ຂປລ. ເມື່ອບໍ່​ດົນມານີ້, ທ່ານ ແກ້ວຈະເລີນ ເຊ່ຍຢີ້ງຢ່າງ ຮອງປະທານກຳມາທິການບັນດາເຜົ່າ ສະພາແຫ່ງຊາດພ້ອມຄະນະ ລົງຕິດຕາມກວດກາ ວຽກງານພັດທະນາຊົນນະບົດ, ແກ້ໄຂຄວາມທຸກ ແລະ ວຽກງານ 3 ສ້າງ ຂອງປະຊາຊົນບັນດາເຜົ່າຢູ່ ແຂວງໄຊຍະບູລີ ໂດຍໄດ້ຮັບຟັງການລາຍງານຈາກ ທ່ານ ນາງ ວິລະພອນ ທອງພິມ ຮອງປະທານສະພາປະຊາຊົນແຂວງ ໃນການຈັດຕັ້ງປະຕິບັດ ວຽກງານກໍ່ສ້າງຮາກຖານການເມືອງ ຕິດພັນກັບວຽກງານພັດທະນາຊົນນະບົດ ແກ້ໄຂຄວາມທຸກຍາກ ແລະ ວຽກງານ 3 ສ້າງ ທົ່ວແຂວງ (2016-2021) ແລະ ທິດທາງຮອດປີ 2025.

ທ່ານ ນາງ ວິລະພອນ ທອງພິມ ​ໄດ້​ໃຫ້​ຮູ້ວ່າ: ແຂວງໄຊຍະບູລີ ປະກອບມີ 11 ເມືອງ, 430 ບ້ານ ແລະ ມີຫລາຍກວ່າ 80 ພັນຄອບຄົວ, ມີປະຊາກອນຫລາຍກວ່າ 4 ແສນຄົນ, ຍິງເກືອບ 2 ແສນ ຄົນ, ປະກອບດ້ວຍ 8 ເຜົ່າຄື: ເຜົ່າລາວ, ເຜົ່າກຶມມຸ, ເຜົ່າມົ້ງ, ເຜົ່າລື້, ເຜົ່າໄປລ່, ເຜົ່າຍວນ, ເຜົ່າອີວມຽນ, ເຜົ່າໄທດຳ, ຄວາມໜາແໜ້ນຂອງຜົນລະເມືອງສະເລ່ຍ 25 ຄົນຕໍ່ກິໂລຕາແມັດ, ແຕ່ລະເຜົ່າແມ່ນມີຄວາມເຊື່ອຖືແຕກຕ່າງກັນ. ​ໃນ​ນັ້ນ, ເຊື່ອຖືສາສະໝາພຸດ 70%, ເຊື່ອຖືບັນພະບູລຸດ 27% ແລະ ສາສະໜາເຢຊູຄລິສ 0,97%. ທົ່ວແຂວງ ແມ່ນມີທ່າແຮງບົ່ງຊ້ອນຫລາຍດ້ານທີ່ເປັນເງື່ອນໄຂຕໍ່ການພັດ ທະນາເສດຖະກິດ-ສັງຄົມ ເປັນຕົ້ນ ຂົວຂ້າມນ້ຳຂອງ 3 ແຫ່ງ, ເຂື່ອນໄຟຟ້າຂະໜາດໃຫຍ່ 2 ແຫ່ງ, ຂະ  ໜາດກາງ 1 ແຫ່ງ, ມີດ່ານສາກົນ 4 ແຫ່ງ, ມີແຫລ່ງທ່ອງທ່ຽວ ທຳມະຊາດຫລາຍແຫ່ງ ທີ່ໄດ້ຮັບການພັດທະນາ ແລະ ມີວັດທະນະທຳທີ່ເປັນເອກະລັກ ເທສະການບຸນຊ້າງ ແລະ ບຸນປະເພນີຂອງແຕ່ລະເຜົ່າ ແຕ່ລະທ້ອງຖິ່ນ; ປະຊາຊົນບັນດາເຜົ່າ ມີມູນເຊື້ອດຸໝັ່ນໃນການທຳ ການຜະລິດກະສິກຳເປັນສິນຄ້າ ນັບມືເພີ່ມຂຶ້ນສະເລ່ຍ 4,9% ຕໍ່ປີ, ລາຍຮັບສະເລ່ຍຜູ້ໜຶ່ງໄດ້ຫລາຍກວ່າ 1.700 ໂດລາສະຫະລັດຕໍ່ຄົນຕໍ່ປີ.

ໃນໄລຍະຜ່ານມາ, ທຸກພາກສ່ວນກ່ຽວຂ້ອງ ໄດ້ເອົາໃຈໃສ່ຕໍ່ວຽກງານຂອງຕົນ ທີ່ຕິດພັນກັບວຽກງານພັດ ທະນາຊົນນະບົດ, ແກ້ໄຂຄວາມທຸກຍາກ ແລະ ວຽກງານ 3 ສ້າງຂອງປະຊາຊົນ ອັນໄດ້ເຮັດໃຫ້ຄວາມທຸກຍາກ ຂອງປະຊາຊົນ ໄດ້ຫລຸດລົງເທື່ອລະກ້າວ ເຊິ່ງສະແດງໃຫ້ເຫັນທົ່ວແຂວງ ຍັງເຫລືອຄອບຄົວບໍ່ທັນພົ້ນທຸກປະມານ 30 ພັນຄອບຄົວ, ບ້ານບໍ່ທັນພົ້ນທຸກ 115 ບ້ານ, ເມືອງບໍ່ພົ້ນທຸກ 3 ເມືອງຄື: ເມືອງໄຊຍະບູລີ, ຊຽງຮ່ອນ ແລະ ເມືອງໄຊສະຖານ. ສຳລັບທິດທາງອັນໃກ້ນີ້, ຈະເລັ່ງຊຸກຍູ້ທຸກພາກສ່ວນສູ້ຊົນ ແກ້ໄຂຄອບຄົວທຸກຍາກໃຫ້ໄດ້ 732 ຄອບຄົວ, ສ້າງບ້ານພົ້ນທຸກໃຫ້ໄດ້ 8 ບ້ານ, ບ້ານພັດທະນາ 30 ບ້ານ, ສ້າງບ້ານໃຫຍ່ກາຍເປັນຕົວເມືອງນ້ອຍໃນຊົນນະບົດ, ສ້າງເມືອງພົ້ນທຸກໃຫ້ໄດ້ 1 ເມືອງ.

KPL