ຂປລ. ໄຊຊະນະບັ້ນຮົບດຽນບຽນຟູ ແມ່ນຈຸດສູງສຸດ, ແມ່ນການທົດສອບກຳລັງແຮງຮອບດ້ານ ດຸເດືອດຂ້ຽວຂາດທີ່ສຸດ ໃນພາລະກິດຕໍ່ສູ້ກູ້ຊາດ ລະຫວ່າງ ກອງທັບປະຊາຊົນຫວຽດນາມ ກັບພວກລ່າເມືອງຂຶ້ນຜູ້ຮຸກຮານ ແລະ ການແຊກແຊງຊ່ວຍໜູນ ຂອງຈັກກະພັດລ່າ​ເມືອງ​ຂຶ້ນ​ແບບ​ໃໝ່. ໄຊຊະນະດຽນບຽນຟູ ບໍ່ພຽງແຕ່ແມ່ນການປະກາດເຖິງການມໍລະນະ ຂອງພວກລ່າເມືອງຂຶ້ນຢູ່ຫວຽດນາມ ກໍຄືຢູ່ໃນອິນດູຈີນ, ແຕ່ຍັງເປັນການຕີເອົາຊະນະຈັກກະພັດລ່າ​ເມືອງ​ຂຶ້ນ​ແບບ​ໃໝ່ ຂອງກອງທັບປະຊາຊົນຫວຽດນາມ. ໄຊຊະນະບັ້ນຮົບດຽນບຽນຟູ ໄດ້ເຮັດໃຫ້ລັດທິລ່າເມືອງຂຶ້ນແບບເກົ່າ ຖືກພັງທະລາຍເປັນເທື່ອທຳອິດ ຢູ່ໃນໂລກ, ບັງຄັບໃຫ້ພວກວາງແຜນຍຸດທະສາດ ຂອງລັດທິລ່າເມືອງຂຶ້ນ ຕ້ອງໄດ້ຫັນທິດໄປສູ່ ການປະຕິບັດລັດທິລ່າເມືອງແບບໃໝ່.

ໄຊຊະນະດຽນບຽນຟູ ແລະ ໄຊຊະນະໃນການຕໍ່ສູ້ກູ້ຊາດ ຕ້ານພວກລ່າເມືອງຂຶ້ນ ຂອງປະຊາຊົນຫວຽດນາມ, ລາວ ແລະ ກຳປູເຈຍ ແມ່ນເປັນເທື່ອທຳອິດ ທີ່ໄດ້ເຮັດໃຫ້ລັດທິລ່າເມືອງ ແບບເກົ່າຖືກພັງທະລາຍລົງ ຢູ່ໃນໂລກ. ໄຊຊະນະດັ່ງກ່າວ, ຍັງເປັນບ່ອນອີງ ທີ່ໜັກແໜ້ນ, ທັງເປັນແວ່ນແຍງທີ່ໃສແຈ້ງໃຫ້ແກ່ ບັນດາປະຊາຊາດທີ່ຕົກເປັນຫົວເມືອງຂຶ້ນ ໄດ້ລຸກຂຶ້ນຕໍ່ສູ້ຕ້ານກັບ ການກົດຂີ່ຂູດຮີດ ແລະ ແອກຄອບຄອງເມືອງຂຶ້ນແບບເກົ່າ ຢູ່ຫລາຍບ່ອນໃນທົ່ວໂລກ, ປະກອບສ່ວນອັນສົມກຽດ ເຂົ້າໃນພາລະກິດຕໍ່ສູ້ອັນຍິ່ງໃຫຍ່ ຂອງມວນມະນຸດທີ່ກ້າວໜ້າເພື່ອສັນຕິພາບ, ເອກະລາດ, ປະຊາທິປະໄຕ ແລະ ຄວາມກ້າວໜ້າຂອງສັງຄົມ; ໄຊຊະນະດຽນບຽນຟູ ເປັນຄວາມເອກອ້າງທະນົງໃຈ ຂອງປະຊາຊົນຫວຽດນາມ ໃນພາລະກິດສ້າງສາພັດທະນາ ປະເທດຊາດຊົ່ວກາລະນານ, ມານະຈິດຂອງດຽນບຽນຟູ ຍັງໃສແຈ້ງ, ຍັງເປັນກຳລັງແຮງປຸກລະດົມອັນຍິ່ງໃຫຍ່ ຂອງປະຊາຊົນຫວຽດນາມ ໃນພາລະກິດປ່ຽນແປງໃໝ່ແນໃສ່ ປະຕິບັດຈຸດໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ, ສັງຄົມມີຄວາມສະເໝີພາບ, ປະຊາທິປະ ໄຕ, ສີວິໄລ”.

ດຽນບຽນຟູ ຕັ້ງຢູ່ແຂວງ ດຽນບຽນ ທາງທິດຕາເວັນຕົກສ່ຽງເໜືອ ຂອງຫວຽດນາມ ມີຊາຍແດນຕິດຈອດກັບ ສປປ ລາວ, ດຽນບຽນຟູ ແມ່ນພື້ນທີ່ຍຸດທະສາດທີ່ສຳຄັນ ເຊິ່ງເຊື່ອມຕໍ່ກັນ ລະ ຫວ່າງ ພາກເໜືອຫວຽດນາມ, ພາກໃຕ້ຂອງຈີນ ແລະ ພາກຕາເວັນອອກ ສ່ຽງເໜືອຂອງລາວ. ​ສຳລັບປະເທດລາວ ໄຊຊະນະດຽນບຽນຟູ ໄດ້ມີຄວາມສຳຄັນໃນການສາມັກຄີພິເສດ, ຮ່ວມສຳພັນສູ້ຮົບ ລະ ຫວ່າງ ລາວ-ຫວຽດນາມ, ເປັນໄຊຊະນະຕ້ານສັດຕູຕົວດຽວກັນ, ປະສານສົມທົບ ແລະ ອຸດໜູນ ​ເຊິ່ງກັນ ແລະ ກັນ ເພາະວ່າດຽນບຽນຟູ ຢູ່ໃກ້ໆກັບຜົ້ງສາລີ ແລະ ຫົວພັນ.

ຂ່າວ: ສົມ​ຫວັງ

KPL