ຂປລ.ໃນວັນທີ 17-18ພຶດສະພາ2023 ທີ່ຜ່ານມາ, ສະຫາຍ ແສງເພັດ ຮຸ່ງບຸນຍວງ, ເອກອັກ ຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມດ້ວຍ​ຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງກາວບັ່ງ ແລະ ແຂວງລາງເຊີນ ສສ ຫວຽດນາມ ໂດຍໄດ້ພົບປະ ແລະ ປຶກສາຫາລືກັບບັນດາສະຫາຍ ການນຳ ພັກ-ລັດ ຂອງທັງສອງແຂວງ.
  ​​ສຳລັບ ຢູ່ແຂວງກາວບັງ, ສະຫາຍ ຮວາງ ຊວນ ແອ່ງ ຮອງເລຂາພັກແຂວງ, ປະທານຄະນະ ກໍາມະການປະຊາຊົນແຂວງກາວບັ່ງ (ເຈົ້າແຂວງ)ກໍໄດ້ລາຍງານ​ກ່ຽວກັບສະພາບລວມ ນັບທັງສະພາບ​ການພັດທະນາເສດຖະກິດ-ສັງຄົມຂອງແຂວງ ໃນໄລຍະຜ່ານມາ  ເຊິ່ງແຂວງກາວບັ່ງເປັນແຂວງທີ່ຕັ້ງຢູ່ເຂດພູດອຍມີຊາຍແດນຕິດກັບແຂວງກວາງຊີ ສປ ຈີນ ມີພົນລະເມືອງ 5 ແສນກວ່າຄົນ, ສ່ວນໃຫຍ່ແມ່ນຊົນເຜົ່າໄຕ ແລະ ຊົນເຜົ່ານົງ ກວມເອົາ 78% ບໍ່ມີຊາຍແດນຕິດກັບບັນດາແຂວງຂອງລາວ. ໃນໄລຍະຜ່ານມາເຖີງແມ່ນວ່າແຂວງບໍ່ມີຊາຍແດນຕິດກັບລາວ ແຕ່ລູກຫລານຂອງຊາວແຂວງກາວບັ່ງກໍໄດ້ປະກອບ ສ່ວນເຂົ້າໃນການຊ່ວຍເຫລືອ ການປະຕິວັດລາວ ໂດຍສະເພາະແມ່ນທະຫານອາສາສະໝັກຫວຽດນາມຊ່ວຍລາວໃນປາງສົງຄາມ ຕ້ານຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່, ມີຊັ້ນນາຍພົນ 8 ຄົນ. ແຂວງດັ່ງກ່າວ ມີຄວາມມຸ່ງມາດປາດຖະໜາຢາກຮ່ວມມືກັບບັນດາແຂວງຂອງລາວ ໂດຍສະເພາະແມ່ນແຮກສ່ຽວ ກັບບັນດາແຂວງທີ່ມີພູມສັນຖານໃກ້ຄຽງກັນ. ສະນັ້ນ ຈຶ່ງມີຄວາມເຊື່ອໝັ້ນວ່າ ໃນໄລຍະທີ່​ສະ ຫາຍ​ເອກ​ອັກຄະ​ລັດຖະທູດ​ມາດຳລົງຕຳແໜ່ງຢູ່ ສສ ຫວຽດນາມ ​ຈະເປັນຂົວຕໍ່ໃນການປະສານງານ ລະ ຫວ່າງ​ສອງ​ປະເທດ ໂດຍສະເພາະແມ່ນແຂວງກາວບັ່ງແລະ ບາງທ້ອງຖິ່ນຂອງລາວ​.
