ຂປລ
ຂປລ. ກົມປູກຝັງ ກະຊວງກະສິກໍາ ແລະ ປ່າໄມ້, ຈັດກອງປະຊຸມ ລາຍງານຜົນສໍາເລັດ ຂອງການຈັດຕັ້ງປະຕິບັດໂຄງການ ແລະ ປິດໂຄງການສ້າງຄວາມເຂັ້ມແຂງ ໃນການຜະລິດໃບຊາເປັນສິນຄ້າ ໃນວັນທີ 24 ເມສາ 2024 ຜ່ານມາ ໂດຍການເປັນປະທານຂອງ ທ່ານ ຟຣັງຊົວຊາເວຍດີວປໍສ ຫົວໜ້າອົງການຝຣັ່ງ
ຂປລ. ກົມປູກຝັງ ກະຊວງກະສິກໍາ ແລະ ປ່າໄມ້, ຈັດກອງປະຊຸມ ລາຍງານຜົນສໍາເລັດ ຂອງການຈັດຕັ້ງປະຕິບັດໂຄງການ ແລະ ປິດໂຄງການສ້າງຄວາມເຂັ້ມແຂງ ໃນການຜະລິດໃບຊາເປັນສິນຄ້າ ໃນວັນທີ 24 ເມສາ 2024 ຜ່ານມາ ໂດຍການເປັນປະທານຂອງ ທ່ານ ຟຣັງຊົວຊາເວຍດີວປໍສ ຫົວໜ້າອົງການຝຣັ່ງ ເພື່ອການພັດທະນາປະຈໍາລາວ, ທ່ານ ບຸນຈັນ ກົມບຸນຍະສິດ ຫົວໜ້າກົມປູກຝັງ ກະ ຊວງກະສິກໍາ ແລະ ປ່າໄມ້, ມີກຸ່ມຜະລິດຊາບັນດາແຂວງເປົ້າໝາຍຂອງໂຄງການ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນຈັນ ກົມບຸນຍະສິດ ໄດ້ໃຫ້ຮູ້ວ່າ: ໂຄງການສ້າງຄວາມເຂັ້ມແຂງ ໃນການຜະລິດໃບຊາເປັນສິນຄ້າ(Mekong Tea Project) ເປັນໂຄງການທີ່ໄດ້ຮັບທຶນ ການຊ່ວຍເຫລືອຈາກ ອົງການຝຣັ່ງເພື່ອການພັດທະນາ(AFD) ໃນມູນຄ່າ 1.500.000 ເອີໂຣ ເຊິ່ງກະຊວງກະສິກຳ ແລະ ປ່າໄມ້ ກໍຄື ກົມປູກຝັງ ເປັນຜູ້ຈັດຕັ້ງປະຕິບັດຮ່ວມກັບອົງການທີ່ປຶກສາດ້ານກະສິກຳ ອົງການ GRET, ອົງການ AVSF ແລະ ອົງການ LCG ຈັດຕັ້ງປະຕິບັດ ເລີ່ມແຕ່ເດືອນມີນາ 2019 ໂດຍໂຄງການໄດ້ກໍານົດພື້ນທີ່ຕົວແບບ ຈັດຕັ້ງປະຕິບັດຢູ່ 2 ແຂວງຄື: ເມືອງໄຊສະຖານ ແຂວງໄຊຍະບູລີ ແລະ ເມືອງເມິງ ແຂວງບໍ່ແກ້ວ ເຊິ່ງຈຸດປະສົງຫລັກຂອງໂຄງການ ເພື່ອສ້າງຄວາມເຂັ້ມແຂງ ໃຫ້ແກ່ກະສິກອນຜູ້ຜະລິດຊາຂະໜາດນ້ອຍ ດ້ວຍການປັບປຸງຕ່ອງໂສ້ມູນຄ່າ ແລະ ການເຂົ້າເຖິງ ຕະຫລາດດ້ວຍ ການຢັ້ງຢືນຜະລິດຕະພັນ ທີ່ໄດ້ຄຸນນະພາບ ແລະ ໂຄງການດັ່ງກ່າວແມ່ນສິ້ນສຸດ ການຈັດຕັ້ງປະຕິບັດ ໃນເດືອນມີນາ 2024 ຜ່ານມານີ້.
ທ່ານ ບຸນຈັນ ກົມບຸນຍະສິດ ໄດ້ສະແດງຄວາມຂອບໃຈ ຕໍ່ອົງການຝຣັ່ງເພື່ອການພັດທະນາ ແລະ ຄູ່ຮ່ວມພັດທະນາ ທີ່ກ່ຽວຂ້ອງທຸກພາກສ່ວນ ທີ່ຍາມໃດກໍໄດ້ໃຫ້ການສະໜັບສະໜູນ ທາງດ້ານວິຊາການ ແລະ ງົບປະມານ, ຮຽກຮ້ອງອົງການຝຣັ່ງ ເພື່ອການພັດທະນາ ສືບຕໍ່ສະໜັບສະໜູນ ໂຄງການໃບຊາໃຫ້ຫລາຍຂຶ້ນ ແລະ ຄູ່ຮ່ວມມືອື່ນໆ ໃຫ້ມາສະໜັບສະໜູນ, ຮຽກຮ້ອງໃຫ້ແຂວງ, ເມືອງ, ຜູ້ປະກອບການພາຍໃນ ແລະ ຕ່າງປະເທດພ້ອມກັນຂຸດຄົ້ນທ່າແຮງຊາລາວ ໃຫ້ກ້າວສູ່ສາກົນ.
ແຫລ່ງຂ່າວ: ປະຊາຊົນ
KPL