາ ສູ່ຄວາມໂປ່ງໃສ ແລະ ກວດສອບໄດ້, ມີປະສິດທິພາບເປັນໜ້າທີ່ຮີບດ່ວນ ທີ່ຕ້ອງສຸມໃສ່ແກ້ໄຂ, ທັງເປັນບັນຫາຍາວນານ ທີ່ຕ້ອງດຳເນີນການບູລະນະ ຢ່າງເປັນປະຈຳ ແລະ ຕໍ່ເນື່ອງ; ຕ້ອງຫັນປ່ຽນໂຄງປະກອບ ການລົງທຶນ ຂອງລັດ, ເນັ້ນການລົງທຶນທີ່ມີປະສິດທິຜົນຕົວຈິງ, ປະຕິຮູບລັດວິສາຫະກິດຢ່າງຈິງຈັງ, ທັງຄົ້ນຄວ້າສ້າງຕັ້ງລັດ ວິສາຫະກິດ ໃນຂະແໜງການ ທີ່ເປັນປາຍແຫລມ ແລະ ຂະແໜງບໍລິການສາທາລະນະ.
ຂ່າວ: ກິດຕາ
KPL