   ສະຫາຍ ແສງເພັດ ຮຸ່ງບຸນຍວງ ກໍໄດ້ສະແດງຄວາມຂອບໃຈໃນການຕ້ອນຮັບອັນອົບອຸ່ນ ແລະ ເປັນກັນເອງໃນຖານສະຫາຍອ້າຍນ້ອງ ພ້ອມທັງສະແດງຄວາມຊົມເຊີຍໝາກຜົນການ ພັດທະນາເສດຖະ ກິດ-ສັງຄົມໃນໄລຍະຜ່ານມາຂອງແຂວງ ເຊິ່ງບັນດາຜົນສຳເລັດດັ່ງກ່າວ ກໍໄດ້ສະແດງໃຫ້ເຫັນເຖິງການ ວາງແນວທາງທີ່ຖືກຕ້ອງ, ຄວາມສາມາດໃນການຊີ້ນຳ-ນຳພາຂອງອົງ ຄະນະ ພັກ, ອຳນາດການປົກຄອງ ແລະ ການເປັນຈິດໜຶ່ງໃຈດຽວ ຂອງປະຊາຊົນ ແຂວງກາວບັ່ງ. ພ້ອມນັ້ນ ສະຫາຍຍັງໄດ້ຕີລາຄາສູງຕໍ່ສາຍພົວພັນສອງປະເທດລາວ-ຫວຽດນາມ ໂດຍສະເພາະແມ່ນແຂວງກາວບັ່ງ ເຊິ່ງໃນໄລຍະຜ່ານມາໄດ້ມີການປະກອບສ່ວນເຂົ້າໃນການປະຕິວັດຂອງລາວ. ສຳລັບແຜນການ ແລະ ທິດທາງຂອງແຂວງ ທີ່ຢາກມີການຮ່ວມມືກັບບັນດາແຂວງຂອງລາວນັ້ນ ສະຫາຍໄດ້ແນະນຳແຂວງກາວບັ່ງຊອກຫາຄູ່ຮ່ວມ ໂດຍສະ ເພາະແມ່ນແຂວງທີ່ມີພູມສັນຖານຄ້າຍຄືກັນ ເຊັ່ນ: ເປັນເຂດທີ່ໝັ້ນປະຕິວັດ ຫລື ແຂວງທີ່ມີແຫລ່ງທ່ອງທ່ຽວອາດຈະເປັນແຂວງຫົວພັນ ແລະ ແຂວງຫລວງພະບາງຂອງ ສປປ ລາວ ເພື່ອຮ່ວມມືນຳກັນໃນອະນາຄົດອັນໃກ້ນີ້.
   ໂອກາດເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງກາວບັ່ງ ໃນຄັ້ງນີ້,  ວັນທີ 17 ພຶດສະພາ ຄະນະໄດ້ພົບປະ ແລະ ເຮັດວຽກ ກັບສະຫາຍ ເລ ຫາຍ ຮວ່າ ກຳມະການພັກແຂວງ, ເຈົ້າຄອງນະຄອນກາວບັ່ງ, ແຂວງກາວບັ່ງ, ປະທານສະມາຄົມມິດຕະພາບ ຫວຽດນາມ-ລາວແຂວງກາວບັ່ງ ມີການນຳພະ ແນກການຕ່າງປະເທດ, ມີປະທານສະຫະພັນບັນດາອົງການຈັດຕັ້ງ ມິດຕະພາບແຂວງກາວບັ່ງ, ຮອງປະ ທານສະມາຄົມມິດຕະພາບ ຫວຽດນາມ-ລາວ ຂັ້ນສູນກາງເຂົ້າຮ່ວມ.
   ໃນການພົບປະຄັ້ງນີ້ ສະມາຄົມມິດຕະພາບຫວຽດນາມ-ລາວແຂວງກາວບັ່ງ ໄດ້ລາຍງານໂດຍຫຍໍ້ກ່ຽວກັບການສ້າງຕັ້ງສະມາຄົມ ເລີ່ມແຕ່ປີ 2013 ມີສະມາຊິກທັງໝົດ 150 ຄົນ, ໃນໄລຍະຜ່ານມາ ໄດ້ຮັບຫລຽນໄຊ ແລະ ການຍ້ອງຍໍຈາກລາວຫລາຍສະຫາຍ ເຊັ່ນ: ຫລຽນໄຊອິດສະຫລະ 44 ສະຫາຍ, ຫລຽນໄຊຊະນະເລີດ 81 ສະຫາຍ, ຫລຽນໄຊພິລິອາດຫານຕ້ານຈັກກະພັດຝຣັ່ງ 5 ສະຫາຍ, ຫລຽນໄຊພິ ລະອາດຫານຕ້ານ ອາເມລິກາ 71 ສະຫາຍ ແລະ ມີ 19 ຊ່ຽວຊານ ບັນດາຂະແໜງການຊ່ວຍລາວ.  