*ເມື່ອຫວນຄືນປະຫວັດສາດກ່ອນນີ້ຫລາຍສິບປີ, ໃນລະຫວ່າງ ວັນທີ 13-17 ສິງຫາ ປີ 1950 ຢູ່ຖານທີ່ໝັ້ນປະຕິວັດ, ກອງປະຊຸມໃຫຍ່ແນວລາວຕໍ່ຕ້ານທົ່ວປະເທດ ໄດ້ໄຂຂຶ້ນຢ່າງເປັນທາງການ; ກອງປະຊຸມໄດ້ຕົກລົງສ້າງຕັ້ງແນວລາວອິດສະຫລະ ແລະ ສ້າງຕັ້ງລັດຖະບານລາວຕໍ່ຕ້ານຂຶ້ນ ເຊິ່ງປະກອບມີກົງຈັກການຈັດຕັ້ງ 5 ກະຊວງ,  ໃນນັ້ນມີກະຊວງພາຍໃນ ໂດຍແມ່ນ ທ່ານ ພູມີ ວົງວິຈິດ ເປັນລັດຖະເສນາ (ລັດຖະມົນຕີ). ໃນປີ 1954 ໄດ້ມີການເຕົ້າໂຮມສອງແຂວງຄື: ຫົວພັນ ແລະ ຜົ້ງສາລີ ເພື່ອປົກປັກຮັກສາອົງການນຳຂອງພັກ, ອຳນາດການປົກຄອງ ປະຕິວັດຢູ່ສອງແຂວງເຕົ້າໂຮມ ຈຶ່ງໄດ້ຕົກລົງຈັດຕັ້ງ “ກຳລັງປ້ອງກັນ” ຂຶ້ນ.

    ວັນທີ 10 ຕຸລາ 1954, ເນື່ອງໃນໂອກາດສະເຫລີມສະຫລອງວັນປະກາດເອກະລາດ 12 ຕຸລາ ຄົບຮອບ 9 ປີ, ສະເຫລີມສະຫລອງໄຊຊະນະໃຫຍ່ແຫ່ງການຕໍ່ສູ້ຕ້ານພວກຈັກກະພັດລ່າເມືອງຂຶ້ນແບບເກົ່າ ແລະ ຊົມເຊີຍຜົນສຳເລັດການເຕົ້າໂຮມສອງແຂວງ; ປະທານ ໄກສອນ ພົມວິຫານ ໄດ້ປະກາດສ້າງຕັ້ງ “ຄະນະສັນຕິລາດສູນກາງ” ຢ່າງເປັນທາງການຢູ່ທີ່ບ້ານເລີຍ ຕາແສງເມືອງໂສຍ, ແຂວງຫົວພັນ ເຊິ່ງມີກຳລັງພົນ 35 ສະຫາຍ ໂດຍ ພາຍໃຕ້ການຊີ້ນຳໆພາ ແລະ ບັນຊາໂດຍກົງຂອງທ່ານ ພູມີ ວົງວິຈິດ ເຊິ່ງເຮັດໜ້າທີ່ຕົ້ນຕໍຄື: ປ້ອງກັນຄະນະກຳມະການກວດກາສາກົນ (ອິນເດຍ, ການາດາ ແລະ ໂປໂລຍ) ໃຫ້ມີຄວາມປອດໄພ; ປົກປັກຮັກສາອົງການນຳຂອງພັກ-ລັດ; ສືບ ແລະ ກຳສະພາບເປົ້າໝາຍສັດຕູ, ພວກຕ້ອງໂທດຄະດີອາຍາ; ປຸກລະດົມຂົນຂວາຍ ແລະ ກໍ່ສ້າງຮາກຖານຢູ່ໃນຕົວເມືອງ. ໃນປີ 1954, ເພື່ອເປັນການກະກຽມໃຫ້ແກ່ການປ້ອງກັນຜູ້ນຳທີ່ເຂົ້າຮວມລາວຄັ້ງ ທີ 1, ສູນກາງພັກໄດ້ຕົກລົງປ່ຽນຊື່ “ຄະນະສັນຕິລາດສູນກາງ” ມາເປັນ “ຄະນະປ້ອງກັນພາຍໃນ”  ເພື່ອເຮັດໜ້າທີ່ປ້ອງກັນລັດຖະບານປະສົມ ຄັ້ງທີ 1. ໃນລະຫວ່າງວັນທີ 5-12 ເມສາ 1961, ຄະນະຊີ້ນຳສູນກາງພັກປະຊາຊົນລາວ ໄດ້ເປີດກອງປະຊຸມຄົບຄະນະຂຶ້ນ ທີ່ຄັງໄຂ ແຂວງຊຽງຂວາງ; ກອງປະຊຸມໄດ້ຕົກລົງປ່ຽນຊື່ “ຄະນະປ້ອງກັນພາຍໃນ” ມາເປັນ “ຫ້ອງ ການປ້ອງກັນຄວາມສະຫງົບສູນກາງ” ເຊິ່ງຊີ້ນຳໂດຍທ່ານ ສີສົມພອນ ລໍວັນໄຊ ແລະ ມອບໝາຍໃຫ້ທ່ານ ຊົມຊື່ນ ຄຳພິທູນ ເປັນຜູ້ນຳພາ-ບັນຊາຕົວຈິງ... ດ້ວຍມູນເຊ້ືອອັນສະຫງ່າອົງອາດ ແລະ ພິລະອາດຫານຂອງກຳລັງປ້ອງກັນຄວາມສະຫງົບປະຊາຊົນລາວ ພາຍໃຕ້ການນຳພາຂອງພັກປະຊາຊົນປະຕິວັດລາວ, ພາຍຫລັງປະເທດຊາດໄດ້ຮັບການປົດປ່ອຍຢ່າງສົມບູນ, ສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975, ກຳລັງປ້ອງກັນຄວາມສະຫງົບ ໄດ້ຕັ້ງໜ້າສືບຕໍ່ເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ຢ່າງເປັນເຈົ້າການ.

    ມາ ໃນວັນທີ 1 ກັນຍາ 2005, ລັດຖະບານໄດ້ຕົກລົງ ແລະ ອອກດຳລັດ ເລກທີ 277/ນຍ ຮັບຮອງເອົາວັນທິ 5 ເມສາ 1961 ເປັນມື້ສ້າງຕັ້ງກຳລັງປ້ອງກັນຄວາມສະຫງົບ ຢ່າງເປັນທາງການ.