ພ້ອມດຽວກັນນັ້ນ ສະຫາຍ ດາມ ວັນ ແອງ ອະດີດຮອງເລຂາພັກແຂວງ, ອະດີດປະທານສະພາປະຊາ ຊົນແຂວງ, ປະທານສະຫະພັນບັນດາອົງການຈັດຕັ້ງ ມິດຕະພາບແຂວງກາວບັ່ງ ໄດ້ຍົກໃຫ້ເຫັນຄວາມສຳຄັນຂອງສາຍພົວພັນມິດຕະພາບຫວຽດນາມ-ລາວ ນັບແຕ່ສະໄໝດຶກດຳບັນຈົນສືບທອດມາຮອດປັດຈຸ ບັນໂດຍມີປະທານໂຮ່ຈິມິນຜູ້ຍິ່ງໃຫຍ່, ປະທານໄກສອນ  ພົມວິຫານ ແລະ ປະທານສຸພານຸວົງ ທີ່ແສນເຄົາລົບຮັກເປັນຜູ້ລິເລີ່ມ. ເພື່ອເຮັດໃຫ້ສາຍພົວພັນດັ່ງກ່າວໄດ້ມີຄວາມໝາຍເລິກເຊິ່ງ ແລະ ເຮັດໃຫ້ປະ ຊາຊົນທັງສອງປະເທດ ໄດ້ຮັບຮູ້ກ່ຽວກັບສາຍພົວພັນຂອງແຂວງກາວບັ່ງກັບ ສປປ ລາວ ຫລາຍກວ່າເກົ່ານັ້ນ, ມາຮອດປີ  2022, ສະມາຄົມມິດຕະພາບຫວຽດນາມ-ລາວແຂວງກາວບັ່ງ ຈຶ່ງໄດ້ຂຽນປື້ມ ໃນຫົວຂໍ້“ລູກຫລານຊາວແຂວງກາວບັ່ງ ຊ່ວຍການປະຕິວັດລາວ“. ມາຮອດປັດຈຸບັນແມ່ນກະກຽມພິມຈໍາໜ່າຍ, ພ້ອມດຽວກັນນັ້ນ ສະມາຄົມມິດຕະພາບຫວຽດນາມ-ລາວ ແຂວງກາວບັ່ງ ໄດ້ສະເໜີໃຫ້ສະຖານທູດເປັນຂົວຕໍ່ໃນການປະສານງານ ແລະ ສ້າງເງື່ອນໄຂອຳນວຍຄວາມສະດວກ ໃຫ້ແກ່ສະມາຄົມ ພ້ອມທັງຄະນະປະສານງານອະດີດທະຫານອາສາສະໝັກ ແລະ ຊ່ຽວຊານຊ່ວຍການປະຕິວັດລາວ ໄດ້ໄປແລກປ່ຽນ ແລະ ຢ້ຽມຢາມ ສປປ ລາວ, ສະເໜີຂໍຄວາມຮ່ວມມືກັບບາງແຂວງເພື່ອແຮກສ່ຽວນຳກັນ, ສະເໜີໃຫ້ສະຖານທູດຊ່ວຍແປປື້ມທີ່ທາງສະມາຄົມກຳລັງຮຽບຮຽງ ເພື່ອພິມເປັນສອງພາສາທັງລາວ ແລະ ຫວຽດນາມ.
   ໂອກາດນີ້, ສະຫາຍ ແສງເພັດ ຮຸ່ງບຸນຍວງ ໄດ້ຕີລາສູງຕໍ່ການນຳແຂວງ ກໍຄືບັນດາອົງການຈັດ ຕັ້ງມິດຕະພາບແຂວງກາວບັ່ງ ທີ່ໄດ້ເອົາໃຈໃສ່ຄົ້ນຄວ້າໃນການເພີ່ມພູນສາຍພົວພັນມິດຕະພາບ ລາວ-ຫວຽດນາມ ເປັນຂໍ້ມູນທີ່ດີໃຫ້ແກ່ປະຊາຊົນສອງຊາດ ໂດຍສະເພາະແມ່ນຄົນຮຸ່ນໜຸ່ມໄດ້ສຶກສາຄົ້ນຄວ້າຮຽນຮູ້ປະຫວັດສາຍພົວພັນລາວ-ຫວຽດນາມ ໃຫ້ເລິກເຊິ່ງກວ່າເກົ່າ,ພ້ອມກັນນັ້ນສະຫາຍເອກອັກຄະລັດຖະທູດ ຍັງໄດ້ຢືນຢັນວ່າຈະຮັບເອົາຄຳສະເໜີຂອງສະມາຄົມ ໄປພິຈາລະນາເພື່ອໃຫ້ບັນລຸຕາມຄວາມມຸ່ງຫວັງ.
   ນອກຈາກນັ້ນ, ຄະນະກໍໄດ້ໄປຢ້ຽມຢາມຄອບຄົວລູກຫລານຂອງທ່ານ ພົນຈັດຕະວາ ຈູເຟືອງເດີ່ຍ ອະດີດຫົວໜ້າຄະນະທະຫານອາສາສະໝັກຊ່ວຍລາວ ເມື່ອປີ 1981-1988.
   ໃນວັນທີ 18 ພຶດສະພາ ຄະນະໄດ້ສືບຕໍ່ເດີນທາງໄປຢ້ຽມຢາມ ແລະ ເຮັດວຽກ ຢູ່ແຂວງລາງເຊີນ ເຊິ່ງໄດ້ພົບປະ ແລະ ເຮັດວຽກ ກັບສະຫາຍນາງ ດວານ ທູ ຮ່າ ຄະນະປະຈໍາພັກແຂວງ, ຮອງເຈົ້າ ແຂວງລາງເຊີນ ພ້ອມທັງລາຍງານໃຫ້ຊາບວ່າ ແຂວງເປັນແຂວງນ້ອຍມີພົນລະເມືອງໜ້ອຍ, ຊົນເຜົ່າໄຕ ແລະ ນຸງ ກວມ 75% ຂອງພົນລະເມືອງ ພ້ອມກັນນັ້ນ ກໍໄດ້ລາຍງານສະພາບເສດຖະກິດ-ສັງຄົມຂອງແຂວງໃນໄລຍະຜ່ານມາໃຫ້ຄະນະຊາບ.
   ສະຫາຍ ແສງເພັດ ຮຸ່ງບຸນຍວງ ໄດ້ລາຍງານສະພາບການສະເຫລີມສະຫລອງປີສາມັກຄີມິດຕະພາບ ລະຫວ່າງສອງປະເທດ ລາວ-ຫວຽດນາມ ປີ 2022 ຄື: ວັນສ້າງຕັ້ງສາຍພົວພັນການທູດຄົບຮອບ 60ປີ, ວັນເຊັນສົນທິສັນຍາມິດຕະພາບຄົບຮອບ 45 ປີ ພ້ອມທັງສະແດງຄວາມຊົມເຊີຍ ແລະ ຕີລາຄາສູງຕໍ່ໝາກຜົນ ແລະ ການຈະເລີນເຕີບໂຕທາງດ້ານເສດຖະກິດຂອງແຂວງລາງເຊີນ ໃນໄລຍະຜ່ານມາ ໂດຍສະເພາະແມ່ນການເກັບລາຍຮັບຈາກ ການນຳເຂົ້າ-ສົ່ງອອກ ຢູ່ດ່ານສາກົນມິດຕະພາບຂອງແຂວງ ພາຍຫລັງຄວບຄຸມພະຍາດໂຄວິດ-19 ໄດ້ ແລະ ເປີດດ່ານໄປມາຫາສູ່ກັນລະຫວ່າງບັນດາປະ ເທດ, ຫວັງວ່າໃນອະນາຄົດແຂວງລາງເຊີນ ຈະນັບມື້ມີລາຍໄດ້ສູງກວ່າເກົ່າ. ພ້ອມດຽວກັນນັ້ນ ສະຫາຍ ເອກອັກຄະລັດຖະທູດ ຍັງຫວັງຢ່າງຍິ່ງວ່າໃນອະນາຄົດແຂວງລ້າງເຊີນ ຈະເປີດໂອກາດໃຫ້ສິນຄ້າລາວໄດ້ເຂົ້າມາສູ່ຕະຫລາດຂອງແຂວງລາງເຊີນ ແລະ ມີຄວາມເຊື່ອໝັ້ນວ່າ ໃນອະນາຄົດລະຫວ່າງແຂວງລາງເຊິນ ແລະ ບາງແຂວງຂອງລາວ ຈະໄດ້ມີການແຮກສ່ຽວນຳກັນ ເພື່ອພ້ອມກັນແລກປ່ຽນບົດຮຽນ, ປະສົບການໃນການຄຸ້ມຄອງບໍລິຫານລັດ-ຄຸ້ມຄອງສັງຄົມ ໂດຍສະເພາະການຄຸ້ມຄອງດ່ານສາກົນ ທີ່ທາງແຂວງລາງເຊີນມີບົດຮຽນສູງ.

ຂ່າວ,ພາບ: ສະຖານທູດລາວທີ່ຮ່າໂນ້ຍ

KPL